₹10,000 ની SIP કરવાથી કેટલા વર્ષમાં બને 1 કરોડનું ફંડ, સમજો કેલક્યુલેશન

તમારા પોર્ટફોલિયોની સમયાંતરે સમીક્ષા કરવી જરૂરી છે. દર વર્ષે રોકાણના પ્રદર્શનની તપાસ કરો અને જરૂર જણાય તો યોગ્ય ફેરફાર કરો.

પ્રતિકાત્મક તસવીર

આજના સમયમાં કરોડપતિ બનવાનું સપનું દરેક વ્યક્તિનું હોય છે, પરંતુ ઘણા લોકો માને છે કે તેના માટે લાખો રૂપિયાની એકસાથે બચત જરૂરી છે. જોકે, રોકાણની શિસ્તબદ્ધ પદ્ધતિ SIP (Systematic Investment Plan) દ્વારા નાની રકમથી પણ મોટું ફંડ બનાવી શકાય છે. જો તમે દર મહિને ₹10,000ની બચત કરીને મ્યુચ્યુઅલ ફંડમાં SIP કરો છો તો લાંબા ગાળે તમે ₹1 કરોડનું લક્ષ્ય હાંસલ કરી શકો છો.

મ્યુચ્યુઅલ ફંડમાં રોકાણનો સૌથી મોટો ફાયદો કમ્પાઉન્ડિંગનો છે. એટલે કે, તમારા રોકાણ પર મળતા વળતર પર પણ વળતર મળતું રહે છે. જો સરેરાશ 12% વાર્ષિક વળતર મળે તો દર મહિને ₹10,000ની SIP દ્વારા આશરે 20 વર્ષમાં ₹1 કરોડની નજીક પહોંચી શકાય છે. આ સમયગાળા દરમિયાન તમારું કુલ રોકાણ ₹24 લાખ રહેશે અને અંદાજિત વળતર આશરે ₹75.91 લાખ થઈ શકે છે.

જો સરેરાશ વાર્ષિક વળતર 15% રહે તો ₹1 કરોડનું લક્ષ્ય લગભગ 17 વર્ષમાં પૂર્ણ શકે છે. આ સમયગાળામાં કુલ રોકાણ આશરે ₹20.40 લાખ રહેશે, જ્યારે અંદાજિત વળતર લગભગ ₹80.88 લાખ થઈ શકે છે. આમ, કુલ ફંડ આશરે ₹1.01 કરોડ સુધી પહોંચી શકે છે. જોકે, મ્યુચ્યુઅલ ફંડમાં વળતર નિશ્ચિત હોતું નથી અને બજારના પ્રદર્શન પર આધાર રાખે છે.

જો તમે 20 વર્ષ કરતાં વહેલા ₹1 કરોડનું લક્ષ્ય હાંસલ કરવા માંગતા હો, તો Step-up SIP એક વિકલ્પ બની શકે છે. તેમાં દર વર્ષે તમારી આવક વધે તેમ SIPની રકમમાં પણ વધારો કરવામાં આવે છે. ઉદાહરણ તરીકે, ₹10,000થી શરૂઆત કરીને દર વર્ષે SIPમાં 10%નો વધારો કરવામાં આવે અને સરેરાશ 12% વાર્ષિક વળતર મળે તો અંદાજ મુજબ આશરે 15 વર્ષમાં ₹1 કરોડની નજીક પહોંચી શકાય છે.

રોકાણકારો માટે સૌથી મહત્વની બાબત એ છે કે રોકાણ વહેલું શરૂ કરવું. જેટલી નાની ઉંમરે રોકાણ શરૂ કરવામાં આવે, તેટલો લાંબો સમય કમ્પાઉન્ડિંગનો લાભ મળે છે. સાથે જ રોકાણમાં શિસ્ત જાળવવી પણ જરૂરી છે. બજારમાં ઉતાર-ચઢાવ આવે ત્યારે ગભરાઈને SIP બંધ કરવાને બદલે પોતાના લાંબા ગાળાના લક્ષ્યને ધ્યાનમાં રાખવું જોઈએ.

આ ઉપરાંત, તમારા પોર્ટફોલિયોની સમયાંતરે સમીક્ષા કરવી જરૂરી છે. દર વર્ષે રોકાણના પ્રદર્શનની તપાસ કરો અને જરૂર જણાય તો યોગ્ય ફેરફાર કરો. મ્યુચ્યુઅલ ફંડનું વળતર બજાર સાથે જોડાયેલું હોવાથી ઉપરોક્ત ગણતરીઓ માત્ર અંદાજ છે, ખાતરીપૂર્વકનું વળતર નથી.

(Disclaimer: અહીં , પૂરી પાડવામાં આવેલ માહિતી આપની જાણકારી માટે છે. શેરબજારમાં રોકાણ એ બજારના જોખમોને આધીન છે. એક રોકાણકાર તરીકે કોઈપણ શેરમાં પૈસા રોકતા પહેલા હંમેશા નાણાકીય નિષ્ણાતની સલાહ લેવી હિતાવહ છે. અહીં કોઈ પણ શેરમાં રોકાણ કરવાની સીધી ભલામણ કરવામાં આવતી નથી.)