મોહમ્મદ સિરાજે જીત્યો ICC નો ખાસ એવોર્ડ, કરિયરમાં પ્રથમ વખત હાંસિલ કરી મોટી ઉપલબ્ધિ
રવિવારે ભારતે એશિયા કપમાં પાકિસ્તાનને 7 વિકેટથી હરાવ્યું હતું. બીજા જ દિવસે ICC એ ઓગસ્ટ મહિના માટે મોહમ્મદ સિરાજને મેન્સ પ્લેયર ઓફ ધ મંથ તરીકે પસંદ કર્યો.
રવિવારે ભારતે એશિયા કપમાં પાકિસ્તાનને 7 વિકેટથી હરાવ્યું હતું. બીજા જ દિવસે ICC એ ઓગસ્ટ મહિના માટે મોહમ્મદ સિરાજને મેન્સ પ્લેયર ઓફ ધ મંથ તરીકે પસંદ કર્યો. મોહમ્મદસિરાજને ઇંગ્લેન્ડ પ્રવાસ પર ઓવલ ટેસ્ટમાં તેની શાનદાર બોલિંગ માટે આ સન્માન આપવામાં આવ્યું છે. મોહમ્મદ સિરાજે ઓગસ્ટ મહિનામાં ફક્ત ઓવલ ટેસ્ટ રમી હતી, જેમાં તેણે બે ઇનિંગ્સમાં 9 વિકેટ લીધી હતી અને ઘાતક સ્પેલ ફેંક્યો હતો.
ઓવલ ટેસ્ટમાં મોહમ્મદ સિરાજના પ્રદર્શનથી ભારતને ટેસ્ટ શ્રેણી 2-2થી પૂર્ણ કરવામાં ઘણી મદદ મળી. ચોથી ઇનિંગ્સમાં ઇંગ્લેન્ડને 374 રનનો લક્ષ્યાંક મળ્યો હતો, પરંતુ સિરાજની 5 વિકેટના કારણે ભારત તે મેચ 6 રનથી જીતવામાં સફળ રહ્યું હતું. તેણે પ્રથમ ઇનિંગ્સમાં 4 વિકેટ પણ લીધી હતી. તેણે ન્યૂઝીલેન્ડના મેટ હેનરી અને વેસ્ટ ઇન્ડીઝના જેડન સીલ્સને હરાવીને આ સન્માન મેળવ્યું છે.
ઓવલ ટેસ્ટમાં મોહમ્મદ સિરાજે બંને ઇનિંગ્સમાં કુલ 46.3 ઓવર ફેંકી હતી. તમને જણાવી દઈએ કે સિરાજ એકમાત્ર ભારતીય ઝડપી બોલર હતો જેણે ઇંગ્લેન્ડ પ્રવાસ પર તમામ 5 ટેસ્ટ મેચ રમી હતી. આ સમગ્ર શ્રેણીમાં, તેણે 185.3 ઓવર ફેંકી, જે સૌથી વધુ હતી. સિરાજે આ ખાસ સન્માન મેળવવા પર ખુશી વ્યક્ત કરી અને કહ્યું કે તેની ટીમના સભ્યો પણ આ પુરસ્કારના એટલા જ હકદાર છે જેટલો તે પોતે છે.
He played a pivotal role in #TeamIndia's memorable performances during the tour of England recently! 👌👌
— BCCI (@BCCI) September 15, 2025
Say hello 👋 to the ICC Men's Player of the Month for August 2025! 🔝
Congratulations, Mohammed Siraj 👏👏@mdsirajofficial pic.twitter.com/Iach0IDK3w
ઇંગ્લેન્ડ સામેની ટેસ્ટ શ્રેણીમાં 23 વિકેટ લીધા બાદ મોહમ્મદ સિરાજને પણ રેન્કિંગમાં ફાયદો થયો. આ અદ્ભુત પ્રદર્શન પછી તે ટેસ્ટ બોલરોની રેન્કિંગમાં 15 મા સ્થાને આવી ગયો. હાલમાં વિશ્વનો નંબર-1 ટેસ્ટ બોલર જસપ્રીત બુમરાહ છે.
ખાસ સન્માન મેળવ્યા બાદ મોહમ્મદ સિરાજે કહ્યું, "મને ગર્વ છે કે હું ટીમ માટે મહત્વપૂર્ણ સ્પેલ ફેંકી શક્યો, ખાસ કરીને નિર્ણાયક ક્ષણોમાં. એક ટોચની ટીમ ઘરઆંગણે રમી રહી હતી તેની ઉચ્ચ સ્તરીય બેટિંગ લાઇન-અપ સામે બોલિંગ કરવી સરળ નહોતી પરંતુ આનાથી મને મારું શ્રેષ્ઠ આપવા માટે પ્રેરણા મળી."
ટોપ સ્ટોરી
ટ્રેન્ડિંગ સમાચાર
