બનાસકાંઠામાં ભારે વરસાદ: પૂર જેવી પરિસ્થિતિની વચ્ચે બે તાલુકામાં આવતીકાલે રજા જાહેર, 380 થી વધુ લોકોનું રેસ્ક્યુ

Banaskantha heavy rain: જિલ્લા વહીવટીતંત્ર દ્વારા શાળાઓ, કોલેજો અને આંગણવાડી બંધ રાખવાનો નિર્ણય, NDRF દ્વારા 380 થી વધુ લોકોનું રેસ્ક્યુ.

બનાસકાંઠા જિલ્લામાં ભારે વરસાદ અને જળબંબાકારની પરિસ્થિતિને ધ્યાનમાં રાખીને, જિલ્લા વહીવટીતંત્ર દ્વારા વાવ અને સુઈગામ તાલુકાની તમામ શૈક્ષણિક સંસ્થાઓમાં આવતીકાલે, 10 સપ્ટેમ્બર, 2025 ના રોજ રજા જાહેર કરવામાં આવી છે.

આ નિર્ણય મુજબ, આ બંને તાલુકાની તમામ આંગણવાડી, શાળાઓ અને કોલેજો બંધ રહેશે. બીજી તરફ, વરસાદના કારણે નાગલા ગામ સંપૂર્ણપણે પાણીમાં ગરકાવ થઈ ગયું છે, જ્યારે NDRF ની ટીમોએ વિવિધ વિસ્તારોમાંથી 380 થી વધુ લોકોને સુરક્ષિત સ્થળે ખસેડ્યા છે.

બનાસકાંઠા જિલ્લામાં સતત વરસી રહેલા વરસાદને કારણે જનજીવન અસ્તવ્યસ્ત થઈ ગયું છે. ખાસ કરીને સરહદીય વિસ્તારોમાં પૂર જેવી પરિસ્થિતિ ઊભી થઈ છે, જેના પગલે જિલ્લા વહીવટીતંત્ર દ્વારા મહત્ત્વપૂર્ણ નિર્ણયો લેવામાં આવ્યા છે.

જિલ્લા કલેક્ટર, બનાસકાંઠા દ્વારા જારી કરાયેલા આદેશ મુજબ, વાવ અને સુઈગામ તાલુકામાં ભારે વરસાદના લીધે ભરાયેલા પાણી અને અવરજવરની મુશ્કેલીને કારણે વિદ્યાર્થીઓની સુરક્ષાને ધ્યાનમાં રાખીને રજા જાહેર કરવામાં આવી છે. આ નિર્ણય અંતર્ગત આવતીકાલે (10/09/2025) તમામ આંગણવાડી, શાળાઓ અને કોલેજો સહિતની શૈક્ષણિક પ્રવૃત્તિઓ બંધ રહેશે.

વરસાદના કારણે થરાદ તાલુકાનું નાગલા ગામ સંપૂર્ણપણે પાણીમાં ગરકાવ થઈ ગયું છે. આશરે 2500 ની વસ્તી ધરાવતા આ ગામના તમામ મકાનો પાણીમાં ડૂબી ગયા છે અને ગામમાં આવવા-જવાનો રસ્તો પણ સંપૂર્ણપણે બંધ થઈ ગયો છે. ગામનું એકમાત્ર મંદિર પણ પાણીમાં ગરકાવ થયું છે, જ્યારે ખેતીના પાકો અને ઘરવખરીને ભારે નુકસાન થયું છે.

સુઈગામ નજીક આવેલા રૂપાણીવાસ માં પણ પરિસ્થિતિ ગંભીર છે. અહીંની શાળા પણ પાણીમાં ડૂબી ગઈ છે અને એન્ટ્રી ગેટ પર જ ગળાડૂબ પાણી ભરાયા છે, જેના કારણે શાળાએ જવું મુશ્કેલ બન્યું છે. આ વિસ્તારમાં ખેતરો જાણે બેટમાં ફેરવાઈ ગયા હોય તેવા દ્રશ્યો જોવા મળી રહ્યા છે.

સરહદીય વાવ ના ભાટવરગામ અને ભાટવરવાસ માં નદીઓ વહેતી હોય તેવા દ્રશ્યો સામે આવ્યા છે. અહીં પણ મોટા પ્રમાણમાં પાક અને જાનમાલને નુકસાન થયું છે. NDRF (નેશનલ ડિઝાસ્ટર રિસ્પોન્સ ફોર્સ) ની ટીમો દ્વારા યુદ્ધના ધોરણે બચાવ કાર્ય હાથ ધરવામાં આવ્યું છે અને અત્યાર સુધીમાં 380 થી વધુ લોકોને સલામત સ્થળે ખસેડવામાં આવ્યા છે. હાલમાં ગામમાં ઘૂંટણ સુધીના પાણી વહી રહ્યા છે, અને બચાવ કામગીરી સતત ચાલુ છે.