આઈસીસીએ જાહેર કરી ટી-20 વિશ્વ કપની સર્વશ્રેષ્ઠ ટીમ, 4 ભારતીયોને મળ્યું સ્થાન, સૂર્યા…

આઈસીસી દ્વારા ટી-20 વિશ્વ કપ 2026 ની સર્વશ્રેષ્ઠ ટીમ જાહેર કરવામાં આવી છે. આ ટીમમાં 4 ભારતીય ખેલાડીઓને સ્થાન મળ્યું છે, પરંતુ કપ્તાન સૂર્યાને પડતો મુકાયો છે.

ICC T20 World Cup 2026 Team of the Tournament

Source : सोशल मीडिया

Show Quick Read

Key points generated by AI, verified by newsroom

• ભારતે ટી-20 વિશ્વ કપ 2026 જીત્યો, ICCએ શ્રેષ્ઠ ટીમ જાહેર કરી.
• ચાર ભારતીયો સંજુ સેમસન, ઈશાન કિશન, બુમરાહ, હાર્દિક પંડ્યાને મળ્યો મોકો.
• કેપ્ટન સૂર્યકુમાર યાદવ અને અભિષેક શર્માને ટીમમાં સ્થાન ન મળતા ચાહકો નારાજ.
• પાકિસ્તાન, ઈંગ્લેન્ડ, ઝિમ્બાબ્વે, દક્ષિણ આફ્રિકા, વેસ્ટ ઈન્ડિઝના ખેલાડીઓ પણ ટીમમાં.

ભારતીય ક્રિકેટ ટીમે તાજેતરમાં જ રમાયેલી રોમાંચક અંતિમ મેચમાં ન્યુઝીલેન્ડને 96 રનથી કારમી હાર આપીને સળંગ બીજી વાર ટી-20 વિશ્વ કપ 2026 નો ખિતાબ પોતાના નામે કર્યો છે. આ ભવ્ય જીત બાદ તરત જ આંતરરાષ્ટ્રીય ક્રિકેટ કાઉન્સિલ (આઈસીસી) દ્વારા આખી સ્પર્ધામાં જોરદાર પ્રદર્શન કરનારા ખેલાડીઓની એક સર્વશ્રેષ્ઠ ટીમ જાહેર કરવામાં આવી છે. ખેલાડીઓના વ્યક્તિગત પ્રદર્શનના આધારે આ 11 ખેલાડીઓની પસંદગી કરવામાં આવી છે. આ ટીમમાં દુનિયાભરના દિગ્ગજ ખેલાડીઓ વચ્ચે 4 ભારતીય ખેલાડીઓએ ડંકો વગાડીને પોતાનું સ્થાન પાકું કર્યું છે. જોકે, આખા ગુજરાત અને દેશના ક્રિકેટ પ્રેમીઓ માટે નવાઈની વાત એ છે કે ભારતને વિશ્વ વિજેતા બનાવનાર કપ્તાન સૂર્યકુમાર યાદવને આ ટીમમાં ક્યાંય જગ્યા મળી નથી.

કયા 4 ભારતીયોને મળ્યો મોકો? 

આ સ્પર્ધામાં પોતાની કાબેલિયત સાબિત કરનાર આપણા 4 ધુરંધર ખેલાડીઓએ આંતરરાષ્ટ્રીય સ્તરની આ ખાસ ટીમમાં જગ્યા બનાવી છે. જેમાં સલામી બેટ્સમેન તરીકે શાનદાર ફોર્મમાં ચાલી રહેલા સંજુ સેમસનની પસંદગી થઈ છે. જ્યારે ત્રીજા ક્રમે બેટિંગ કરવા માટે તોફાની રમત રમનાર ઈશાન કિશનને લેવામાં આવ્યો છે. ઈશાન આખી સ્પર્ધામાં સૌથી વધુ રન ફટકારવામાં ચોથા નંબરે રહ્યો હતો અને તેણે અનેક મેચોમાં ટીમને મુશ્કેલીમાંથી બહાર કાઢી હતી. આ ઉપરાંત, પોતાની આગ ઝરતી ગોલંદાજીથી વિરોધી ટીમના બેટ્સમેનોના પરસેવા છોડાવી દેનાર આપણા ઘાતક બોલર જસપ્રીત બુમરાહ અને બેટ તેમજ દડા બંનેથી કમાલ કરનાર ઓલરાઉન્ડર હાર્દિક પંડ્યાને પણ આ 11 સભ્યોની ટીમમાં ગર્વભેર સામેલ કરવામાં આવ્યા છે. આ 4 ખેલાડીઓએ ભારતને 2026 નો ચેમ્પિયન બનાવવામાં સૌથી મોટો અને મહત્વનો ફાળો આપ્યો હતો.

સૂર્યા અને અભિષેકની બાદબાકીથી ચાહકો નારાજ 

આ ટીમ જાહેર થતા જ સોશિયલ મીડિયા પર ભારતીય ચાહકોમાં ભારે નારાજગી અને નિરાશા જોવા મળી રહી છે. લોકો સવાલ ઉઠાવી રહ્યા છે કે જે કપ્તાનના શાનદાર નેતૃત્વમાં ભારતે આટલો મોટો ખિતાબ જીત્યો, તેવા સૂર્યકુમાર યાદવને આ ટીમમાંથી સાવ પડતો કેમ મુકવામાં આવ્યો? આ સાથે જ યુવા અને આક્રમક ખેલાડી અભિષેક શર્માને પણ નજરઅંદાજ કરવામાં આવ્યો છે, જેણે આખી સ્પર્ધામાં સારી છાપ છોડી હતી. આઈસીસીએ ભારતની જગ્યાએ દક્ષિણ આફ્રિકાના કપ્તાન એડન માર્કરામને આ સર્વશ્રેષ્ઠ ટીમનો કેપ્ટન બનાવ્યો છે.

અન્ય દેશોના કયા ખેલાડીઓ છે સામેલ? 

આંતરરાષ્ટ્રીય ક્રિકેટ કાઉન્સિલની આ ટીમમાં પાકિસ્તાનના સાહિબજાદા ફરહાનને સંજુ સેમસન સાથે સલામી બેટ્સમેન તરીકે રાખવામાં આવ્યો છે. ફરહાન આ સ્પર્ધામાં સૌથી વધુ રન બનાવનાર બેટ્સમેન હતો. આ ઉપરાંત ઇંગ્લેન્ડના વિલ જેક્સ અને ફિરકી ગોલંદાજ આદિલ રશીદને પણ તક મળી છે. વિલ જેક્સે ઇંગ્લેન્ડને ઉપાંત્ય ફેરી (સેમીફાઈનલ) સુધી પહોંચાડવામાં મોટી ભૂમિકા ભજવી હતી. ઝિમ્બાબ્વેના ફાસ્ટ બોલર બ્લેસિંગ મુઝારાબાનીએ પોતાના કમાલના પ્રદર્શનથી સૌના દિલ જીતી લીધા હોવાથી તેને પણ ટીમમાં લેવાયો છે. દક્ષિણ આફ્રિકાના લુંગી ન્ગીડી અને વેસ્ટ ઇન્ડીઝના જેસન હોલ્ડર પણ આ ટીમનો હિસ્સો છે. જેસન હોલ્ડરે 7 મેચ રમીને 10 વિકેટો ઝડપી હતી. જ્યારે 12મા ખેલાડી તરીકે અમેરિકાના શેડલી શાન શાલ્કવિકની પસંદગી કરવામાં આવી છે, જેણે શરૂઆતની મેચોમાં બહુ જ સારી બોલિંગ કરી હતી.

આખી ટીમ પર એક નજર: સાહિબજાદા ફરહાન, સંજુ સેમસન (વિકેટકીપર), ઇશાન કિશન, એડન માર્કરામ (કપ્તાન), હાર્દિક પંડ્યા, વિલ જેક્સ, જેસન હોલ્ડર, જસપ્રીત બુમરાહ, લુંગી ન્ગીડી, આદિલ રશીદ, બ્લેસિંગ મુઝારાબાની અને 12મો ખેલાડી શેડલી શેન શાલ્કવિક.

આ પણ વાંચો

T20 WC: ટીમ ઇન્ડિયાને ₹27 કરોડ, પણ સંજુ સેમસન પર થયો અલગથી પૈસાનો વરસાદ!