કોણ છે ભારત સામે વિસ્ફોટક બેટિંગ કરનાર 22 વર્ષીય Jacob Bethell,જાણો IPL 2026 માં કઈ ટીમ વતી રમશે?
Jacob Bethell: ઇંગ્લેન્ડના યુવા બેટ્સમેન જેકબ બેથેલે T20 વર્લ્ડ કપ 2026 ના બીજા સેમિફાઇનલમાં ટીમ ઇન્ડિયા સામે શાનદાર બેટિંગ કરી હતી. તેણે ધમાકેદાર 105 રન બનાવ્યા હતા, પરંતુ તેની ટીમ હારી ગઈ હતી.
Jacob Bethell: ICC T20 વર્લ્ડ કપ 2026ની બીજી સેમિફાઈનલમાં ઈંગ્લેન્ડને ટીમ ઈન્ડિયા સામે 7 રનથી હારનો સામનો કરવો પડ્યો હતો. આ મેચમાં ઈંગ્લેન્ડ માટે 22 વર્ષના યુવા બેટ્સમેન જેકબ બેથલે શાનદાર બેટિંગ કરી હતી. તેમણે આ મુકાબલામાં 48 બોલમાં 218થી વધુના સ્ટ્રાઈક રેટથી 105 રન બનાવ્યા હતા. તેમની આ ઈનિંગને કારણે જ ઈંગ્લેન્ડ આ મેચમાં અંત સુધી ટકી શક્યું હતું. બેથલે આ મેચમાં જે રીતે બેટિંગ કરી તેને જોઈને દરેક વ્યક્તિ આશ્ચર્યચકિત છે અને ફેન્સ હવે તેમના વિશે જાણવા માંગે છે. ફેન્સના મનમાં અત્યારે સૌથી મોટો સવાલ એ છે કે તેઓ IPLમાં કઈ ટીમનો હિસ્સો છે અને આ સીઝન કઈ ફ્રેન્ચાઈઝી માટે રમશે.
ઈંગ્લેન્ડ માટે ત્રણેય ફોર્મેટમાં સદી ફટકારી ચૂક્યો છે જેકબ બેથલ
ઈંગ્લેન્ડના યુવા બેટ્સમેન જેકબ બેથલ માટે આવી બેટિંગ કોઈ નવી વાત નથી. તેઓ તેમના કરિયરના શરૂઆતના સમયથી જ આ પ્રકારની તોફાની બેટિંગ માટે જાણીતો છે. બેથલ અત્યાર સુધી ઈંગ્લેન્ડ માટે 6 ટેસ્ટ, 21 વનડે અને 31 T20 ઈન્ટરનેશનલ મેચ રમી ચૂક્યો છે. તેમણે ઈંગ્લેન્ડ માટે ડેબ્યૂ વર્ષ 2024માં ઓસ્ટ્રેલિયા સામે T20 મેચ દરમિયાન કર્યું હતું. તે અત્યાર સુધી ત્રણેય ફોર્મેટમાં સદી ફટકારી ચૂક્યો છે. તે દુનિયાનો પહેલો એવો ખેલાડી છે, જેમણે પોતાની પ્રથમ લિસ્ટ A, ફર્સ્ટ ક્લાસ અને T20 સદી ઈન્ટરનેશનલ મેચમાં બનાવી હોય.
IPL 2026માં કઈ ટીમ માટે રમશે જેકબ બેથલ?
T20 વર્લ્ડ કપમાંથી ઈંગ્લેન્ડની ટીમ બહાર થઈ ગઈ છે. આવા સમયે હવે ઈંગ્લેન્ડના પ્લેયર્સ આગામી IPL સીઝન માટે પોતાની ટીમો સાથે જોડાઈ જશે. આ વચ્ચે તમને જણાવી દઈએ કે બેથલ આગામી IPL સીઝનમાં ડિફેન્ડિંગ ચેમ્પિયન ટીમ RCBનો હિસ્સો છે. તેમને આ સીઝન માટે રોયલ ચેલેન્જર્સ બેંગલુરુની ટીમે 2.80 કરોડમાં રિટેન કર્યા છે. તેઓ ગયા IPL સીઝનમાં RCBનો હિસ્સો હતો અને ત્યાં તેમણે 2 મેચ રમી હતી. તે બે મુકાબલામાં બેથલે 33.50ની સરેરાશથી 67 રન બનાવ્યા હતા અને ત્યાં તેમનો હાઈએસ્ટ સ્કોર 55 રન હતો. જેકબ ઘણી T20 લીગમાં રમી ચૂક્યો છે અને તે બોલની સાથે-સાથે બેટથી પણ મહત્વનું યોગદાન આપી શકે છે.
બેથલે ડોમેસ્ટિક ક્રિકેટમાં કર્યું શાનદાર પ્રદર્શન
જેકબ બેથલની વાત કરીએ તો તેમને 13 વર્ષની ઉંમરમાં રગ્બી સ્કૂલમાં ક્રિકેટ સ્કોલરશિપ મળી અને તેઓ બાર્બાડોસથી ઈંગ્લેન્ડ આવી ગયો. અહીં તેમણે વોરવિકશાયરની યુથ ટીમ જોઈન કરી અને 17 વર્ષની ઉંમરે પ્રો કોન્ટ્રાક્ટ સાઈન કર્યો. 2021માં T20 બ્લાસ્ટમાં ડેબ્યૂ કર્યું. 2022માં ઈંગ્લેન્ડ અન્ડર-19 ટીમ સાથે વર્લ્ડ કપ ફાઈનલ સુધી પહોંચ્યો, જ્યાં ક્વાર્ટર-ફાઈનલમાં સાઉથ આફ્રિકા સામે 42 બોલમાં 88 રન બનાવ્યા. વર્ષ 2024 તેમના માટે શાનદાર રહ્યું. વોરવિકશાયર માટે બ્લાસ્ટ અને બર્મિંગહામ ફીનિક્સ માટે હન્ડ્રેડમાં શાનદાર પ્રદર્શન કર્યું. આ કારણે જ તેમને ઈંગ્લેન્ડની વ્હાઈટ-બોલ ટીમમાં સામેલ કરવામાં આવ્યો.
ટોપ સ્ટોરી
ટ્રેન્ડિંગ સમાચાર
