દુબઈમાં રમાયેલી એશિયા કપની સુપર-4 મેચ ભારત માટે સંપૂર્ણ વિજય હતો. ટીમ ઈન્ડિયાએ રવિવારે પાકિસ્તાન સામે 172 રનનો લક્ષ્યાંક હાંસલ કર્યો, જેમાં માત્ર 18.5 ઓવરમાં જ શાનદાર વિજય મેળવ્યો હતો. આ જીતનો હીરો અભિષેક શર્મા (74 રન, 39 બોલ) અને શુભમન ગિલ (47 રન, 28 બોલ) હતા, જેમની જોડીએ માત્ર 49 બોલમાં પ્રથમ વિકેટ માટે 105 રન ઉમેર્યા અને મેચનું પરિણામ પલટ્યું હતું. અભિષેકે પોતાની ઇનિંગમાં 5 છગ્ગા અને 6 ચોગ્ગા ફટકાર્યા હતા.
મેચ પછી પ્રેઝન્ટેશન સેરેમની દરમિયાન પ્લેયર ઓફ ધ મેચ અભિષેક શર્માએ કહ્યું હતું કે, "આજે બધું ખૂબ સરળ હતું. તેઓ જે રીતે કોઈ કારણ વગર અમને ઉશ્કેરી રહ્યા હતા તે મને ગમ્યું નહીં. એટલા માટે મેં તેમની સામે આક્રમક બેટિંગ કરી હતી. મારો ઉદ્દેશ્ય ટીમ માટે પ્રદર્શન કરવાનો હતો. અમે (ગિલ અને અભિષેક) સ્કૂલથી જ સાથે રમી રહ્યા છીએ અને એકબીજાની કંપનીનો આનંદ માણીએ છીએ. આજે અમે દૃઢ નિશ્ચયી હતા અને અમે તે કર્યું. ગિલ જે રીતે પ્રતિક્રિયા આપે છે તે મને ખરેખર ગમ્યું." જ્યારે તમે કોઈને આ રીતે રમતા જુઓ છો ત્યારે તે મારો ઇરાદો હોય છે. હું ખૂબ જ સખત પ્રેક્ટિસ કરી રહ્યો છું અને જો મારો દિવસ હશે તો હું ચોક્કસપણે મારી ટીમને જીત અપાવીશ.
વાસ્તવમાં જ્યારે ભારતીય ટીમ પાકિસ્તાની બોલરોને ધોઈ રહી હતી ત્યારે પાકિસ્તાની ખેલાડીઓ ઉશ્કેરાઈ ગયા હતા. જ્યારે ઝડપી બોલર હરિસ રઉફ પાંચમી ઓવર કરવા આવ્યો ત્યારે અભિષેકે તેને ચોગ્ગો ફટકાર્યો, જેના કારણે તે ઉશ્કેરાઈ ગયો હતો. જેનો અભિષેકે વળતો જવાબ આપ્યો, જેના કારણે બંને વચ્ચે દલીલ થઈ હતી. અમ્પાયરે દરમિયાનગીરી કરવી પડી હતી.
જ્યારે ભારતે કેટલીક ફિલ્ડિંગમાં ભૂલો કરી અને બોલિંગમાં સામાન્ય પ્રદર્શન કર્યું, પરંતુ ભારતની બેટિંગે ટીમને જીત અપાવી હતી. આ જીત સાથે સૂર્યકુમાર યાદવની ટીમે તેમના સુપર 4 અભિયાનની મજબૂત શરૂઆત કરી છે. ભારત હવે તેમની આગામી મેચમાં બાંગ્લાદેશનો સામનો કરશે અને ટીમ પાસે આ મેચ માટે બે દિવસનો વિરામ છે. બીજી બાજુ, પાકિસ્તાનને શ્રીલંકાનો સામનો કરતા પહેલા માત્ર એક દિવસનો વિરામ મળ્યો છે, જેણે તેમની પ્રથમ સુપર 4 મેચ હારી હતી.