IND vs NZ: ફાઇનલમાં અભિષેક સંજુનું તોફાન, તોડ્યો 17 વર્ષ જૂનો રેકોર્ડ

અમદાવાદમાં ભારત અને ન્યુઝીલેન્ડ વચ્ચે રમાઈ રહેલી વર્લ્ડ કપ ફાઇનલ 2026 મેચમાં અભિષેક શર્મા અને સંજુ સેમસને તોફાની બેટિંગ કરી 17 વર્ષ જૂનો રેકોર્ડ તોડ્યો. જાણો સંપૂર્ણ સ્કોર.

Abhishek Sharma, Sanju Samson

Source : PTI

Show Quick Read

Key points generated by AI, verified by newsroom

• ભારત-ન્યુઝીલેન્ડ ફાઇનલમાં અભિષેક-સંજુની જોડીએ રેકોર્ડ તોડ્યો.
• 17 વર્ષ બાદ ઓપનિંગ જોડીએ 50+ ભાગીદારીનો વિક્રમ નોંધાવ્યો.
• ભારતે પાવરપ્લેમાં 92 રન ફટકારી સૌથી ઝડપી સ્કોર બનાવ્યો.
• અભિષેક શર્માએ 18 બોલમાં ફિફ્ટી ફટકારી નવો રેકોર્ડ રચ્યો.

અમદાવાદના ઐતિહાસિક નરેન્દ્ર મોદી સ્ટેડિયમ ખાતે આજે ભારત અને ન્યુઝીલેન્ડ વચ્ચે મહામુકાબલો રમાઈ રહ્યો છે. વર્ષ 2026 ના આ વર્લ્ડ કપની અંતિમ ટાઇટલ મેચમાં ટોસ હાર્યા બાદ ભારતીય ટીમને પ્રથમ બેટિંગ કરવાનું આમંત્રણ મળ્યું હતું. શરૂઆતમાં એવું લાગતું હતું કે ટોસ હારવો નુકસાનકારક રહેશે, પરંતુ આ નિર્ણય ભારતીય બેટ્સમેનો માટે આશીર્વાદરૂપ સાબિત થયો છે. ઇનિંગની શરૂઆત કરવા મેદાનમાં ઉતરેલી અભિષેક શર્મા અને સંજુ સેમસનની જોડીએ પ્રથમ ઓવરથી જ કીવી બોલરો પર આક્રમણ શરૂ કરી દીધું હતું. આ બંને ખેલાડીઓએ પાવરપ્લેમાં જ ચોગ્ગા અને છગ્ગાનો ભારે વરસાદ કરીને મેદાનમાં હાજર લાખો ચાહકોને રોમાંચિત કરી દીધા અને ક્રિકેટ જગતમાં એક નવો ઐતિહાસિક રેકોર્ડ પણ પોતાના નામે કરી લીધો છે.

17 વર્ષ જૂનો રેકોર્ડ થયો ધરાશાયી 

ક્રિકેટના આ સૌથી ટૂંકા ફોર્મેટના ઇતિહાસમાં પહેલી વખત એવું બન્યું છે કે કોઈ ખિતાબી જંગમાં બે ઓપનિંગ બેટ્સમેનોએ પ્રથમ વિકેટ માટે 50 રનથી વધુની શાનદાર ભાગીદારી નોંધાવી હોય. અગાઉના આંકડાઓ પર નજર કરીએ તો, વર્ષ 2009 માં રમાયેલી ફાઇનલમાં પાકિસ્તાનના કામરાન અકમલ અને શાહઝૈબ હસને 48 રનની સૌથી મોટી ઓપનિંગ ભાગીદારી કરી હતી. જોકે, હવે પૂરા 17 વર્ષ બાદ ભારતના આ યુવા અને જોશીલા ઓપનરોએ 50 રનની અતૂટ ભાગીદારી કરીને તે મોટો વિક્રમ તોડી નાખ્યો છે. ફાઇનલના દબાણ વચ્ચે આવી બેફિકર રમત રમીને બંનેએ દુનિયાને પોતાની તાકાત બતાવી દીધી છે.

ટીમ ઇન્ડિયાએ રચ્યો વધુ એક કીર્તિમાન 

આજની આ ઐતિહાસિક મેચમાં જાણે બંને છેડેથી માત્ર રનનો વરસાદ જ થઈ રહ્યો હતો. શરૂઆતની માત્ર 4 ઓવરમાં જ ભારતીય ટીમે 50 રનનો જાદુઈ આંકડો પાર કરી લીધો હતો. સેમિફાઇનલ કે ફાઇનલ જેવી કોઈ પણ મોટી મેચમાં આ સૌથી ઝડપી અડધી સદીનો સ્કોર છે. સંજુ સેમસન અને અભિષેક શર્માએ શરૂઆતની 6 ઓવરમાં એટલે કે પાવરપ્લેમાં જ વિરોધી ટીમના બોલરોને હંફાવીને બોર્ડ પર 92 રન ઝૂડી કાઢ્યા હતા. આ ધમાકેદાર શરૂઆતથી એ વાત સ્પષ્ટ થઈ ગઈ છે કે ભારતીય ટીમ આજે એક વિશાળ અને અત્યંત પડકારજનક સ્કોર ઊભો કરવાના મક્કમ ઇરાદા સાથે મેદાનમાં ઉતરી છે.

માત્ર 18 બોલમાં અભિષેકની આક્રમક ફિફ્ટી 

આખી ટુર્નામેન્ટ દરમિયાન રન બનાવવા માટે સતત સંઘર્ષ કરી રહેલા અને ટીકાઓનો સામનો કરી રહેલા યુવા ઓપનર અભિષેક શર્માએ ખરા સમયે પોતાનું અસલી રૌદ્ર સ્વરૂપ બતાવ્યું છે. તેણે મેદાન પર આવતા જ માત્ર 18 બોલનો સામનો કરીને પોતાની તોફાની અડધી સદી પૂરી કરી લીધી હતી. નોકઆઉટ મેચોના ઇતિહાસમાં આ સૌથી ઝડપી અડધી સદીનો નવો રેકોર્ડ છે. આ અગાઉ દક્ષિણ આફ્રિકા સામે ફિન એલને અને સેમિફાઇનલમાં ભારત સામે જેકબ બેથેલે પણ માત્ર 18 બોલમાં આ પરાક્રમ કર્યું હતું. આ સાથે જ આ વર્ષના ટૂર્નામેન્ટની પણ આ સૌથી ઝડપી ફિફ્ટી બની ગઈ છે.

બંને ટીમોના 11 લડવૈયાઓ પર એક નજર

• ભારતીય ટીમ: અભિષેક શર્મા, સંજુ સેમસન (વિકેટકીપર), ઇશાન કિશન, સૂર્યકુમાર યાદવ (કેપ્ટન), તિલક વર્મા, હાર્દિક પંડ્યા, શિવમ દુબે, અક્ષર પટેલ, વરુણ ચક્રવર્તી, અર્શદીપ સિંહ, જસપ્રીત બુમરાહ.

ન્યુઝીલેન્ડ ટીમ: ટિમ સીફર્ટ (વિકેટકીપર), ફિન એલન, રચિન રવિન્દ્ર, ગ્લેન ફિલિપ્સ, માર્ક ચેપમેન, ડેરિલ મિશેલ, જેમ્સ નીશમ, મિશેલ સેન્ટનર (કેપ્ટન), મેટ હેનરી, લોકી ફર્ગ્યુસન, જેકબ ડફી.

આ પણ વાંચો

3 ફાઈનલ, 2 હાર અને 1 જીત; ન્યૂઝીલેન્ડ સામે ફાઈનલમાં ભારતનો રેકોર્ડ જાણી ચોંકી જશો!