ભારે વરસાદની આગાહી: ભારતમાં એકસાથે 4 ચક્રવાતી સિસ્ટમ સક્રિય, ગુજરાત સહિત આ રાજ્યોમાં માવઠું તરખાટ મચાવશે

દેશના મોટાભાગના રાજ્યોમાં વરસાદ, વાવાઝોડા અને કરા પડવાની આગાહી; પવનની ગતિ 50 થી 70 કિલોમીટર પ્રતિ કલાક સુધી પહોંચી શકે છે.

દેશભરમાં હવામાનનો મિજાજ અચાનક બદલાવા જઈ રહ્યો છે. અત્યારે દેશમાં એકસાથે 4 ચક્રવાતી પરિભ્રમણ (Cyclonic Circulations) અને એક પશ્ચિમી વિક્ષેપ (Western Disturbance) સક્રિય થયા છે. આ સિસ્ટમ્સની અસરને કારણે દેશના મોટાભાગના રાજ્યોમાં ભારે વરસાદ, ગાજવીજ સાથે વાવાઝોડું અને કરા પડવાની ચેતવણી હવામાન વિભાગ દ્વારા જારી કરવામાં આવી છે. આગામી કેટલાક દિવસો સુધી પવનની ગતિ 50 થી 70 કિલોમીટર પ્રતિ કલાક સુધી રહી શકે છે, જેનાથી જનજીવન પ્રભાવિત થવાની પૂરી શક્યતા છે.

હવામાન વિભાગના જણાવ્યા અનુસાર, હાલમાં મધ્ય પાકિસ્તાન અને તેની આસપાસના વિસ્તારોમાં એક પશ્ચિમી વિક્ષેપ સક્રિય છે. આ ઉપરાંત પંજાબ, છત્તીસગઢ અને આંધ્રપ્રદેશના દક્ષિણ દરિયાકાંઠાના વિસ્તારો પર નીચલા સ્તરનું ચક્રવાતી પરિભ્રમણ બનેલું છે. આટલું જ નહીં, 7 એપ્રિલથી વધુ એક નવી સિસ્ટમ ઉત્તર-પશ્ચિમ ભારતને પ્રભાવિત કરશે.

આ સિસ્ટમ્સની અસર હેઠળ હિમાચલ પ્રદેશ, ઉત્તરાખંડ, પંજાબ, હરિયાણા, ચંદીગઢ, દિલ્હી, ઉત્તર પ્રદેશ અને રાજસ્થાનમાં હળવાથી મધ્યમ વરસાદની સંભાવના છે. અહીં 30 થી 50 કિમી (જે વધીને 60 કિમી સુધી જઈ શકે છે) પ્રતિ કલાકની ઝડપે ભારે પવન ફૂંકાશે અને ગાજવીજ જોવા મળશે. 7 થી 10 એપ્રિલ દરમિયાન જમ્મુ અને કાશ્મીર, લદ્દાખ, હિમાચલ પ્રદેશ અને ઉત્તરાખંડમાં વરસાદ અને હિમવર્ષાનો નવો રાઉન્ડ શરૂ થશે. આ પહાડી વિસ્તારોમાં 50 થી 70 કિમીની ઝડપે પવન ફૂંકાઈ શકે છે, સાથે જ કરા અને ભારે વરસાદ ખાબકવાની પણ શક્યતા છે. ખાસ કરીને 4 એપ્રિલે જમ્મુ અને કાશ્મીરમાં ભારે વરસાદનું એલર્ટ અપાયું છે.