નવી દિલ્હીઃ ન્યૂઝિલેન્ડ સામેની કાનપુર ખાતે રમાઇ રહેલી પ્રથમ ટેસ્ટ મેચ હાલમાં રમાઇ રહી છે. પોતાની પ્રથમ ટેસ્ટ મેચમાં જ ભારતના બેટ્સમેન શ્રેયસ ઐય્યર છવાઇ ગયો હતો. તેણે ડેબ્યૂ મેચમાં જ સદી ફટકારી પોતાની પ્રતિભા બતાવી હતી. ઐય્યરે પ્રથમ ઇનિંગમાં 105 રનની શાનદાર ઇનિંગ રમી હતી જ્યારે બીજી ઇનિંગમાં પણ મહત્વપૂર્ણ 65 રન ફટકારી ટીમને મોટી લીડ મેળવવામાં મદદ કરી હતી. જોકે શ્રેયસ ઐય્યરના શાનદાર પ્રદર્શન છતાં બીજી ટેસ્ટમાં તેને પડતો મુકવામાં આવે તેવી ચર્ચા શરૂ થઇ ગઇ છે.
વાસ્તવમાં બીજી ટેસ્ટ મેચમાં ભારતીય કેપ્ટન વિરાટ કોહલીની વાપસી થશે એવામાં શ્રેયસને પડતો મુકવામા આવે તેવી સંભાવના છે. જેને લઇને ભારતીય ક્રિકેટ ચાહકો ગુસ્સે ભરાયા છે. ભારતીય ક્રિકેટ ફેન્સ ભારત તરફથી ત્રેવડી સદી ફટકારનાર કરુણ નાયરને યાદ કરી રહ્યા છે. ટ્વિટર પર કરુણ નાયર ટ્રેન્ડ થઇ રહ્યો છે.
ચર્ચા છે કે શ્રેયસ ઐય્યરે વિરાટ કોહલી માટે જગ્યા છોડવી પડશે. જેથી સવાલ એ થાય છે કે શ્રેયસ ઐય્યર બીજી ટેસ્ટ રમશે નહીં. શું શ્રેયસને બીજી ટેસ્ટમાં પ્લેઇગ ઇલેવનમાંથી પડતો મુકવામાં આવશે. એટલું જ નહી દર્શકોએ શ્રેયસના બદલે ફોર્મમાં ના રહેલા રહાણેને પડતો મુકવાની માંગ કરી રહ્યા છે.
શ્રેયસને પડતો મુકવાની વાત વચ્ચે લોકોને કરુણ નાયર યાદ આવ્યો હતો. નાયરે પોતાના કરિયરની ત્રીજી જ ટેસ્ટ મેચમા ઇગ્લેન્ડ સામે અણનમ ત્રેવડી સદી ફટકારી હતી. નાયરે પાંચ વર્ષ અગાઉ ચેન્નઇ ખાતે ઇગ્લેન્ડ સામે અણનમ 303 રનની ઇનિંગ રમી હતી. પરંતુ બાદમાં ફક્ત બે ટેસ્ટ રમાડીને નાયરને બહારનો રસ્તો બતાવી દેવાયો હતો. હાલમાં લોકો શ્રેયસને કરુણ નાયર સાથે જોડીને ચર્ચા કરી રહ્યા છે. લોકો કહી રહ્યા છે કે શ્રેયસના હાલ પણ કરુણ નાયર જેવા જ થશે.