રોકડ જમા કરાવવી કે જમીન ખરીદવી હોય, હવે આ કામ માટે PAN કાર્ડ જરૂરી નથી, જુઓ નવો નિયમ

નવા પાન નિયમો 2026 લાગુ; પ્રોપર્ટી, વિદેશ યાત્રા, વાહન ખરીદી અને રોકડ વ્યવહારોની લિમિટમાં કરાયા મોટા ફેરફાર, સામાન્ય માણસને થશે ફાયદો.

સરકારે દેશના નાણાકીય માળખામાં એક મોટો અને ઐતિહાસિક બદલાવ કર્યો છે. સામાન્ય નાગરિકો, નોકરિયાત વર્ગ અને નાના વેપારીઓને રોજબરોજના આર્થિક વ્યવહારોમાં મોટી રાહત આપવાના હેતુથી 'નવા પાન નિયમો 2026' સત્તાવાર રીતે લાગુ કરી દેવામાં આવ્યા છે. આ નવા નિયમો અંતર્ગત રોકડ જમા કરાવવી, મિલકતની ખરીદી, વિદેશ પ્રવાસ, વીમા પ્રીમિયમ અને વાહનોની ખરીદી જેવા અનેક મહત્વના વ્યવહારોમાં પાન (PAN) કાર્ડ આપવાની મર્યાદા (લિમિટ) વધારી દેવામાં આવી છે અથવા તો કેટલાક કિસ્સામાં તેમાંથી સંપૂર્ણ મુક્તિ આપવામાં આવી છે.

આ નવા સુધારા અંતર્ગત સામાન્ય માણસને સૌથી મોટો ફાયદો બેંકિંગ વ્યવહારોમાં જોવા મળશે, કારણ કે રોકડ વ્યવહારોના નિયમો હવે એકદમ સરળ બની ગયા છે. અગાઉ બેંક ખાતામાં ₹50,000 થી વધુની કેશ જમા કરાવવા માટે પાન કાર્ડ આપવું અનિવાર્ય હતું, જે મર્યાદા હવે વધારી દેવાઈ છે. એટલું જ નહીં, આખા વર્ષ દરમિયાન બેંકમાં રોકડ જમા કરાવવાની વાર્ષિક મર્યાદા પણ ₹2.5 લાખથી સીધી વધારીને ₹10 લાખ કરી દેવામાં આવી છે, જેનાથી નાના વેપારીઓને વારંવારની કાગળિયાની ઝંઝટમાંથી મુક્તિ મળશે.

રિયલ એસ્ટેટ સેક્ટર એટલે કે પ્રોપર્ટીની ખરીદી અને વેચાણના ક્ષેત્રમાં પણ મધ્યમ વર્ગને ધ્યાનમાં રાખીને સરકારે મોટો આશરો આપ્યો છે. નવા નિયમો મુજબ, હવે ₹20 લાખ સુધીની કિંમતની કોઈ પણ પ્રોપર્ટી ખરીદવા કે વેચવા માટે પાન કાર્ડ સબમિટ કરવું જરૂરી રહેશે નહીં, જે મર્યાદા અગાઉ માત્ર ₹10 લાખ સુધીની જ હતી. આ સાથે જ, આવકવેરા વિભાગ (Income Tax Department) ની પ્રોપર્ટી ટ્રાન્ઝેક્શન રિપોર્ટિંગ લિમિટ પણ ₹30 લાખથી વધારીને ₹45 લાખ સુધી કરી દેવામાં આવી છે.