દક્ષિણ આફ્રિકા સામે હાર બાદ ટીમ મેનેજમેન્ટ એક્શનમાં, આગામી મેચમાં આ ખેલાડીઓની થઈ શકે છે છુટ્ટી
દક્ષિણ આફ્રિકા સામે હાર બાદ ટીમ ઇન્ડિયાની પ્લેઇંગ ઇલેવનમાં મોટા ફેરફારની ચર્ચાઓ તેજ બની છે. આ ટુર્નામેન્ટમાં ભારતની શરૂઆત સતત નબળી રહી છે. પાવરપ્લેમાં રન રેટ ધીમો રહ્યો છે અને વિકેટો ઝડપથી પડી રહી છે.
T20 World Cup 2026: આઈસીસી ટી20 વર્લ્ડ કપ 2026 ના સુપર-8 મુકાબલામાં સાઉથ આફ્રિકા સામે મળેલી 76 રનની હાર બાદ ભારતીય ટીમની તૈયારીઓ પર સવાલો ઊભા થયા છે. અમદાવાદના નરેન્દ્ર મોદી સ્ટેડિયમમાં રમાયેલી આ મેચ બાદ હવે ટીમ મેનેજમેન્ટ પર પ્લેઈંગ ઈલેવનમાં ફેરફાર કરવાનું દબાણ વધી ગયું છે. આગળ ઝિમ્બાબ્વે અને વેસ્ટ ઈન્ડિઝ જેવી મજબૂત ટીમો સામે મુકાબલો છે, ત્યારે હવે પ્રયોગો કરવાની ગુંજાશ ઓછી બચી છે.
ઓપનિંગ જોડી પર સૌથી મોટો સવાલ
આ ટુર્નામેન્ટમાં ભારતની શરૂઆત સતત નબળી રહી છે. પાવરપ્લેમાં રન ગતિ ધીમી રહી છે અને વિકેટો પણ જલ્દી પડી રહી છે. હાલની ઓપનિંગ જોડી અપેક્ષાઓ પર ખરી ઉતરી શકી નથી, જેના કારણે ફેરફારની ચર્ચા તેજ બની છે. T20માં ઓપનર તરીકે અગાઉ સારું પ્રદર્શન કરી ચૂકેલા સંજુ સેમસનને ફરીથી તક આપવાની વાત થઈ રહી છે. તેના આવવાથી બેટિંગ લાઇનઅપમાં સંતુલન આવી શકે છે. જો તેને અભિષેક શર્માના સ્થાને ઓપનિંગમાં મોકલવામાં આવે, તો ટીમને ઝડપી શરૂઆત મળી શકે છે. કારણ કે આ વિશ્વ કપમાં અભિષેક પોતાના બેટથી સંપૂર્ણપણે નિષ્ફળ ગયો છે.
મિડલ ઓર્ડરમાં પણ ફેરફાર શક્ય
નંબર 3 અને 4 પર પણ સ્થિરતાનો અભાવ જોવા મળ્યો છે. યુવા બેટ્સમેન તિલક વર્માને તકો મળી છે, પરંતુ તે મોટી મેચોમાં જવાબદારી નિભાવવામાં નિષ્ફળ રહ્યો છે. આવામાં ટીમ મેનેજમેન્ટ અનુભવ અને ફોર્મને ધ્યાનમાં રાખીને ફેરફાર કરી શકે છે, જેમાં ઈશાન કિશનને નંબર 3 પર બેટિંગ માટે મોકલવામાં આવી શકે છે. જો આમ થશે તો અભિષેક અને સંજુને ઓપનિંગમાં મોકલવામાં આવી શકે છે. કેટલાક નિષ્ણાતો માને છે કે ટોપ ઓર્ડરમાં ડાબા અને જમણા હાથના બેટ્સમેનોનું સંયોજન હોવું જરૂરી છે, જેથી ઓફ સ્પિનરોની વ્યૂહરચના તોડી શકાય.
બોલિંગ લાઇનઅપ પર પણ નજર
સાઉથ આફ્રિકા સામે બોલરોએ પણ નિરાશ કર્યા છે. ડેથ ઓવરોમાં રન રોકવામાં નિષ્ફળતા સ્પષ્ટ દેખાઈ હતી. આ સંજોગોમાં વધારાના સ્પિન વિકલ્પ તરીકે કુલદીપ યાદવને સામેલ કરવાની ચર્ચા છે. બીજી તરફ, ફાસ્ટ બોલિંગને મજબૂત કરવા માટે મોહમ્મદ સિરાજને પણ તક મળી શકે છે. તેમજ ઓલરાઉન્ડર વિકલ્પ તરીકે વોશિંગ્ટન સુંદરની જગ્યાએ અક્ષર પટેલનું પુનરાગમન ટીમમાં સંતુલન લાવી શકે છે.
હવે ભૂલની કોઈ ગુંજાશ નથી
સુપર-8 માં દરેક મેચ નોકઆઉટ જેવી છે. જો ટીમ ઈન્ડિયાએ સેમીફાઈનલની રેસમાં ટકી રહેવું હોય તો હવે કડક નિર્ણયો લેવા પડશે. ફેરફાર માત્ર ખેલાડીઓમાં જ નહીં, પરંતુ રણનીતિમાં પણ હોવો જરૂરી છે.
ટોપ સ્ટોરી
ટ્રેન્ડિંગ સમાચાર
