IND vs PAK: રવિવારે શ્રીલંકાના કોલંબો સ્થિત સ્ટેડિયમમાં રમાયેલા ટી20 વર્લ્ડ કપ 2026 ના હાઈ વોલ્ટેજ મુકાબલામાં ભારતે પાકિસ્તાનને શરમજનક હાર આપી હતી. આ ઐતિહાસિક મેચ બાદ સોશિયલ મીડિયા પર એક વીડિયો ભારે વાયરલ થઈ રહ્યો છે, જેમાં પાકિસ્તાનની જર્સી પહેરેલા કેટલાક ક્રિકેટ ચાહકો ભારતનું રાષ્ટ્રગીત 'જન ગણ મન' ગાઈ રહ્યા છે. ખેલદિલી અને પરસ્પર સન્માન દર્શાવતો આ અદભુત નજારો મેચની શરૂઆત પહેલા બંને દેશોના રાષ્ટ્રગીત સમયનો હોવાનું મનાય છે, જેણે આખી દુનિયાના રમતપ્રેમીઓનું ધ્યાન ખેંચ્યું છે અને ઇન્ટરનેટ પર ભારે ચર્ચા જગાવી છે.
પાકિસ્તાની ચાહકોએ ગાયું ભારતીય રાષ્ટ્રગીત
કોલંબોના મેદાન પરથી સામે આવેલા આ વાયરલ વીડિયોમાં સ્પષ્ટ જોઈ શકાય છે કે પાકિસ્તાન ક્રિકેટ ટીમની લીલી જર્સી પહેરેલા અમુક દર્શકો રાષ્ટ્રગીતના સન્માનમાં ઉભા છે અને ગર્વભેર જન ગણ મન ગાઈ રહ્યા છે. તેમની આસપાસ ઉભેલા ભારતીય દર્શકો પણ પૂરા આદર સાથે રાષ્ટ્રગીત ગાઈ રહ્યા છે. બંને દેશો વચ્ચેના રાજકીય તણાવ વચ્ચે મેદાન પર જોવા મળેલું આ દ્રશ્ય રમતગમત દ્વારા ફેલાતા ભાઈચારાનું ઉત્તમ ઉદાહરણ પૂરું પાડે છે.
સોશિયલ મીડિયા પર વીડિયોની ભારે ચર્ચા
આ વીડિયો ઇન્ટરનેટ પર આવતાની સાથે જ લોકો તરફથી વિવિધ પ્રતિક્રિયાઓ મળવા લાગી છે. મોટાભાગના યુઝર્સ આ ઘટનાને ખેલદિલી ગણાવીને પાકિસ્તાની ચાહકોના મુક્તકંઠે વખાણ કરી રહ્યા છે. બીજી તરફ, અમુક લોકોનું માનવું છે કે કેટલાક ચાહકો માત્ર સોશિયલ મીડિયા પર પ્રખ્યાત થવા માટે આવું કરી રહ્યા છે. તેમ છતાં, મોટાભાગનો વર્ગ આ સકારાત્મક અભિગમને હૃદયપૂર્વક આવકારી રહ્યો છે.
ટીમ ઈન્ડિયાનો શાનદાર વિજય અને ઈશાનની તોફાની ઈનિંગ
આ હાઈ પ્રોફાઈલ મેચની વાત કરીએ તો, ભારતીય ટીમે પ્રથમ બેટિંગ કરતા 176 રનનો મજબૂત લક્ષ્યાંક સેટ કર્યો હતો. જેના જવાબમાં પાકિસ્તાની ટીમ 18 ઓવરમાં માત્ર 114 રન બનાવીને પેવેલિયન ભેગી થઈ ગઈ હતી. ભારતની આ ઐતિહાસિક જીતમાં યુવા બેટ્સમેન ઈશાન કિશને 77 રનની વિસ્ફોટક ઈનિંગ રમીને મહત્વનો ફાળો આપ્યો હતો. ઈન્ટરનેટ પર ઈશાનની આક્રમક બેટિંગની પણ ભારે પ્રશંસા થઈ રહી છે.
હાર નિશ્ચિત જોઈને પીસીબી ચેરમેને મેદાન છોડ્યું
ભારતીય બોલરોના તરખાટ સામે પાકિસ્તાની બેટ્સમેનોએ ઘૂંટણ ટેકવી દીધા હતા. મેચમાં પોતાની ટીમની હાર નિશ્ચિત દેખાતા પાકિસ્તાનના ગૃહમંત્રી અને પાકિસ્તાન ક્રિકેટ બોર્ડના ચેરમેન મોહસીન નકવી સહિતના ઉચ્ચ અધિકારીઓ મેચ પૂરી થાય તે પહેલા જ નિરાશ થઈને સ્ટેડિયમ છોડીને ચાલ્યા ગયા હતા. પાકિસ્તાની અધિકારીઓનો આ રકાસ દર્શાવતો કિસ્સો પણ ચર્ચાનો વિષય બન્યો છે.