IND vs PAK T20 World Cup 2026: શ્રીલંકાના કોલંબોમાં રવિવાર, 15 ફેબ્રુઆરીના રોજ રમાનાર ભારત વિરુદ્ધ પાકિસ્તાન (India vs Pakistan) હાઈ વોલ્ટેજ મુકાબલા પહેલા ટીમ ઈન્ડિયા માટે એક ચિંતાજનક પાસું સામે આવ્યું છે. T20 વર્લ્ડ કપ 2026 (T20 World Cup 2026) ની આ મહાજંગ પહેલા આંકડાકીય વિશ્લેષણ દર્શાવે છે કે ભારતના બે સ્તંભ સમાન ખેલાડીઓ, કેપ્ટન સૂર્યકુમાર યાદવ અને ઓલરાઉન્ડર હાર્દિક પંડ્યાનો પાકિસ્તાન સામેનો રેકોર્ડ અત્યંત નબળો છે. બંને ટીમો હાલમાં 4 4 પોઈન્ટ સાથે પોઈન્ટ ટેબલમાં મજબૂત સ્થિતિમાં છે, પરંતુ રવિવારે જીતની હેટ્રિક કરવા માટે ભારતના આ સ્ટાર ખેલાડીઓએ તેમના ભૂતકાળના ખરાબ ફોર્મને પાછળ છોડવું પડશે.
સૂર્યકુમાર યાદવ: કેપ્ટનનો પાકિસ્તાન સામે સંઘર્ષ (Suryakumar Yadav Stats)
ટીમ ઈન્ડિયાના વર્તમાન કેપ્ટન અને વિશ્વના વિસ્ફોટક બેટ્સમેન ગણાતા સૂર્યકુમાર યાદવના આંકડા પાકિસ્તાન સામે ચોંકાવનારા છે:
- મેચ: 8 T20 આંતરરાષ્ટ્રીય મેચ.
- કુલ રન: માત્ર 112 રન.
- સરેરાશ: 16.00 ની સાધારણ એવરેજ.
- શ્રેષ્ઠ સ્કોર: અણનમ 47 રન. નોંધનીય છે કે સૂર્યકુમાર હજુ સુધી પાકિસ્તાન સામે એક પણ અડધી સદી (Half Century) ફટકારી શક્યા નથી.
હાર્દિક પંડ્યા: પાકિસ્તાન સામે ફિફ્ટીનો દુકાળ (Hardik Pandya Records)
ઓલરાઉન્ડર હાર્દિક પંડ્યા મોટાભાગે પાકિસ્તાન સામે બોલિંગમાં સફળ રહ્યો છે, પરંતુ બેટિંગમાં તે સંઘર્ષ કરતો દેખાયો છે:
- મેચ: 9 T20 આંતરરાષ્ટ્રીય મેચ.
- કુલ રન: 7 ઇનિંગ્સમાં માત્ર 98 રન.
- સરેરાશ: 19.60 ની એવરેજ.
- શ્રેષ્ઠ સ્કોર: 40 રન. હાર્દિક પણ હજુ સુધી પાકિસ્તાન વિરુદ્ધ 50 રનનો આંકડો સ્પર્શવામાં નિષ્ફળ રહ્યો છે, જે મધ્યમ ક્રમ માટે ચિંતાનો વિષય છે.
અભિષેક શર્મા કે સંજુ સેમસન? ઓપનિંગની મૂંઝવણ
ભારતીય પ્લેઈંગ ઈલેવન (Playing 11) માં અભિષેક શર્માની ઉપલબ્ધતા હજુ શંકાસ્પદ છે. અભિષેકનો પાકિસ્તાન સામેનો ટૂંકો રેકોર્ડ સારો છે, જેમાં તેણે 3 મેચમાં 110 રન બનાવ્યા છે અને એક મેચમાં 74 રનની શાનદાર ઈનિંગ રમી છે. જો તે ફિટ નહીં હોય, તો સંજુ સેમસનને (Sanju Samson) તક મળી શકે છે, જેમણે પાકિસ્તાન સામે 2 ઇનિંગ્સમાં માત્ર 37 રન કર્યા છે.
પોઈન્ટ ટેબલમાં હેટ્રિકની તક (Points Table Standings)
બંને ટીમોએ ટૂર્નામેન્ટમાં શાનદાર શરૂઆત કરી છે અને પોતપોતાની પ્રથમ 2 મેચ જીતી લીધી છે. હાલમાં ટીમ ઈન્ડિયા સારા નેટ રન રેટ (Net Run Rate) ના આધારે ટોચ પર છે. રવિવારે જે ટીમ જીતશે તે વિજયી હેટ્રિક પૂરી કરશે અને સેમીફાઈનલ તરફ મજબૂત ડગલું માંડશે.