T20 વર્લ્ડ કપ: સુપર 8 પહેલા ભારતની પ્લેઈંગ ઈલેવનમાં મોટા ફેરફાર, અભિષેક શર્મા સહિત 3 થશે આઉટ?
T20 વર્લ્ડ કપ 2026 ના સુપર 8 તબક્કા પહેલા ટીમ ઈન્ડિયાની પ્લેઈંગ ઈલેવનમાં મોટા ઉલટફેરની શક્યતા. અભિષેક શર્મા અને રિંકુ સિંહ જેવા દિગ્ગજો કેમ થઈ શકે છે બહાર? જાણો સંપૂર્ણ વિશ્લેષણ.
India Playing 11 T20 World Cup 2026: સૂર્યકુમાર યાદવની આગેવાની હેઠળની ભારતીય ક્રિકેટ ટીમ 22 February 2026 ના રોજ અમદાવાદના નરેન્દ્ર મોદી સ્ટેડિયમ ખાતે T20 વર્લ્ડ કપના સુપર 8 તબક્કાની પોતાની પ્રથમ મેચ રમવા માટે સજ્જ છે. ગ્રુપ સ્ટેજમાં સતત 4 મેચ જીતીને પોઈન્ટ ટેબલમાં ટોચનું સ્થાન મેળવ્યા બાદ ટીમ ઈન્ડિયા અત્યારે આત્મવિશ્વાસથી લબરેજ છે. જોકે, સુપર 8 ના હાઈ વોલ્ટેજ મુકાબલાઓ પહેલા ટીમ મેનેજમેન્ટ રણનીતિક ફેરફાર કરવાના મૂડમાં છે. તેનું મુખ્ય કારણ એ છે કે USA અને નેધરલેન્ડ જેવી એસોસિયેટ ટીમો સામે પણ ભારતની મધ્યમ ક્રમની બેટિંગ અને પેસ એટેકની નબળાઈઓ છતી થઈ હતી. આથી, સેમીફાઇનલની રેસમાં ટકી રહેવા માટે ફોર્મમાં ન હોય તેવા ત્રણ મોટા ખેલાડીઓને પ્લેઈંગ ઈલેવનમાંથી પડતા મૂકવામાં આવે તેવી પ્રબળ શક્યતા છે.
અભિષેક શર્મા: ફોર્મનો ફિયાસ્કો અને હેટ્રિક 'ડક'
વર્ષ 2025 માં 859 રન બનાવીને તરખાટ મચાવનાર અભિષેક શર્મા માટે 2026 નો વર્લ્ડ કપ અત્યાર સુધી કોઈ ખરાબ સ્વપ્ન જેવો રહ્યો છે. અચાનક એવું શું થયું કે જે બેટ્સમેન રનનો પહાડ બનાવતો હતો, તે આ વર્લ્ડ કપની પહેલી 3 ઇનિંગ્સમાં પોતાનું ખાતું પણ ખોલાવી શક્યો નથી? 0 રન પર આઉટ થવાની 'અણગમતી' હેટ્રિક બાદ હવે ટીમ મેનેજમેન્ટ તેના પર વધુ ભરોસો રાખવા તૈયાર નથી. સુપર 8 માં જ્યારે બોલિંગનું સ્તર ઘણું ઊંચું હશે, ત્યારે અભિષેકનું કથળેલું ફોર્મ ભારત માટે જોખમી સાબિત થઈ શકે છે.
રિંકુ સિંહ: પ્લેઈંગ ઈલેવનમાં સ્થાન જોખમમાં?
લોઅર મિડલ ઓર્ડરમાં ફિનિશરની ભૂમિકા ભજવનાર રિંકુ સિંહ ગ્રુપ સ્ટેજની તમામ 4 મેચ રમ્યો હોવા છતાં જોઈએ તેવો પ્રભાવ પાડી શક્યો નથી. USA સામેની મહત્વની મેચમાં તે 14 બોલમાં માત્ર 6 રન કરી શક્યો હતો. તેને મોટે ભાગે 7th પોઝિશન પર બેટિંગમાં મોકલવામાં આવે છે, જ્યાં તેને રમવા માટે ખૂબ ઓછા બોલ મળે છે. રિપોર્ટ્સ અનુસાર, ટીમ મેનેજમેન્ટ હવે વોશિંગ્ટન સુંદરને ટીમમાં લાવવાનું વિચારી રહ્યું છે. સુંદર બેટિંગમાં રિંકુ જેવી જ ક્ષમતા ધરાવે છે અને વધારામાં તે સ્પિન બોલિંગનો વિકલ્પ પણ આપે છે, જે શ્રીલંકા અને ભારતની પિચો પર નિર્ણાયક સાબિત થઈ શકે છે.
અર્શદીપ સિંહ: પિચ કન્ડિશનના કારણે બહાર થઈ શકે છે
ડાબોડી પેસર અર્શદીપ સિંહનું ટીમમાં હોવું કે ન હોવું તે હવે સંપૂર્ણપણે પિચની પ્રકૃતિ પર આધાર રાખે છે. પાકિસ્તાન સામેની હાઈ વોલ્ટેજ મેચમાં ભારતે અર્શદીપને બહાર બેસાડીને કુલદીપ યાદવ જેવા સ્પિનરને રમાડ્યો હતો. જસપ્રીત બુમરાહ અને હાર્દિક પંડ્યા મુખ્ય પેસર તરીકે શાનદાર લયમાં છે. સુપર 8 ની બીજી મેચ ચેન્નાઈમાં રમાવાની છે, જ્યાં સ્પિનરો માટે વધુ મદદ ઉપલબ્ધ હોય છે. આવી સ્થિતિમાં ભારત 3 સ્પિનરો સાથે મેદાનમાં ઉતરે તો અર્શદીપને સુપર 8 ના મહત્ત્વના મુકાબલાઓમાંથી બહાર બેસવું પડી શકે છે.
ટોપ સ્ટોરી
ટ્રેન્ડિંગ સમાચાર
