BCCI Domestic Season 2026-27: ભારતીય ક્રિકેટ કંટ્રોલ બોર્ડ (BCCI) એ દેશના ઘરેલુ ક્રિકેટ માળખામાં એક મોટો ફેરફાર કર્યો છે. ક્રિકેટ ચાહકો માટે મોટા સમાચાર એ છે કે ભારતની લોકપ્રિય સ્થાનિક અંડર-23 મેન્સ ODI (વનડે) ટુર્નામેન્ટ હવેથી T20 ફોર્મેટમાં રમાડવામાં આવશે. આ સાથે જ બોર્ડે આગામી 2026-27 સીઝન માટે રણજી ટ્રોફી, દુલીપ ટ્રોફી અને ઈરાની કપ સહિત કુલ 1788 મેચોનું આખું કેલેન્ડર જાહેર કરી દીધું છે. ચાલો સરળ ભાષામાં સમજીએ કે આ નવી સિઝનમાં શું-શું ફેરફારો થયા છે અને કઈ મહત્વની ઘરેલુ ટુર્નામેન્ટ ક્યારે રમાવાની છે.
અંડર-23 માં હવે જોવા મળશે ફટાફટ ક્રિકેટ
BCCI દ્વારા બુધવારે કરવામાં આવેલી જાહેરાત મુજબ, આગામી 2026-27 ઘરેલુ સિઝનમાં સૌથી મોટો ફેરફાર અંડર-23 પુરુષોની સ્ટેટ 'A' ટુર્નામેન્ટમાં કરવામાં આવ્યો છે. આ મેચો અગાઉ વનડે (ODI) ફોર્મેટમાં રમાતી હતી, પરંતુ હવે તે 20-20 ઓવરના ફોર્મેટમાં જોવા મળશે. આ સિઝનમાં પુરુષ અને મહિલા બંને વર્ગમાં અલગ-અલગ વય જૂથની કુલ 1788 મેચો રમાવાની છે. સીઝનની શાનદાર શરૂઆત 23 ઓગસ્ટથી 10 સપ્ટેમ્બર વચ્ચે પ્રતિષ્ઠિત 'દુલીપ ટ્રોફી' થી થશે, જે બેંગલુરુના સેન્ટર ઓફ એક્સેલન્સ (COE) ખાતે રમાશે.
ઈરાની કપ જમ્મુ-કાશ્મીરમાં રમાશે
દુલીપ ટ્રોફી બાદ 1 ઓક્ટોબરથી ઈરાની કપનો રોમાંચ શરૂ થશે. ખાસ વાત એ છે કે આ વખતે આ મેચ જમ્મુ અથવા શ્રીનગરમાં રમાવાની છે, કારણ કે જમ્મુ-કાશ્મીરની ટીમ હાલની રણજી ટ્રોફી ચેમ્પિયન છે. આ ઉપરાંત, ઘરેલુ કેલેન્ડરમાં એક જૂની મેચની વાપસી પણ થઈ છે. 'રેસ્ટ ઓફ ઈન્ડિયા' અને 'કર્નલ સીકે નાયડુ ટ્રોફી' ની વિજેતા ટીમ વચ્ચેની મેચ ફરીથી 1 થી 4 ઓક્ટોબર વચ્ચે રમાડવામાં આવશે.
આ પણ વાંચોઃ ક્રિકેટર મોહમ્મદ શમીને મોટી રાહત, કોર્ટે તમામ આરોપોમાંથી કર્યો મુક્ત, પત્નીએ લગાવ્યા હતા આરોપ
રણજી ટ્રોફી અને યુવા ટુર્નામેન્ટનું માળખું
દેશની સૌથી મોટી ઘરેલુ ટુર્નામેન્ટ એટલે કે 'રણજી ટ્રોફી' તેના જૂના બે તબક્કાના ફોર્મેટમાં જ રમાશે. આમાં એલીટ ગ્રુપમાં 32 ટીમો હશે, જેને 4 અલગ-અલગ ગ્રુપમાં વહેંચવામાં આવશે. જ્યારે પ્લેટ ગ્રુપની 6 ટીમો સામાન્ય રીતે હોમ-એન્ડ-અવે ફોર્મેટમાં (એટલે કે પોતાના અને સામેવાળાના મેદાન પર) રમશે. યુવા ખેલાડીઓની તૈયારી માટે કૂચ બિહાર ટ્રોફી (એલીટ ગ્રુપ) ની નોકઆઉટ મેચો સ્પર્ધાત્મક સંતુલન જાળવવા જાન્યુઆરીમાં બેંગલુરુ અને મૈસુરમાં યોજાશે. જ્યારે અંડર-16 ની વિજય મર્ચન્ટ ટ્રોફીને નવેમ્બરથી જાન્યુઆરી વચ્ચે ખસેડવામાં આવી છે.
આ પણ વાંચોઃ અફઘાનિસ્તાન સિરીઝ માટે ટીમ ઈન્ડિયાની જાહેરાત: ગુજરાત ટાઇટન્સના 11 ખેલાડીઓને મળી તક!
સૈયદ મુશ્તાક અલી અને વિજય હજારે ટ્રોફીનું શિડ્યુલ
જો શોર્ટ ફોર્મેટની વાત કરીએ તો, સૈયદ મુશ્તાક અલી ટ્રોફીની એલીટ ગ્રુપ લીગ મેચો 27 સપ્ટેમ્બરથી 10 ઓક્ટોબર સુધી વિશાખાપટ્ટનમ, મુંબઈ, કોલકાતા અને મોહાલી ખાતે રમાશે. તેની નોકઆઉટ મેચો 14 થી 25 ઓક્ટોબર સુધી નાગપુરમાં યોજાશે. બીજી તરફ, વનડે ફોર્મેટની વિજય હજારે ટ્રોફીની એલીટ ગ્રુપ લીગ મેચો 12 નવેમ્બરથી 1 ડિસેમ્બર સુધી અમદાવાદ, બેંગલુરુ, રાંચી અને રાજકોટમાં રમાવાની છે. જ્યારે તેની નોકઆઉટ મેચો 5 થી 17 ડિસેમ્બર વચ્ચે વિશાખાપટ્ટનમમાં રમાશે. પ્લેટ ગ્રુપની નોકઆઉટ મેચો 23 થી 25 નવેમ્બર સુધી ઇન્દોરમાં રમાશે.