Team India For 2027 ODI World Cup: વર્ષ 2026 ના છેલ્લા 6 મહિનામાં ભારતીય ટીમે ઘણી બધી મેચો રમવાની છે. આગામી વર્ષે દક્ષિણ આફ્રિકા, ઝિમ્બાબ્વે અને નામિબિયાની યજમાનીમાં 2027 વનડે વર્લ્ડ કપ રમાવાનો છે, તેની તૈયારી માટે ટીમ ઇન્ડિયાએ વર્ષ 2026 માં જુલાઈથી ડિસેમ્બર સુધી ચાર વનડે સિરીઝ રમવાની છે.
ભારતીય ટીમ આગામી 6 મહિનાની અંદર 14 વનડે મેચ રમશે, જેમાં સ્વાભાવિક રીતે જ નવા ખેલાડીઓની પણ કસોટી કરવામાં આવશે. અફઘાનિસ્તાન સામેની તાજેતરની વનડે સિરીઝમાં ગુરનૂર બ્રાર, હર્ષ દુબે અને પ્રિન્સ યાદવે પણ પોતપોતાની ડેબ્યૂ મેચોમાં પ્રભાવિત કર્યા છે. નવા ખેલાડીઓને પરખવાનો આ તબક્કો ચાલુ રહેશે, પરંતુ એવા કયા ખેલાડીઓ છે, જેમનું 2027 વર્લ્ડ કપની પ્લેઇંગ ઇલેવનમાં રમવાનું નક્કી છે? એવા ખેલાડીઓ, જેમનું ટીમની બહાર થવું અશક્ય છે.
આ પણ વાંચો..."ગંભીરને હટાવો, ધોનીને લાવો", શ્રીસંતના નિવેદનથી મચ્યો હોબાળો; જાણો બીજુ શું કહ્યું
આ 8 ખેલાડીઓનું રમવાનું પાકું છે
- શુભમન ગિલ (કેપ્ટન): આ યાદીમાં સૌથી પહેલું નામ કેપ્ટન શુભમન ગિલનું છે, જે 2027 વનડે વર્લ્ડ કપમાં ટીમ ઇન્ડિયાનું નેતૃત્વ કરતા જોવા મળશે.
- રોહિત શર્મા અને વિરાટ કોહલી: અત્યાર સુધીના ફોર્મને આધાર માનીએ તો વિરાટ કોહલી અને રોહિત શર્માનું રમવું પણ લગભગ નક્કી જ જણાય છે. આનો અર્થ એ થયો કે ગિલ, રોહિત અને કોહલીની આ ત્રિપુટી ટોપ ઓર્ડર સંભાળશે.
- શ્રેયસ અય્યર: વનડે ટીમના વાઇસ કેપ્ટન શ્રેયસ અય્યરે નંબર-4 ની જવાબદારી ખૂબ જ સારી રીતે સંભાળી છે. અય્યર 243 રન બનાવીને ચેમ્પિયન્સ ટ્રોફી 2025 માં ભારત માટે ટોપ સ્કોરર રહ્યો હતો.
- કેએલ રાહુલ: વનડેમાં પાંચમા ક્રમે 63.21 ની બેટિંગ એવરેજ ધરાવતો કેએલ રાહુલ ચોક્કસપણે વર્લ્ડ કપમાં પણ નંબર-5 પર બેટિંગ કરશે.
- હાર્દિક પંડ્યા: જો હાર્દિક પંડ્યા ફિટ રહેશે તો તે નંબર-6 પર બેટિંગની સાથે સાથે બોલિંગમાં પણ યોગદાન આપશે. હાર્દિકનું રમવું એટલા માટે પણ નક્કી લાગી રહ્યું છે કારણ કે તે ટીમનો સૌથી અનુભવી ફાસ્ટ બોલિંગ ઓલરાઉન્ડર છે.
- જસપ્રિત બુમરાહ: બોલિંગમાં જસપ્રિત બુમરાહ ટીમની બોલિંગ એટેકનું નેતૃત્વ કરી રહ્યો હશે.
- હર્ષિત રાણા: આ યાદીમાં આઠમું નામ હર્ષિત રાણાનું છે, જેના પર છેલ્લા એક-દોઢ વર્ષમાં ટીમ મેનેજમેન્ટે ઘણો ભરોસો દર્શાવ્યો છે.
બાકીના સ્થાન માટેની રેસ:
બાકીના 3 સ્પોટ (જગ્યા) ને લઈને હજુ કોઈ નિશ્ચિતતા નથી. કુલદીપ યાદવ, મોહમ્મદ સિરાજ, પ્રસિદ્ધ કૃષ્ણા, યશસ્વી જયસ્વાલ, ઋષભ પંત, અર્શદીપ સિંહ, વોશિંગ્ટન સુંદર અને વરુણ ચક્રવર્તી સહિત એવા ઘણા ખેલાડીઓ છે, જેમને સ્ક્વોડમાં સામેલ કરવા પર પસંદગીકારો ચોક્કસપણે વિચાર કરી શકે છે.