Gold Price Today: સોનાના ભાવમાં મોટો કડાકો, એક જ ઝટકામાં 24 થી 18 કેરેટ સોનું થયું સસ્તું; જાણો 6 ડિસેમ્બરના લેટેસ્ટ રેટ

શનિવારે સોનામાં નરમાઈ પણ ચાંદીની ચમક વધી: 1 કિલો ચાંદીનો ભાવ ₹1,90,000 ને પાર, સોનામાં રોકાણકારો માટે ખરીદીની તક.

ભારતીય બુલિયન માર્કેટમાં સપ્તાહના અંતે શનિવાર, ૬ ડિસેમ્બરના રોજ સોના અને ચાંદીના ભાવમાં મિશ્ર વલણ જોવા મળ્યું છે. સોનાના ભાવમાં નોંધપાત્ર કડાકો બોલી જતાં ખરીદદારો અને સામાન્ય ગ્રાહકોને થોડી રાહત મળી છે. આજે ૨૪ કેરેટ, ૨૨ કેરેટ અને ૧૮ કેરેટ એમ ત્રણેય શ્રેણીના સોનાના ભાવ તૂટ્યા છે. એક જ ઝટકામાં ૧૦૦ ગ્રામ સોનાના ભાવમાં સીધો ₹૫,૪૦૦નો ઘટાડો નોંધાયો છે. જોકે, સોનામાં આવેલી નરમાઈની સામે ચાંદીમાં તેજીનો તોખાર યથાવત જોવા મળ્યો છે, જે રોકાણકારો માટે આશ્ચર્યજનક છે.

શનિવારે બજાર ખુલતાની સાથે જ સોનાના ભાવમાં ઘટાડાની અસર વર્તાઈ હતી. શુદ્ધતાના આધારે ૨૪ કેરેટ સોનાના ભાવ પર નજર કરીએ તો, આજના ઘટાડા બાદ ૧૦ ગ્રામ શુદ્ધ સોનાનો ભાવ ₹૫૪૦ ઘટીને ₹૧,૩૦,૧૫૦ થયો છે. જ્યારે મોટા જથ્થામાં એટલે કે ૧૦૦ ગ્રામ સોનાનો ભાવ ₹૧૩,૦૧,૫૦૦ પર પહોંચ્યો છે. નાના રોકાણકારો માટે ૧ ગ્રામ સોનાનો ભાવ હવે ₹૧૩,૦૧૫ થયો છે. આમ, ઉચ્ચ સપાટીએથી ભાવમાં આવેલો આ ઘટાડો નવા રોકાણકારો માટે ખરીદીની તક સમાન બની શકે છે.

દાગીના બનાવવા માટે ગ્રાહકો જેની સૌથી વધુ પસંદગી કરે છે તેવા ૨૨ કેરેટ સોનાના ભાવમાં પણ ઘટાડો થયો છે. આ શ્રેણીમાં પ્રતિ ૧૦ ગ્રામે ₹૫૦૦નો ઘટાડો નોંધાયો છે, જેના પરિણામે નવો ભાવ ₹૧,૧૯,૩૦૦ થયો છે. જો ૧૦૦ ગ્રામની ગણતરી કરીએ તો સીધો ₹૫,૦૦૦નો ફાયદો ગ્રાહકોને મળી રહ્યો છે અને ભાવ ₹૧૧,૯૩,૦૦૦ થયો છે. આ ઉપરાંત ૧૮ કેરેટ સોનાના ભાવમાં પણ ૧૦ ગ્રામે ₹૪૧૦નો ઘટાડો થતાં ભાવ ₹૯૭,૬૧૦ થયો છે.