સોનું પડ્યું શેરબજાર પર ભારે: ગોલ્ડ ETF માં રોકાણ બમણું થઈ ₹24,050 કરોડે પહોંચ્યું, જાણો કેમ?

બદલાતો ટ્રેન્ડ: જાન્યુઆરીમાં રોકાણકારોએ ઇક્વિટીને બદલે સોના-ચાંદી પર પસંદગી ઉતારી; AMFI ના ચોંકાવનારા આંકડા જાહેર, મ્યુચ્યુઅલ ફંડમાં 14% નો ઘટાડો જ્યારે ગોલ્ડ ETF માં ઐતિહાસિક તેજી.

Gold vs Equity: વર્ષ 2026 ની શરૂઆત સાથે જ રોકાણકારોના મિજાજમાં મોટો અને નોંધપાત્ર બદલાવ જોવા મળ્યો છે. શેરબજારની અસ્થિરતા વચ્ચે હવે રોકાણકારો જોખમ લેવાને બદલે 'સુરક્ષિત રોકાણ' (Safe Haven Investment) તરફ વળ્યા છે. જાન્યુઆરી મહિનામાં પરંપરાગત ગણાતા 'ઇક્વિટી મ્યુચ્યુઅલ ફંડ' (Equity Mutual Funds) ની ચમક ઓછી થઈ છે અને તેની સામે સોના-ચાંદીના 'એક્સચેન્જ ટ્રેડેડ ફંડ્સ' (Gold & Silver ETFs) માં નાણાંનો ધોધ વહ્યો છે.

'એસોસિએશન ઓફ મ્યુચ્યુઅલ ફંડ્સ ઈન ઈન્ડિયા' (AMFI) દ્વારા જાહેર કરાયેલા તાજેતરના આંકડા આ વાતની સાબિતી આપે છે. ડેટા મુજબ, જાન્યુઆરી મહિનામાં રોકાણકારોએ શેરબજારને બદલે પીળી ધાતુ પર વધુ ભરોસો મૂક્યો છે. માત્ર ગોલ્ડ ETF માં જ જાન્યુઆરીમાં ₹24,050 Crore નું જંગી અને રેકોર્ડબ્રેક રોકાણ આવ્યું છે.

આ આંકડો કેટલો મોટો છે તેનો અંદાજ એ વાત પરથી લગાવી શકાય છે કે ડિસેમ્બર મહિનામાં આ રકમ ₹11,647 Crore હતી. એટલે કે એક જ મહિનામાં સોનામાં રોકાણ લગભગ બમણું થઈ ગયું છે. જો ગોલ્ડ અને સિલ્વર બંને ETF ને ભેગા કરીએ તો કુલ ₹33,503 Crore નું નેટ રોકાણ થયું છે. સોનાના ભાવમાં થઈ રહેલા સતત વધારાએ રોકાણકારોને આકર્ષ્યા છે.