IND vs PAK: ભારતે પાકિસ્તાનને 64 રને કચડ્યું; T20 વર્લ્ડ કપમાં આ સંયોગ સાથે રચ્યો ઇતિહાસ

ind vs pak womens t20 world cup 2026: સ્મૃતિ મંધાનાની 68 રનની તોફાની ઇનિંગ અને દીપ્તિ શર્માની 5 વિકેટની જાદુઈ બોલિંગની મદદથી ટીમ ઇન્ડિયાએ 2026 વર્લ્ડ કપમાં શાનદાર વિજયી શરૂઆત કરી.

ind vs pak womens t20 world cup 2026 deepti sharma smriti mandhana win

Source : social media

Show Quick Read

Key points generated by AI, verified by newsroom

• ભારતીય મહિલા ટીમે પાકિસ્તાનને 64 રનથી હરાવી શરૂઆત કરી.
• ભારતે 170 રન બનાવ્યા, સ્મૃતિ મંધાનાએ 68 રનનું યોગદાન આપ્યું.
• પાકિસ્તાન 171 રનના લક્ષ્ય સામે 106 રનમાં ઓલઆઉટ થયું.
• દીપ્તિ શર્માએ 5 વિકેટ ઝડપી પ્લેયર ઓફ ધ મેચ બની.

ind vs pak womens t20 world cup 2026: 2026 ના ICC મહિલા T20 વર્લ્ડ કપમાં ભારતીય ટીમે ધમાકેદાર શરૂઆત કરતા પોતાની પહેલી જ મેચમાં કટ્ટર હરીફ પાકિસ્તાનને 64 રનથી કચડી નાખ્યું છે. આ શાનદાર જીત સાથે જ ભારતે T20 વર્લ્ડ કપના ઇતિહાસમાં પાકિસ્તાન સામે પોતાનો 7 મો વિજય નોંધાવ્યો છે. કેપ્ટન હરમનપ્રીત કૌરની આગેવાનીમાં ભારતે પ્રથમ બેટિંગ કરતા 170 રનનો મોટો સ્કોર ઊભો કર્યો હતો. જેના જવાબમાં પાકિસ્તાનની ટીમ 17 ઓવરમાં માત્ર 106 રનમાં જ સમેટાઈ ગઈ હતી. સ્મૃતિ મંધાનાએ બેટિંગમાં અને દીપ્તિ શર્માએ બોલિંગમાં કમાલ કરીને ભારતને આ ઐતિહાસિક જીત અપાવી હતી.

ભારતીય બેટ્સમેનોની ધમાકેદાર બેટિંગ

ભારતે ટોસ જીતીને પહેલા બેટિંગ કરવાનો નિર્ણય લીધો હતો, જે એકદમ સાચો સાબિત થયો. ભારતે નિર્ધારિત 20 ઓવરમાં 6 વિકેટ ગુમાવીને 170 રન બનાવ્યા હતા. ઓપનર સ્મૃતિ મંધાનાએ તોફાની બેટિંગ કરતા 44 બોલમાં 68 રન ફટકાર્યા હતા. કેપ્ટન હરમનપ્રીત કૌરે 35 બોલમાં 36 રનનું યોગદાન આપ્યું હતું. અંતિમ ઓવરોમાં રિચા ઘોષે માત્ર 17 બોલમાં 34 રનની વિસ્ફોટક ઇનિંગ રમીને ટીમને એક મજબૂત સ્કોર સુધી પહોંચાડી હતી.

પાકિસ્તાનની સારી શરૂઆત પછી ધબડકો

171 રનના મોટા લક્ષ્યાંકનો પીછો કરવા ઉતરેલી પાકિસ્તાનની ટીમે શરૂઆત તો ખૂબ સારી કરી હતી. પહેલી 6 ઓવરના પાવરપ્લેમાં પાકિસ્તાને કોઈપણ વિકેટ ગુમાવ્યા વિના 52 રન બનાવી લીધા હતા. T20 ઇન્ટરનેશનલમાં ભારત સામે પાવરપ્લેમાં પાકિસ્તાનનો આ સૌથી મોટો સ્કોર હતો. પરંતુ 7 મી ઓવરથી ભારતીય બોલરોએ કમબેક કર્યું અને નિયમિત અંતરે વિકેટો પાડીને પાકિસ્તાનની કમર તોડી નાખી. ઓપનર મુનીબા અલીએ સૌથી વધુ 41 રન બનાવ્યા, પરંતુ તેના સિવાય આલિયા રિયાઝ (18), ગુલ ફિરોઝા (12) અને આયેશા ઝફર (12) જ ડબલ આંકડા સુધી પહોંચી શક્યા. પાકિસ્તાનની આખી ટીમ પૂરી 20 ઓવર પણ ન રમી શકી અને 17 ઓવરમાં 106 રને ઓલઆઉટ થઈ ગઈ.

આ પણ વાંચોઃ ભારતની શાનદાર જીત: ગુરબાઝની સદી એળે ગઈ, ગિલ અને રાહુલની તોફાની બેટિંગથી અફઘાનિસ્તાન પસ્ત

દીપ્તિ શર્માએ રચ્યો ઇતિહાસ

ભારતની આ જીતની અસલી હીરો દીપ્તિ શર્મા રહી. તેણે 4 ઓવરમાં માત્ર 10 રન આપીને 5 વિકેટ ઝડપી અને પાકિસ્તાનના બેટિંગ ઓર્ડરને વેરવિખેર કરી નાખ્યો. આ શાનદાર પ્રદર્શન માટે તેને 'પ્લેયર ઓફ ધ મેચ' જાહેર કરવામાં આવી. આ સાથે જ દીપ્તિએ આંતરરાષ્ટ્રીય ક્રિકેટમાં પોતાની 350 વિકેટ પણ પૂરી કરી લીધી છે અને આવું કારનામું કરનારી તે વિશ્વની માત્ર બીજી મહિલા બોલર બની ગઈ છે.

દીપ્તિ ઉપરાંત અન્ય બોલરોએ પણ શાનદાર સાથ આપ્યો હતો. શ્રીચરણીએ 4 ઓવરમાં 21 રન આપીને 3 વિકેટ ઝડપી હતી, જ્યારે શેફાલી વર્માએ 3 ઓવરમાં 22 રન આપીને 1 વિકેટ લીધી હતી. પાકિસ્તાનની એક ખેલાડી રનઆઉટ થઈ હતી.

આ પણ વાંચોઃ 8 છગ્ગા, 48 બોલ અને સદી! ભારત સામે રહેમાનુલ્લાહ ગુરબાઝે મચાવ્યો તરખાટ, અનેક રેકોર્ડ તોડ્યા