IND vs NAM: શું નામિબિયા સામે ટીમ ઈન્ડિયાની પ્લેઈંગ 11માં થશે મોટો ફેરફાર? આ સ્ટાર ઓપનરના રમવા પર સસ્પેન્સ
T20 World Cup 2026: ભારતીય ક્રિકેટ ટીમ 12 ફેબ્રુઆરીએ T20 વર્લ્ડ કપ 2026માં નામિબિયા સામે ટકરાશે. આ મેચમાં ટીમ ઈન્ડિયાની પ્લેઈંગ ઈલેવનમાં ફેરફાર જોવા મળી શકે છે.
Team India Playing XI: ICC T20 વર્લ્ડ કપ 2026 માં ટીમ ઈન્ડિયા 12 ફેબ્રુઆરીએ દિલ્હીના અરુણ જેટલી સ્ટેડિયમમાં ગ્રુપ-A ના મુકાબલામાં નામિબિયા સામે ટકરાશે. સૂર્યકુમાર યાદવની આગેવાની હેઠળની ભારતીય ટીમ ટુર્નામેન્ટમાં સતત બીજી જીત નોંધાવવાનો પ્રયાસ કરશે. ખાસ વાત એ છે કે આ મેચના માત્ર ત્રણ દિવસ બાદ ભારતે કોલંબોમાં કટ્ટર હરીફ પાકિસ્તાન સામે લડવાનું છે, તેથી ટીમ કોમ્બિનેશનની દૃષ્ટિએ આ મુકાબલો અત્યંત મહત્વનો માનવામાં આવી રહ્યો છે. ભારતે 7 ફેબ્રુઆરીએ રમાયેલી તેની પ્રથમ મેચમાં અમેરિકાને 29 રનથી હરાવ્યું હતું. તે મેચમાં ભારતીય ટીમ 77/6 ના સ્કોર પર મુશ્કેલીમાં ફસાઈ ગઈ હતી, પરંતુ કેપ્ટન સૂર્યકુમાર યાદવે અણનમ 84 રનની કેપ્ટનશીપ ઇનિંગ રમીને ટીમને 161/9 સુધી પહોંચાડી હતી. ત્યારબાદ બોલરોએ શાનદાર પ્રદર્શન કરીને અમેરિકાને 132/8 પર રોકી દીધું હતું.
ભારતીય છાવણીમાં ટેન્શન
નામિબિયા સામેની મેચ પહેલા ટીમ ઈન્ડિયા સામે ખેલાડીઓની ફિટનેસને લઈને સમસ્યા ઊભી થઈ છે. ઓપનર અભિષેક શર્મા પેટના ચેપ (ઇન્ફેક્શન) ને કારણે દિલ્હીમાં હોસ્પિટલમાં દાખલ થયો હતો, જેના કારણે તેના રમવા પર શંકા સેવાઈ રહી છે. જોકે તિલક વર્માએ પ્રી-મેચ પ્રેસ કોન્ફરન્સમાં જણાવ્યું હતું કે અભિષેકને હોસ્પિટલમાંથી રજા મળી ગઈ છે અને તેની હાલતમાં સુધારો છે. અંતિમ નિર્ણય મેચ પહેલા લેવામાં આવશે. પાકિસ્તાન સામેની હાઈ-વોલ્ટેજ મેચને જોતા ટીમ ઈન્ડિયા અભિષેકને લઈને કોઈ ઉતાવળ કરવા માંગશે નહીં.
જો અભિષેક નહીં રમે તો સંજુ સેમસન માટે પ્લેઈંગ ઈલેવનના દરવાજા ખુલી શકે છે. જોકે, તાજેતરમાં ન્યુઝીલેન્ડ સામેની પાંચ T20 મેચોમાં સેમસન માત્ર 46 રન જ બનાવી શક્યો હતો, જે ચિંતાનો વિષય છે. અમેરિકા સામેની પ્રથમ મેચમાં ઈશાન કિશનને તક મળી હતી. જો સેમસનને નામિબિયા સામે તક મળે છે, તો તેના માટે ટીકાકારોને જવાબ આપવાની આ શ્રેષ્ઠ તક હશે.
બુમરાહની વાપસી નક્કી?
ઝડપી બોલર જસપ્રીત બુમરાહની વાપસી પણ લગભગ નક્કી માનવામાં આવી રહી છે. તે વાયરલ ફીવરના કારણે USA સામે રમ્યો ન હતો, પરંતુ હવે પ્રેક્ટિસ સેશન દરમિયાન સંપૂર્ણ ફિટ દેખાઈ રહ્યો છે. આસિસ્ટન્ટ કોચ રયાન ટેન ડોશેટે જણાવ્યું કે બુમરાહ 10 દિવસના બ્રેક બાદ બોલિંગ કરી રહ્યો છે અને સારું અનુભવી રહ્યો છે. તેની વાપસીથી મોહમ્મદ સિરાજને બહાર બેસવું પડી શકે છે, જેણે ગત મેચમાં 29 રન આપીને 3 વિકેટનું સારું પ્રદર્શન કર્યું હતું. સ્પિન વિભાગમાં વરુણ ચક્રવર્તીને તક મળવાની શક્યતા છે. જોકે વોશિંગ્ટન સુંદર પણ ટીમ સાથે જોડાઈ ગયો છે, પરંતુ તેના નામિબિયા સામેની મેચમાં રમવાની શક્યતા ઓછી છે.
નામિબિયા સામે ભારતની સંભવિત પ્લેઈંગ 11: ઈશાન કિશન, સંજુ સેમસન, સૂર્યકુમાર યાદવ (કેપ્ટન), તિલક વર્મા, રિંકુ સિંહ, શિવમ દુબે, હાર્દિક પંડ્યા, અક્ષર પટેલ, અર્શદીપ સિંહ, જસપ્રીત બુમરાહ, વરુણ ચક્રવર્તી.
ટોપ સ્ટોરી
ટ્રેન્ડિંગ સમાચાર
