નવસારીમાં પૂર્ણા, અંબિકા નદીનું રૌદ્ર સ્વરૂપ, 500 ઘરોમાં ઘૂસ્યા પાણી

દક્ષિણ ગુજરાતમાં અતિભારે વરસાદે તબાહી મચાવી છે. નવસારી અને સુરત જિલ્લામાં નદીઓમાં આવેલા પૂરને કારણે અનેક નીચાણવાળા વિસ્તારો પાણીમાં ગરકાવ થઈ ગયા છે.

દક્ષિણ ગુજરાતમાં અતિભારે વરસાદે તબાહી મચાવી છે

દક્ષિણ ગુજરાતમાં અતિભારે વરસાદે તબાહી મચાવી છે. નવસારી અને સુરત જિલ્લામાં નદીઓમાં આવેલા પૂરને કારણે અનેક નીચાણવાળા વિસ્તારો પાણીમાં ગરકાવ થઈ ગયા છે. હજારો લોકોને સુરક્ષિત સ્થળે ખસેડવાની ફરજ પડી છે જ્યારે અનેક ઘરો અને દુકાનોમાં પાણી ઘૂસતાં ભારે નુકસાન થયું છે. નવસારીમાં પૂરના ધસમસતા પ્રવાહમાંથી કારચાલકનું દિલધડક રેસ્ક્યૂ કરવામાં આવ્યું, જ્યારે સુરતમાં છેલ્લા બે દિવસમાં વરસાદ સંબંધિત વિવિધ અકસ્માતોમાં 9 લોકોના મોત થયા છે.

નવસારીમાં 24 કલાકમાં 15.28 ઈંચ વરસાદ વરસતાં શહેર અને આસપાસના વિસ્તારોમાં જળબંબાકાર સર્જાયો છે. કાશીવાડી વિસ્તારમાં લગભગ 500 ઘરોમાં પૂર્ણા નદીના પાણી ઘૂસી જતાં લોકોની ઘરવખરીને ભારે નુકસાન થયું છે. અનેક પરિવારોને આખી રાત પાણી વચ્ચે પસાર કરવી પડી હતી. સ્થિતિને ધ્યાનમાં રાખીને મહાનગરપાલિકાએ અસરગ્રસ્તો માટે ભોજનની વ્યવસ્થા કરી છે.

ગઈકાલે પૂર્ણા નદીની સપાટી 27 ફૂટ સુધી પહોંચી હતી, જ્યારે હાલમાં તે આશરે 25 ફૂટ પર સ્થિર હોવાનું જણાવાયું છે. શહેરના અનેક વિસ્તારો, સોસાયટીઓ અને વેપારી વિસ્તારોમાં પાણી ફરી વળતાં જનજીવન અસ્તવ્યસ્ત બન્યું છે. જલાલપોર તાલુકામાં પણ 24 કલાકમાં 11.20 ઈંચ વરસાદ નોંધાયો છે.

ઉપરવાસમાં ભારે વરસાદને કારણે અંબિકા નદીના જળસ્તરમાં સતત વધારો નોંધાઈ રહ્યો છે. બીલીમોરામાંથી પસાર થતી અંબિકા નદી બંને કાંઠે વહેતી જોવા મળી રહી છે. નદીની સપાટી 23થી 25 ફૂટ સુધી પહોંચતાં પ્રશાસને નદી કાંઠાના ગામોને એલર્ટ જાહેર કર્યું છે. ગણદેવી તાલુકાના દેવધા ગામમાં નદીનું પાણી પ્રવેશવાની શરૂઆત થઈ ગઈ છે. ગામના મંદિર પરિસર સહિત અનેક વિસ્તારોમાં પાણી ભરાતાં લોકોને સુરક્ષિત સ્થળે જવા અપીલ કરવામાં આવી છે. પ્રશાસને લોકોને ડેમ અને નદી કાંઠાથી દૂર રહેવાની પણ સૂચના આપી છે.

નવસારીથી ખારેલ તરફ જઈ રહેલી એક એર્ટિગા કાર અચાનક પૂરના પાણીમાં ફસાઈ ગઈ હતી. પાણીનો પ્રવાહ એટલો તેજ હતો કે કાર તણાવા લાગી હતી. ઘટનાની જાણ થતાં ગણદેવી ફાયર વિભાગની ટીમ તાત્કાલિક સ્થળ પર પહોંચી હતી. ફાયર ફાઇટરોએ ભારે જહેમત બાદ કારમા ફસાયેલા ચાલકને સુરક્ષિત રીતે બહાર કાઢ્યો હતો.

Continues below advertisement