T20 World Cup 2026: T20 વર્લ્ડ કપ 2026 પહેલા ભારત-પાકિસ્તાન મુકાબલાને લઈને સ્થિતિ સતત બગડતી જોવા મળી રહી છે. પાકિસ્તાન ક્રિકેટ બોર્ડે (PCB) સ્પષ્ટ કરી દીધું છે કે તેમની ટીમ ભારત સામે મેચ નહીં રમે. આ પાછળ પાકિસ્તાન સરકારનો આદેશ હોવાનું કારણ જણાવવામાં આવ્યું છે. આ નિર્ણયથી માત્ર ક્રિકેટ ચાહકોની આશાઓ પર જ પાણી નથી ફરી વળ્યું, પરંતુ ICC ની કમાણી પર પણ મોટો પ્રશ્નચિહ્ન ઉભો થયો છે.
ભારત-પાક મેચમાં સૌથી વધુ કમાણી થાય છે
ICC ની કોઈપણ ટુર્નામેન્ટમાં ભારત-પાકિસ્તાન મેચ સૌથી વધુ ચર્ચામાં રહે છે. આ મુકાબલો માત્ર ક્રિકેટ નથી, પણ લાગણીઓ અને હાઈ-વોલ્ટેજ ડ્રામાનું પેકેજ હોય છે. આ જ કારણ છે કે ટીવી અને ડિજિટલ પ્લેટફોર્મ પર આ મેચની વ્યુઅરશિપ રેકોર્ડ તોડ હોય છે. બ્રોડકાસ્ટર્સ આ મેચના દમ પર જ મોટા પેકેજ ખરીદે છે. સામાન્ય રીતે ભારતની એક મેચમાંથી અંદાજે 100 કરોડ રૂપિયા સુધીની કમાણી થાય છે, પરંતુ પાકિસ્તાન સામે આ આંકડો ઘણો વધી જાય છે.
જાહેરાતો દ્વારા થાય છે કરોડોનો વરસાદ
ભારત-પાક T20 મેચ દરમિયાન જાહેરાતોની કિંમત આસમાને હોય છે. રિપોર્ટ્સ અનુસાર, આ મુકાબલામાં 10 સેકન્ડની એક એડ (વિજ્ઞાપન) માટે 25 થી 40 લાખ રૂપિયા સુધી વસૂલવામાં આવે છે. આ જ કારણ છે કે માત્ર એક મેચ સાથે અંદાજે 200 કરોડ રૂપિયા સુધીનો કારોબાર જોડાયેલો હોય છે. જો આ મેચ રમાય નહીં, તો આ આખી આવક સીધેસીધી ગાયબ થઈ જશે. તેની સૌથી મોટી અસર ICC ને મળતી બ્રોડકાસ્ટિંગ ફી પર પડશે.
બ્રોડકાસ્ટરથી લઈને ક્રિકેટ બોર્ડ સુધી, દરેકને નુકસાન
આ વખતે ભારતમાં ટુર્નામેન્ટના મીડિયા રાઈટ્સ 'જીયો-હોટસ્ટાર' (Jio-Hotstar) પાસે છે. મેચ રદ થવાની સ્થિતિમાં બ્રોડકાસ્ટરને ભારે નુકસાન થશે અને તેની ભરપાઈ કરવાની જવાબદારી અંતે ICC પર જ આવશે. ICC નું રેવન્યુ શેરિંગ મોડલ એવું છે કે જે કમાણી થાય છે, તે જ અલગ-અલગ ક્રિકેટ બોર્ડ વચ્ચે વહેંચવામાં આવે છે. આવી સ્થિતિમાં નુકસાન માત્ર ICC સુધી સીમિત નહીં રહે; BCCI, PCB અને બાકીના બોર્ડની કમાણી પર પણ તેની અસર પડશે.
શું PCB એ કિંમત ચૂકવવી પડશે?
સૂત્રોનું માનીએ તો ICC આ આખા મામલાને હળવાશથી લેવાના મૂડમાં નથી. જો પાકિસ્તાન પોતાના નિર્ણય પર મક્કમ રહેશે, તો તેના પર દંડ ફટકારવામાં આવી શકે છે. એટલું જ નહીં, બ્રોડકાસ્ટરને થયેલા નુકસાનની ભરપાઈ પણ PCB પાસે કરાવવામાં આવી શકે છે. BCCI જેવા મજબૂત બોર્ડ માટે આ ઝટકો કદાચ બહુ મોટો નહીં હોય, પરંતુ પહેલેથી જ આર્થિક દબાણ હેઠળ રહેલા PCB અને નાના બોર્ડ માટે આ નિર્ણય ઘણો મોંઘો સાબિત થઈ શકે છે.