rishabh pant delhi capitals trade: તાજેતરમાં IPL 2027 પહેલા એક મોટો ટ્રેડ જોવા મળ્યો છે, જેમાં ઋષભ પંત લખનૌ સુપર જાયન્ટ્સ (LSG) છોડીને ફરીથી પોતાની જૂની ટીમ દિલ્હી કેપિટલ્સ (DC) માં જોડાઈ ગયો છે. આ ડીલની સૌથી વધુ ચર્ચા એટલા માટે થઈ રહી છે કારણ કે પંતે દિલ્હીમાં પાછા આવવા માટે પૂરા 12 કરોડ રૂપિયાનું મોટું નુકસાન સહન કર્યું છે. પરંતુ, ક્રિકેટ જગતમાં આ કંઈ નવો કે સૌથી મોટો કિસ્સો નથી. IPL ના રોમાંચક ઈતિહાસમાં એવા ઘણા ખેલાડીઓ છે જેમણે હરાજીમાં ઋષભ પંત કરતા પણ વધારે કરોડો રૂપિયાનું નુકસાન ભોગવ્યું છે. ચાલો જાણીએ એવા જ કેટલાક સ્ટાર ખેલાડીઓ વિશે જેમની કિંમત હરાજીમાં રાતોરાત ઘટી ગઈ હતી.
પંતનો 12 કરોડના નુકસાનનો સોદો
ઋષભ પંતની વાત કરીએ તો, તેને LSG માં 27 કરોડ રૂપિયાનો તોતિંગ પગાર મળી રહ્યો હતો. પરંતુ, કુલદીપ યાદવ સાથેના ટ્રેડિંગ (અદલાબદલી) માં જ્યારે તે દિલ્હી કેપિટલ્સમાં પાછો ફર્યો, ત્યારે તેનો પગાર ઘટીને 15 કરોડ રૂપિયા થઈ ગયો. આમ, તેને સીધું 12 કરોડનું નુકસાન થયું છે. આ આંકડો મોટો લાગે છે, પણ ખરા કડાકા તો હજુ બીજા ખેલાડીઓને પડ્યા છે.
વેંકટેશ ઐયર: IPL ના ઈતિહાસમાં સૌથી મોટું નુકસાન
જો પૈસા ગુમાવવાની વાત આવે તો તેમાં સૌથી પહેલો નંબર વેંકટેશ ઐયરનો આવે છે.
2025 ની મેગા ઓક્શનમાં કોલકાતા નાઈટ રાઈડર્સ (KKR) એ તેને 23.75 કરોડ રૂપિયાની માતબર રકમ આપીને ખરીદ્યો હતો.
પરંતુ, 2026 ની આઈપીએલ હરાજીમાં તેની કિંમત સાવ તળિયે બેસી ગઈ અને રોયલ ચેલેન્જર્સ બેંગ્લોર (RCB) એ તેને માત્ર 7 કરોડ રૂપિયામાં ખરીદ્યો.
આમ ઐયરને અધધ 16.75 કરોડ રૂપિયાનું જંગી નુકસાન થયું હતું.
આ પણ વાંચોઃ રોહિત શર્માના ભવિષ્ય અને ઓપનિંગ અંગે કેપ્ટન ગિલનું નિવેદન - ‘આ માથાનો દુખાવો...’
સેમ કુરન અને કાયલ જેમીસનની પણ હાલત ખરાબ
આ લિસ્ટમાં બીજો નંબર આવે છે ઇંગ્લેન્ડના ઓલરાઉન્ડર સેમ કુરનનો. 2023-24 ની સીઝનમાં પંજાબ કિંગ્સે તેને 18.50 કરોડ રૂપિયામાં પોતાની ટીમમાં લીધો હતો. પરંતુ, 2025 માં જ્યારે તે ચેન્નઈ સુપર કિંગ્સ (CSK) માં ગયો ત્યારે તેની કિંમત માત્ર 2.40 કરોડ રૂપિયા જ રહી ગઈ. એટલે કે તેને 16.10 કરોડ રૂપિયાનો મોટો ફટકો પડ્યો.
આવી જ કંઈક હાલત ન્યુઝીલેન્ડના કાયલ જેમીસનની પણ થઈ હતી. 2021 માં RCB ફ્રેન્ચાઇઝીએ તેને 15 કરોડ આપ્યા હતા, પરંતુ 2023 માં CSK દ્વારા તેને માત્ર 1 કરોડમાં જ ખરીદવામાં આવ્યો હતો. જોકે, કમનસીબે ઈજાના કારણે જેમીસન એ આખી સીઝનમાંથી જ બહાર થઈ ગયો હતો.
આ પણ વાંચોઃ હાર્દિક પંડ્યા ઇંગ્લેન્ડ સામેની ODI માંથી બહાર, વિરાટ કોહલીની ફિટનેસ પર આવ્યું મોટું અપડેટ
મિશેલ સ્ટાર્ક અને અન્ય દિગ્ગજો પણ બાકાત નથી
ઓસ્ટ્રેલિયાના ખતરનાક બોલર મિશેલ સ્ટાર્કનું નામ પણ આ યાદીમાં છે.
2024 ની સીઝનમાં KKR ને ચેમ્પિયન બનાવવામાં તેનો ખૂબ મોટો ફાળો હતો અને કોલકાતાએ તેને 24.75 કરોડ રૂપિયામાં ખરીદ્યો હતો.
પરંતુ, 2025 ની હરાજીમાં તેની બોલી અડધા કરતા પણ ઓછી એટલે કે 11.75 કરોડ રૂપિયા પર આવી ગઈ હતી.
આ ઉપરાંત, ઝાય રિચાર્ડસનને 12.50 કરોડ અને કેન વિલિયમસનને 12 કરોડ રૂપિયાનું નુકસાન ભોગવવાનો વારો આવ્યો હતો. આ બધા આંકડાઓ જોતા સ્પષ્ટ થાય છે કે IPL ના અનિશ્ચિત માર્કેટમાં ઋષભ પંતનું 12 કરોડનું નુકસાન તો બીજા ખેલાડીઓની સરખામણીમાં કંઈ જ નથી!