શોધખોળ કરો

LPG સિલિન્ડર હજુ પણ થશે વધુ મોંઘા! કેન્દ્ર સરકારે કિંમતો વધારવા પાછળ આપ્યું આ મોટું કારણ

કેન્દ્રીય મંત્રી પ્રહલાદ જોશીએ સ્પષ્ટ કર્યું છે કે અમેરિકા-ઈરાન વિવાદ અને વૈશ્વિક સપ્લાય ચેન ખોરવાતા ગેસ, પેટ્રોલ અને ડીઝલના ભાવમાં હજુ પણ વધારો થઈ શકે છે.

Written By : gujarati.abplive.com | Updated at : 08 Jun 2026 05:13 PM (IST)

lpg price hike global crisis gas cylinder rate increase

1/5

કેન્દ્રીય મંત્રી પ્રહલાદ જોશીએ આ ભાવ વધારા પાછળ અમેરિકા-ઈરાન વચ્ચેનો તણાવ, વૈશ્વિક સપ્લાય ચેનમાં આવેલી અડચણો અને ટ્રાન્સપોર્ટેશનના વધેલા ખર્ચને મુખ્ય કારણ ગણાવ્યા છે. 7 જૂનના રોજ ઘરેલુ ગેસ સિલિન્ડરમાં ₹29 નો વધારો ઝીંકાયો હતો, પરંતુ સરકારના મતે વૈશ્વિક પરિસ્થિતિ જોતાં આ ભાવ વધારો માત્ર એક મજબૂરી બની ગઈ છે.

2/5

કેન્દ્રીય મંત્રી પ્રહલાદ જોશીએ તાજેતરમાં જ નિવેદન આપતા જણાવ્યું હતું કે, આગામી સમયમાં પેટ્રોલ અને ડીઝલની સાથે ગેસના ભાવમાં પણ ભડકો થઈ શકે છે. તેમણે કહ્યું કે, "ગેસ સિલિન્ડરના ભાવ વધારાથી અમને પણ દુઃખ અને ખેદ છે, પરંતુ લોકોએ આની ટીકા કરતા પહેલા અત્યારની વૈશ્વિક પરિસ્થિતિ સમજવી પડશે. આખી દુનિયા હાલમાં ઘણા ગંભીર સંકટોમાંથી પસાર થઈ રહી છે."

3/5

મંત્રીએ આ સ્થિતિને વિસ્તારપૂર્વક સમજાવતા કેટલાક મુખ્ય કારણો આપ્યા હતા: સપ્લાય ચેનમાં મુશ્કેલી: દુનિયાભરમાં માલસામાનના ટ્રાન્સપોર્ટેશન અને સપ્લાય પર ખરાબ અસર પડી છે. હવે બહુ ઓછી જગ્યાએથી જ LPG ઉપલબ્ધ થઈ રહ્યો છે, જેનાથી સપ્લાય પર દબાણ વધ્યું છે. ટ્રાન્સપોર્ટેશન અને વીમાનો ખર્ચ: માલને દરિયાઈ માર્ગે કે અન્ય રીતે એક જગ્યાએથી બીજી જગ્યાએ પહોંચવામાં હવે 40 થી 45 દિવસ જેટલો લાંબો સમય લાગી રહ્યો છે. સમય વધવાથી વીમાનો (Insurance) અને ટ્રાન્સપોર્ટનો ખર્ચ ખૂબ વધી ગયો છે. મૂળ કિંમતમાં વધારો: આંતરરાષ્ટ્રીય બજારમાં અત્યારે ગેસની મૂળ કિંમત જ ઊંચી ચાલી રહી છે.

4/5

પ્રહલાદ જોશીએ વધુમાં ઉમેર્યું હતું કે, "અમે પણ સામાન્ય લોકોને પડતી મુશ્કેલીઓ અંગે એટલા જ ચિંતિત છીએ, પરંતુ અત્યારના સંજોગોમાં ગેસના ભાવ વધારવા એ અમારા માટે એક મોટી મજબૂરી બની ગઈ છે."

5/5

નોંધનીય છે કે, હજુ રવિવારે (7 જૂન) જ ઘરેલુ LPG સિલિન્ડરના ભાવમાં ₹29 નો વધારો કરવામાં આવ્યો હતો. આ વધારા પછી દિલ્હીમાં 14.2 કિલોના ગેસ સિલિન્ડરની કિંમત ₹942 પર પહોંચી ગઈ છે. આ પહેલા કોમર્શિયલ ગેસ સિલિન્ડરના ભાવમાં પણ વધારો કરાયો હતો, જેના કારણે હોટેલ, રેસ્ટોરન્ટ માલિકો અને વેપારીઓ પહેલેથી જ પરેશાન છે. ત્યાં હવે સરકારના આ નવા નિવેદને લોકોની ચિંતામાં વધારો કર્યો છે.