IND vs NZ 2nd ODI: ભારત અને ન્યુઝીલેન્ડ વચ્ચેની વનડે શ્રેણીનો કારવો હવે ગુજરાતના રંગીલા શહેર રાજકોટ આવી પહોંચ્યો છે. બુધવારે, 14 January ના રોજ રાજકોટના ખંઢેરી સ્થિત સૌરાષ્ટ્ર ક્રિકેટ એસોસિએશન સ્ટેડિયમમાં બીજી વનડે (2nd ODI) રમાશે. રોહિત શર્માની આગેવાની હેઠળની 'ટીમ ઈન્ડિયા' (Team India) અત્યારે ભલે જબરદસ્ત ફોર્મમાં હોય, પરંતુ આ મેદાનનો ઈતિહાસ ભારત માટે ચેતવણી સમાન છે. આંકડાઓ પર નજર કરીએ તો ખ્યાલ આવે છે કે રાજકોટનું મેદાન યજમાન ટીમ માટે બહુ ભાગ્યશાળી સાબિત થયું નથી.
રાજકોટમાં ભારતનો ટ્રેક રેકોર્ડ: 4 માંથી માત્ર 1 જીત
રાજકોટના આ આધુનિક સ્ટેડિયમમાં ભારતીય ટીમનો રેકોર્ડ નિરાશાજનક રહ્યો છે. અત્યાર સુધી અહીં ભારતે કુલ 4 વનડે મેચ રમી છે, જેમાંથી ટીમ માત્ર 1 જ મેચ જીતવામાં સફળ રહી છે, જ્યારે 3 મેચમાં હારનો સામનો કરવો પડ્યો છે.
2013: આ મેદાન પર રમાયેલી સૌપ્રથમ વનડેમાં ભારત અને ઈંગ્લેન્ડ આમને-સામને હતા. જેમાં ઈંગ્લેન્ડે ભારતને રોમાંચક મુકાબલામાં 9 રનથી હરાવ્યું હતું.
2015: ત્યારબાદ દક્ષિણ આફ્રિકા સામેની મેચમાં ભારતનો 18 રનથી પરાજય થયો હતો.
2020: ભારતને આ મેદાન પર એકમાત્ર જીત 2020 માં મળી હતી, જ્યારે ઓસ્ટ્રેલિયા સામે ભારતે 36 રનથી વિજય મેળવ્યો હતો.
2023: છેલ્લે જ્યારે ભારત અને ઓસ્ટ્રેલિયા અહીં ટકરાયા હતા, ત્યારે ઓસ્ટ્રેલિયાએ ભારતને 66 રનથી કારમો પરાજય આપ્યો હતો.
જીતનું ગણિત: 'પહેલા બેટિંગ' છે રામબાણ ઈલાજ?
આંકડાઓનું વિશ્લેષણ કરતા એક રસપ્રદ પેટર્ન સામે આવી છે. આ મેદાન પર રમાયેલી ચારેય મેચોમાં એ જ ટીમ વિજેતા બની છે જેણે પહેલા બેટિંગ (Batting First) કરી છે. ભારતે પણ જે એકમાત્ર મેચ જીતી છે તેમાં તેણે પહેલા બેટિંગ કરી હતી. આનો સીધો અર્થ એ છે કે રાજકોટની સપાટ પીચ પર રનનો પીછો કરવો મુશ્કેલ બની જાય છે.
જો બુધવારની મેચમાં કોઈ ટીમ 300 પ્લસનો સ્કોર ખડકી દે છે, તો બીજી ઈનિંગમાં બેટિંગ કરનારી ટીમ પર દબાણ વધી જશે. તેથી આ મેચમાં 'ટોસ' (Toss) કિંગમેકરની ભૂમિકા ભજવશે તે નક્કી છે.
કોહલી અને રોહિત પર મદાર
જોકે, આંકડા ભલે વિરુદ્ધમાં હોય, પરંતુ વર્તમાન ટીમનું ફોર્મ જબરદસ્ત છે. કેપ્ટન રોહિત શર્મા, રન મશીન વિરાટ કોહલી (Virat Kohli) અને યુવા સ્ટાર શુભમન ગિલના બેટમાંથી રન વરસી રહ્યા છે. ભારતીય બેટિંગ લાઇનઅપ અત્યારે વિશ્વની સૌથી ખતરનાક લાઇનઅપમાંની એક છે. હવે જોવાનું એ રહેશે કે શું મેન ઇન બ્લુ 2020 પછી રાજકોટમાં જીતનો દુષ્કાળ ખતમ કરી શકશે કે કેમ?