Rohit Sharma Retirement: ભારતીય ક્રિકેટ ટીમના 'હિટમેન' છેલ્લા ઘણા સમયથી ચર્ચામાં છે. રોહિત શર્માની ચર્ચા તેમના દમદાર પ્રદર્શનને લઈને નહીં પરંતુ નિવૃત્તિને લઈને થઈ રહી છે. સોશિયલ મીડિયાથી લઈને મીડિયા સુધી એવો દાવો કરવામાં આવી રહ્યો છે કે શનિવાર, 20 જૂનના રોજ ચેપોકમાં રોહિત શર્મા તેમની છેલ્લી ઈન્ટરનેશનલ મેચ રમશે. એટલે કે અફઘાનિસ્તાન સામેની ત્રીજી વનડે તેમની કારકિર્દીની છેલ્લી મેચ હશે. અહીં જાણો આ દાવાઓમાં કેટલું સત્ય છે.
તમને જણાવી દઈએ કે રોહિત શર્મા ટેસ્ટ અને T20 ઈન્ટરનેશનલમાંથી નિવૃત્તિ લઈ ચૂક્યા છે. હવે તેઓ માત્ર વનડે ઈન્ટરનેશનલમાં જ રમે છે. અફઘાનિસ્તાન સામે ધર્મશાલામાં રમાયેલી પહેલી વનડેમાં રોહિત 16 રન પર રન આઉટ થઈ ગયા હતા. ત્યારબાદ લખનઉમાં રમાયેલી બીજી વનડેમાં હિટમેનના બેટમાંથી 39 બોલમાં 48 રન નીકળ્યા હતા. હવે એવો દાવો કરવામાં આવી રહ્યો છે કે શનિવાર, 20 જૂનના રોજ ચેપોકમાં રમાનારી ત્રીજી વનડે તેમની કારકિર્દીની છેલ્લી મેચ હશે.
રોહિત શર્માની નિવૃત્તિના સમાચારો માત્ર સોશિયલ મીડિયા પર જ વાયરલ નથી, પરંતુ કેટલીય વેબસાઈટ્સ અને ન્યૂઝ ચેનલોએ પણ તેને ચલાવ્યા છે. એવું કહેવામાં આવી રહ્યું છે કે બીસીસીઆઈ (BCCI) એ સત્તાવાર રીતે રોહિત શર્માને એવો સંદેશ આપી દીધો છે કે તેઓ 2027 વનડે વર્લ્ડ કપનો હિસ્સો નહીં હોય. તેવામાં અફઘાનિસ્તાન સામેની ત્રીજી વનડે તેમની કારકિર્દીની છેલ્લી મેચ હશે.
એક સોશિયલ મીડિયા પોસ્ટમાં લખવામાં આવ્યું છે કે, "BCCI ના નજીકના સૂત્રોના જણાવ્યા અનુસાર, રોહિત શર્મા વનડે વર્લ્ડ કપ માટે ટીમની યોજનાઓમાં સામેલ નથી. અફઘાનિસ્તાન સામેની સિરીઝની છેલ્લી મેચ સંભવતઃ રોહિત શર્માની કારકિર્દીની છેલ્લી મેચ હશે."
અન્ય એક પોસ્ટમાં કહેવામાં આવ્યું છે કે,"ઈશાન કિશન રોહિત શર્માની જગ્યા લઈ શકે છે. અહેવાલો અનુસાર, ઈશાન કિશન રોહિત શર્માની જગ્યાએ ઓપનિંગ બેટ્સમેન બનવાનો પ્રબળ દાવેદાર છે. રોહિતની ફિટનેસ અને ફોર્મને લઈને પસંદગીકારોમાં ચિંતા વધી ગઈ છે. એવું કહેવામાં આવી રહ્યું છે કે મેનેજમેન્ટ ટોપ ઓર્ડરમાં એક લેફ્ટી બેટ્સમેન ઈચ્છે છે અને ઈશાન કિશન, શુભમન ગિલ સાથે ઓપનિંગ કરવાનો પ્રબળ દાવેદાર છે."
વાયરલ દાવાઓમાં કેટલું સત્ય?
તમારી માહિતી માટે જણાવી દઈએ કે આ તમામ વાયરલ સમાચારો અને દાવાઓ તદ્દન ખોટા છે. સૌથી પહેલા 'સ્પોર્ટ્સ તક' ના એક અહેવાલનો હવાલો આપીને સોશિયલ મીડિયા પર રોહિત શર્માની નિવૃત્તિની પોસ્ટ કરવામાં આવી હતી, પરંતુ 'સ્પોર્ટ્સ તક' એવો કોઈ અહેવાલ પ્રકાશિત જ કર્યો ન હતો. આ તમામ દાવાઓ કોઈપણ સત્તાવાર માહિતી વગર કરવામાં આવી રહ્યા છે. અહીં સુધી કે ન્યૂઝ ચેનલોમાં પણ જે સમાચારો ચાલ્યા છે, તે પણ ખોટા છે. અત્યાર સુધી આવી કોઈ પણ સત્તાવાર માહિતી BCCI તરફથી કે રોહિત શર્મા તરફથી આપવામાં આવી નથી.