ગુજરાતમાં આગામી 3 કલાક માટે 13 જિલ્લામાં ઓરેન્જ એલર્ટ: સૌરાષ્ટ્ર-મધ્ય ગુજરાતમાં ભારે વરસાદની શક્યતા

Gujarat Rain Alert: હવામાન વિભાગની તાત્કાલિક ચેતવણી: રાજ્યના અનેક વિસ્તારોમાં યલો એલર્ટ પણ જાહેર.

ગુજરાતમાં ચોમાસાનો બીજો રાઉન્ડ સક્રિય બન્યો છે અને હવામાન વિભાગે આગામી 3 કલાક (એટલે કે રાત્રે 10 વાગ્યા સુધી) માટે રાજ્યના 13 જિલ્લાઓમાં ઓરેન્જ એલર્ટ જાહેર કર્યું છે.

આ જિલ્લાઓમાં ભાવનગર, અમરેલી, ગીર સોમનાથ, દિવ, જુનાગઢ, રાજકોટ, ભરૂચ, પંચમહાલ, ખેડા, આણંદ, વડોદરા, બનાસકાંઠા અને સાબરકાંઠાનો સમાવેશ થાય છે. આ વિસ્તારોમાં ભારેથી અતિભારે વરસાદની સંભાવના વ્યક્ત કરવામાં આવી છે.

ઓરેન્જ એલર્ટ ઉપરાંત, હવામાન વિભાગે રાજ્યના અન્ય ઘણા જિલ્લાઓ માટે યલો એલર્ટ પણ જાહેર કર્યું છે, જે દર્શાવે છે કે આ વિસ્તારોમાં પણ ભારે વરસાદ થઈ શકે છે.

યલો એલર્ટ હેઠળના જિલ્લાઓમાં કચ્છ, પાટણ, મહેસાણા, અમદાવાદ, સુરેન્દ્રનગર, મોરબી, જામનગર, દેવભૂમિ દ્વારકા, પોરબંદર, બોટાદ, ગાંધીનગર, અરવલ્લી, મહિસાગર, છોટા ઉદેપુર, નર્મદા, સુરત, તાપી, ડાંગ, નવસારી, વલસાડ, દમણ અને દાદરા નગર હવેલીનો સમાવેશ થાય છે.

આ આગાહી જોતાં, નાગરિકોને સાવચેત રહેવા અને જરૂરી તકેદારી રાખવા અપીલ કરવામાં આવી છે.

નીચાણવાળા વિસ્તારોમાં પાણી ભરાવાની અને વાહનવ્યવહારને અસર થવાની શક્યતા છે. સ્થાનિક પ્રશાસન પણ વરસાદી પરિસ્થિતિનો સામનો કરવા માટે સજ્જ બન્યું છે.