Surat Rain: સુરતમાં ગ્રાઉન્ડ ફ્લોરની દુકાનોમાં ભરાયા પાણી, વેપારીઓને કરોડોનું નુકસાન

Surat Rain: સુરતમાં સતત વરસી રહેલા અતિભારે વરસાદે સમગ્ર શહેરને પાણીમાં ગરકાવ કરી દીધું છે. કાપડ બજાર, વેપારી વિસ્તારો, રહેણાંક સોસાયટીઓ પાણીમાં ડૂબી જતાં જનજીવન સંપૂર્ણપણે પ્રભાવિત બન્યું છે.

વેપારીઓને કરોડો રૂપિયાનું નુકસાન થયું છે

સુરતમાં સતત વરસી રહેલા અતિભારે વરસાદે સમગ્ર શહેરને પાણીમાં ગરકાવ કરી દીધું છે. કાપડ બજાર, વેપારી વિસ્તારો, રહેણાંક સોસાયટીઓ અને મુખ્ય માર્ગો વરસાદી પાણીમાં ડૂબી જતાં જનજીવન સંપૂર્ણપણે પ્રભાવિત બન્યું છે. વેપારીઓને કરોડો રૂપિયાનું નુકસાન થયું છે, જ્યારે અનેક પરિવારો ઘરોમાં જ ફસાઈ ગયા છે. છેલ્લા 36 કલાકમાં 18 ઈંચથી વધુ વરસાદ વરસ્યો હતો.

સતત વરસાદ અને પાણી ભરાવાની સ્થિતિને ધ્યાનમાં રાખીને સુરત શહેરની તમામ ટેક્સટાઈલ માર્કેટ આજે બંધ રાખવાનો નિર્ણય લેવામાં આવ્યો છે. રઘુકુળ ટેક્સટાઈલ માર્કેટના ગ્રાઉન્ડ ફ્લોરમાં વરસાદી પાણી ઘૂસી જતાં અનેક દુકાનો પાણીમાં ગરકાવ થઈ ગઈ છે. જે.ડી. માર્કેટ સહિત અનેક માર્કેટના ગ્રાઉન્ડ ફ્લોર પર આવેલી દુકાનોમાં પાણી ભરાતાં વેપારીઓને કરોડો રૂપિયાનું નુકસાન વેઠવાનો વારો આવ્યો છે. કિંમતી કાપડ અને અન્ય માલસામાન પાણીમાં પલળી જતાં વેપારીઓમાં ચિંતાનું વાતાવરણ જોવા મળી રહ્યું છે.

વરાછા વિસ્તારની પંચવટી માર્કેટમાં ભારે વરસાદને કારણે અનાજ અને કાપડની દુકાનોમાં પાણી ઘૂસી જતાં વેપારીઓ મુશ્કેલીમાં મુકાઈ ગયા છે. દુકાનોમાં પાણી ભરાતા અનેક વેપારીઓને આખી રાત માર્કેટમાં જ રોકાઈ રહેવું પડ્યું હતું. મોટર પંપની મદદથી દુકાનોમાંથી પાણી બહાર કાઢવાના પ્રયાસો કરવામાં આવી રહ્યા છે, પરંતુ સતત વરસાદને કારણે સ્થિતિ કાબૂમાં આવતી નથી. વેપારીઓનું કહેવું છે કે વરસાદે શહેરની વેપાર વ્યવસ્થાને ભારે ફટકો પહોંચાડ્યો છે.

વરાછાની પોદ્દાર આર્કેડમાં સૌથી ગંભીર સ્થિતિ જોવા મળી છે. ગઈકાલે ગ્રાઉન્ડ ફ્લોર સંપૂર્ણપણે પાણીમાં ગરકાવ થઈ જતાં 100થી વધુ દુકાનોમાં વરસાદી પાણી ઘૂસી ગયા હતા. મોબાઈલ અને ઈલેક્ટ્રિક ગેજેટ્સ સહિતના લાખો રૂપિયાના માલસામાનને ભારે નુકસાન થયું છે. વેપારીઓના જણાવ્યા મુજબ એક-એક દુકાનમાં અંદાજે 50 લાખથી એક કરોડ રૂપિયાનો માલસામાન હતો. આ ઘટનાને લઈને વેપારીઓએ સુરત મહાનગરપાલિકા સામે ભારે આક્રોશ વ્યક્ત કર્યો છે. વેપારીઓનો આરોપ છે કે મુશ્કેલીની ઘડીમાં મનપાના અધિકારીઓ અને પદાધિકારીઓએ ફોન પણ ઉપાડ્યા નહોતા. હાલની સ્થિતિ સામાન્ય બનવામાં ચાર મહિના જેટલો સમય લાગી શકે તેવી આશંકા વેપારીઓએ વ્યક્ત કરી છે.

ભારે વરસાદ બાદ સુરતની મીઠી ખાડીમાં પૂર જેવી સ્થિતિ સર્જાઈ છે. પ્રથમ વખત મીઠીખાડી બ્રિજ પાણીમાં ગરકાવ થઈ ગયો છે. મીઠી ખાડી અને લિંબાયત વિસ્તારના અનેક ઘરોમાં વરસાદી પાણી ઘૂસી જતાં લોકો મુશ્કેલીમાં મુકાયા છે. અનેક સોસાયટીના રહેવાસીઓ પાણી વચ્ચે ફસાઈ જતા રાહત અને બચાવ કામગીરી પર નજર રાખવામાં આવી રહી છે.

સુરત જિલ્લાના કામરેજ અને પલસાણા તાલુકામાં મેઘતાંડવ જોવા મળ્યું છે. ભારે વરસાદને કારણે અનેક વિસ્તારોમાં 'જમીન ત્યાં જળ' જેવી સ્થિતિ સર્જાઈ છે. ઓલપાડ તાલુકાના કુડસદ ગામમાં પણ જળબંબાકાર સર્જાયો છે. કીમ પૂર્વ વિસ્તારમાં પાણી ભરાઈ જતાં જનજીવન પ્રભાવિત બન્યું છે. કીમ ગામની શિવ સાઈ રેસિડેન્સી સહિત અનેક રહેણાંક વિસ્તારો ચારેબાજુ પાણીથી ઘેરાઈ જતાં સ્થાનિકોમાં ચિંતાનો માહોલ જોવા મળી રહ્યો છે.