IND vs BAN U19 World Cup 2026: ICC મેન્સ અંડર-19 વર્લ્ડ કપ 2026 (U19 World Cup 2026) માં ભારતીય ક્રિકેટ ટીમનું વિજયી અભિયાન યથાવત રહ્યું છે. એક અત્યંત રોમાંચક અને ઉતાર-ચઢાવ વાળી મેચમાં ટીમ ઈન્ડિયાએ પાડોશી દેશ બાંગ્લાદેશને 18 રનથી ધૂળ ચટાડી છે. આ જીત સાથે ભારતે ટૂર્નામેન્ટમાં સતત બીજી સફળતા મેળવીને આગામી રાઉન્ડ માટે પોતાની દાવેદારી મજબૂત કરી લીધી છે. વરસાદના વિઘ્ન વચ્ચે રમાયેલી આ મેચમાં ડકવર્થ લુઈસ નિયમ (DLS Method) મુજબ પરિણામ આવ્યું હતું.
બાંગ્લાદેશનો નાટ્યાત્મક ધબડકો (Batting Collapse)
મેચનો ટર્નિંગ પોઈન્ટ બાંગ્લાદેશની ઇનિંગનો અંતિમ તબક્કો હતો. DLS મેથડ મુજબ મળેલા 165 રનના લક્ષ્યાંકનો પીછો કરતી વખતે બાંગ્લાદેશ એક સમયે મજબૂત સ્થિતિમાં હતું. તેમનો સ્કોર 124 રન હતો, પરંતુ ત્યારબાદ ભારતીય બોલરોએ મેચનું પાસું પલટી નાખ્યું. બાંગ્લાદેશી ટીમ પત્તાના મહેલની જેમ તૂટી પડી અને માત્ર 22 રનના ગાળામાં છેલ્લી 7 વિકેટો ગુમાવી દીધી. 124 રનથી આગળ વધતા આખી ટીમ 146 રનમાં જ સમેટાઈ ગઈ.
હીરો બન્યો વિહાન મલ્હોત્રા
ભારતની જીતનો અસલી હીરો વિહાન મલ્હોત્રા (Vihan Malhotra) સાબિત થયો. તેણે પોતાની ઘાતક બોલિંગથી બાંગ્લાદેશી બેટ્સમેનોને ઘૂંટણીયે પાડી દીધા. વિહાને માત્ર 4 ઓવરના સ્પેલમાં 14 રન આપીને મહત્વની 4 વિકેટ ઝડપી હતી. આ મેચ વિનિંગ પ્રદર્શન માટે તેને 'પ્લેયર ઓફ ધ મેચ' (Player of the Match) જાહેર કરવામાં આવ્યો હતો.
સૂર્યવંશી અને કુંડુની અડધી સદી
અગાઉ ટોસ હારીને પ્રથમ બેટિંગ કરવા ઉતરેલી ભારતીય ટીમની શરૂઆત પણ પડકારજનક રહી હતી. જોકે, બે યુવા સ્ટાર્સે બાજી સંભાળી લીધી હતી.
વૈભવ સૂર્યવંશી (Vaibhav Suryavanshi): પોતાની આક્રમક શૈલી બાજુ પર મૂકીને પરિસ્થિતિ મુજબ રમતા તેણે 67 બોલમાં 72 રન ફટકાર્યા હતા. જેમાં 6 ચોગ્ગા અને 3 છગ્ગા સામેલ હતા.
અભિજ્ઞાન કુંડુ (Abhigyan Kundu): કુંડુએ ધીરજપૂર્વક બેટિંગ કરતા 112 બોલમાં 80 રનનું મહત્વનું યોગદાન આપ્યું હતું. તેને ઇનિંગ દરમિયાન બે જીવનદાન મળ્યા હતા, જેનો તેણે ભરપૂર ફાયદો ઉઠાવ્યો.
વરસાદ અને બોલરોનું પ્રદર્શન
મેચ દરમિયાન વરસાદે વિક્ષેપ પાડતા 65 મિનિટ સુધી રમત અટકાવી પડી હતી, જેના કારણે ઓવર ઘટાડીને 49 કરવામાં આવી હતી. ભારતીય ટીમ 238 રનમાં ઓલઆઉટ થઈ ગઈ હતી. બાંગ્લાદેશ તરફથી અલ ફહાદે (Al Fahad) તરખાટ મચાવતા 5 વિકેટ ઝડપી હતી, પરંતુ અંતે ભારતીય બોલરોનું ટીમ વર્ક બાંગ્લાદેશ પર ભારે પડ્યું હતું.