India vs Afghanistan Test: નવા ચંદીગઢના મેદાન પર રમાયેલી એકમાત્ર ટેસ્ટ મેચમાં ટીમ ઈન્ડિયાએ અફઘાનિસ્તાનને ધૂળ ચટાડી દીધી છે. 8 જૂનના રોજ પૂરી થયેલી આ મેચમાં ભારતે અફઘાનિસ્તાનને 1 ઇનિંગ અને 300 રનથી કચડીને ટેસ્ટ ક્રિકેટના ઈતિહાસમાં પોતાની સૌથી મોટી જીતનો નવો રેકોર્ડ બનાવ્યો છે. કેપ્ટન શુભમન ગિલ અને કેએલ રાહુલની ધમાકેદાર સદીઓ અને ત્યારબાદ પોતાની પહેલી જ મેચ રમી રહેલા સ્પિનર માનવ સુથારની 6 વિકેટના તરખાટ સામે અફઘાન ટીમ સંપૂર્ણપણે ઘૂંટણિયે પડી ગઈ હતી. અગાઉ 2018માં ભારતે વેસ્ટ ઇન્ડીઝ સામે 1 ઇનિંગ અને 272 રનથી સૌથી મોટી જીત મેળવી હતી, જે રેકોર્ડ હવે તૂટી ગયો છે.
ભારતની મજબૂત બેટિંગ અને રનનો પહાડ
મેચમાં ટોસ જીતીને ભારતીય કેપ્ટન શુભમન ગિલે પહેલા બેટિંગ કરવાનો નિર્ણય લીધો હતો, જે એકદમ સાચો સાબિત થયો. ભારતીય બેટ્સમેનોએ અફઘાન બોલરોની બરાબરની ધોલાઈ કરીને 8 વિકેટે 564 રનના જંગી સ્કોર પર પોતાનો દાવ ડિકલેર કર્યો હતો.
શુભમન ગિલ: 15 ચોગ્ગા અને 1 છગ્ગાની મદદથી શાનદાર 126 રન (ટેસ્ટ કરિયરની 11મી સદી).
કેએલ રાહુલ: 11 ચોગ્ગાની મદદથી 100 રન (ટેસ્ટ કરિયરની 12મી સદી).
અન્ય યોગદાન: સાઈ સુદર્શન અને ઋષભ પંતે પણ 81-81 રનની ઉપયોગી ઇનિંગ્સ રમી, જ્યારે વોશિંગ્ટન સુંદરે અણનમ 52 રન બનાવ્યા.
આ પણ વાંચોઃ શુભમન ગિલને BCCI નો કડક આદેશ: T20 ભૂલી જાઓ, આ 2 મોટી ટ્રોફી જીતવા પર લગાવો ધ્યાન
માનવ સુથારનો જાદુ અને અફઘાનિસ્તાનનો ધબડકો
564 રનના પહાડ જેવા સ્કોરના દબાણ સામે અફઘાનિસ્તાનની ટીમ પહેલી ઇનિંગમાં માત્ર 152 રનમાં જ સમેટાઈ ગઈ. ડેબ્યૂ કરી રહેલા સ્પિનર માનવ સુથારે અફઘાન બેટ્સમેનોને રીતસરના નચાવ્યા અને પહેલી ઇનિંગમાં 6 વિકેટ ઝડપી લીધી.અફઘાનિસ્તાન તરફથી માત્ર રહેમત શાહે 60 રન બનાવીને થોડી લડત આપી હતી. ભારત તરફથી ફાસ્ટ બોલર પ્રસિદ્ધ કૃષ્ણાએ પણ સારી બોલિંગ કરી અને શરૂઆતની મહત્વની વિકેટો લીધી.
આ પણ વાંચોઃ અફઘાનિસ્તાન સામે જીતવા છતાં ટીમ ઈન્ડિયાને કેમ નહીં થાય WTC માં કોઈ ફાયદો? જાણો મોટું કારણ
બીજી ઇનિંગમાં પણ શરણાગતિ (ફોલો-ઓન)
પહેલી ઇનિંગના આધારે 412 રનથી પાછળ રહ્યા બાદ, અફઘાનિસ્તાનને ફોલો-ઓન રમવાની ફરજ પડી હતી. બીજી ઇનિંગમાં પણ તેમની હાલત સુધરી નહીં અને આખી ટીમ માત્ર 112 રનમાં જ ઓલઆઉટ થઈ ગઈ.
ઓપનર સેદીકુલ્લાહ અટલે સૌથી વધુ 42 રન બનાવ્યા.
બીજી ઇનિંગમાં સ્પિનર વોશિંગ્ટન સુંદરે 4 અને કુલદીપ યાદવે 3 વિકેટ લઈને અફઘાનિસ્તાનનો સફાયો કરી નાખ્યો. અફઘાન ખેલાડી શરાફુદ્દીન ઈજાના કારણે બેટિંગ કરવા આવી શક્યો ન હતો.