IND vs SA: અમદાવાદમાં ભારતની હારનો સૌથી મોટો વિલન કોણ? જાણો કોણે ડૂબાડી ટીમ ઈન્ડિયાની નાવ
IND vs SA Super 8: દક્ષિણ આફ્રિકા દ્વારા આપવામાં આવેલા 188 રનના લક્ષ્યનો પીછો કરતા ટીમ ઈન્ડિયા 111 રનમાં જ ઓલઆઉટ થઈ ગઈ. જાણો કયો ખેલાડી ભારતની હારનો મુખ્ય કારણ બન્યો.
IND vs SA Super 8: ભારતીય ટીમ સુપર-8ની પ્રથમ મેચ હારી ગઈ છે. દક્ષિણ આફ્રિકા દ્વારા મળેલા 188 રનના લક્ષ્યનો પીછો કરતા ટીમ ઈન્ડિયા 111 રન પર ઓલઆઉટ થઈ ગઈ. ટીમ ઈન્ડિયાની હારનું એક મુખ્ય કારણ અભિષેક શર્મા પણ બન્યો. એક તરફ સતત ત્રણ વાર '0' પર આઉટ થવાનું દબાણ, તો બીજી તરફ સુપર-8 જેવી મોટી મેચનું પ્રેશર. આ દબાણ હેઠળ અભિષેક ફરીથી ફ્લોપ રહ્યો. જો અભિષેકે યોગ્ય સમયે સમજદારીપૂર્વક બેટિંગ કરી હોત તો કદાચ ભારતીય ટીમની જીતની તકો વધી જાત.
અભિષેક શર્મા હારનું કારણ, કેવી રીતે?
નરેન્દ્ર મોદી સ્ટેડિયમની પિચ બેટિંગ માટે મદદરૂપ હોય છે, તેથી દક્ષિણ આફ્રિકાએ 187 રન બનાવ્યા તે કોઈ ચોંકાવનારો વિષય નહોતો. હવે બાકીનું કામ ભારતીય બેટ્સમેનોએ કરવાનું હતું. સામે 188 રનનું લક્ષ્ય હતું, ઇન-ફોર્મ બેટ્સમેન ઈશાન કિશન ઇનિંગના ચોથા જ બોલ પર મોટો શોટ રમવાના ચક્કરમાં આઉટ થઈ ગયો. બીજી ઓવરમાં માર્કો જાનસેને તિલક વર્માને પણ પેવેલિયન ભેગો કર્યો. ટીમ ઈન્ડિયા 5 રન પર 2 વિકેટ ગુમાવી ચૂકી હતી. અભિષેક પાસે મોકો હતો કે તે સંયમ જાળવીને સમજદારીભરી ઇનિંગ રમે અને ટીમને મુશ્કેલીમાંથી બહાર કાઢે.
બિનજરૂરી શોટ
સ્કોર 5/2 હતો, તિલકના આઉટ થયા પછી જેવો અભિષેક શર્માને આગામી બોલ મળ્યો તેણે બેટ ફેરવવાનું શરૂ કરી દીધું. જ્યારે ટીમ ઈન્ડિયા બોલિંગ કરી રહી હતી, ત્યારે પણ જોવામાં આવ્યું હતું કે પિચમાં અસામાન્ય ઉછાળો છે, જેનો ખાસ કરીને જસપ્રીત બુમરાહે વેરિએશન દ્વારા ઘણો ફાયદો ઉઠાવ્યો હતો. દક્ષિણ આફ્રિકાના બોલરો પણ આ પરિસ્થિતિનો ફાયદો ઉઠાવવા માંગતા હતા અને અભિષેક સતત હવામાં બેટ ફેરવીને મફતમાં પોતાની વિકેટ આપવાની કોશિશમાં હતો.
હકીકતમાં આવું જ થયું. માર્કો જાનસેને બોલ પર આંગળીઓ ફેરવી (સ્લોઅર બોલ) અને અભિષેકનું બેટ ઘૂમ્યું. જાનસેને સ્લોઅર બોલ ફેંક્યો હોવાથી અભિષેકના શોટનું ટાઈમિંગ ખોટું પડ્યું. આફ્રિકાના ખેલાડીઓ આવો મોટો કેચ છોડે તેમ નહોતા.
થોડા દિવસો પહેલા જ પાકિસ્તાનના પૂર્વ ક્રિકેટર મોહમ્મદ આમિરે અભિષેક શર્માને 'લપ્પેબાજ' કહીને સંબોધ્યો હતો. પરંતુ ભારતીય ઓપનરે બિનઅનુભવી અંદાજમાં શોટ ફટકારીને ક્યાંક ને ક્યાંક આમિરની વાત સાચી સાબિત કરી છે. તિલક અને ઈશાન જલ્દી આઉટ થયા બાદ અભિષેકે ખાતરી કરવી જોઈતી હતી કે તે કેપ્ટન સૂર્યકુમાર યાદવ સાથે મળીને ઓછામાં ઓછી 40-50 રનની પાર્ટનરશિપ કરીને ભારતની મેચમાં વાપસી કરાવે.
ટોપ સ્ટોરી
ટ્રેન્ડિંગ સમાચાર
