અમેરિકાના એક નિર્ણયથી ભારતનું સોનું ભડકે બળ્યું! રાતોરાત કેમ આવ્યા ભાવમાં ઉછાળા? જાણો કારણ

બુધવારનો દિવસ ભારતીય બુલિયન માર્કેટ માટે ભારે ઉથલપાથલ અને તોફાની તેજી લઈને આવ્યો છે. સોના અને ચાંદી બંને કિંમતી ધાતુઓના ભાવમાં નોંધપાત્ર ઉછાળો જોવા મળ્યો છે, જેણે રોકાણકારોને આશ્ચર્યચકિત કરી દીધા છે.

ખાસ કરીને ચાંદીના રોકાણકારો માટે આજનો દિવસ ખૂબ જ શુકનિયાળ સાબિત થયો છે, કારણ કે ચાંદીના ભાવમાં મોટો ભડકો થયો છે. આજના ટ્રેડિંગ સેશનમાં ચાંદીએ ₹1,91,000 ની મહત્વની મનોવૈજ્ઞાનિક સપાટી કુદાવી દીધી છે, જ્યારે સોનું પણ ફરી એકવાર ₹1,30,000 ની ઉપર મજબૂતીથી ટ્રેડ થઈ રહ્યું છે. અમેરિકન ફેડરલ રિઝર્વના નિર્ણય પહેલા બજારમાં આ ગરમાવો સ્પષ્ટપણે વર્તાઈ રહ્યો છે.

સ્થાનિક કોમોડિટી માર્કેટ એટલે કે મલ્ટી કોમોડિટી એક્સચેન્જ (MCX) પર આજે સવારથી જ લેવાલીનો માહોલ જોવા મળી રહ્યો છે. ફેબ્રુઆરી ડિલિવરી વાળા સોનાના વાયદાની શરૂઆત 0.20% ના વધારા સાથે ₹1,30,369 પ્રતિ 10 ગ્રામ પર થઈ હતી. બીજી તરફ, માર્ચ ડિલિવરી વાળી ચાંદી 1.14% વધીને ₹1,90,210 પર ખૂલી હતી. જોકે, જેમ જેમ દિવસ આગળ વધ્યો તેમ તેજી વધુ પકડાઈ હતી. બપોરે 1:24 વાગ્યાની આસપાસ સોનામાં ₹93 (0.7%) નો વધારો જોવા મળ્યો હતો અને તે ₹1,30,200 પર ટ્રેડ થઈ રહ્યું હતું. જ્યારે ચાંદીમાં જબરદસ્ત ઉછાળો આવ્યો હતો, જેમાં ₹3,226 (1.72%) નો વધારો થતા ભાવ ₹1,91,290 પ્રતિ કિલોગ્રામ પર પહોંચી ગયો હતો.

સોના-ચાંદીના ભાવમાં અચાનક આવેલા આ ઉછાળા પાછળનું મુખ્ય કારણ અમેરિકામાં ચાલી રહેલી આર્થિક ગતિવિધિઓ અને અનિશ્ચિતતા છે. આજે રાત્રે યુએસ ફેડરલ રિઝર્વ (US Federal Reserve) વ્યાજદરો અંગે પોતાનો અત્યંત મહત્વનો નિર્ણય જાહેર કરવા જઈ રહ્યું છે, જેના પર સમગ્ર વિશ્વની નજર મંડાયેલી છે. અમેરિકામાં ફુગાવો હજુ પણ ફેડના 2% ના નિર્ધારિત લક્ષ્યાંકથી ઉપર છે અને ત્યાંના રોજગાર બજાર (Job Market) માં પણ નરમાઈ જોવા મળી રહી છે. આ સ્થિતિમાં બજારને આશા છે કે ફેડરલ રિઝર્વ વ્યાજદરમાં ઘટાડો કરી શકે છે અથવા ભવિષ્ય માટે નરમ વલણ અપનાવશે.