ભારતીય ટીમે વડાપ્રધાન નરેન્દ્ર મોદી સાથે મુલાકાત કરી હતી. ટીમ ઈન્ડિયાએ પીએમ આવાસ પર વડાપ્રધાન મોદી સાથે મુલાકાત કરી હતી. આ દરમિયાન ભારતીય ખેલાડીઓએ નાસ્તો કર્યો અને વડાપ્રધાન સાથે વાત પણ કરી હતી. તેનો વીડિયો પણ સામે આવ્યો છે. ભારતીય ખેલાડીઓ અને વડાપ્રધાન મોદી વચ્ચે વાતચીત દરમિયાન ખૂબ જ વાતો સાથે મજાક મસ્તી કરી હતી.
આ મુલાકાત બાદ વડાપ્રધાન મોદીએ કહ્યું હતું કે આપણા ચેમ્પિયન્સ સાથે એક શાનદાર મુલાકાત, વર્લ્ડકપ વિજેતા ટીમની યજમાની કરી અને ટુનામેન્ટ દરમિયાનના તેમના અનુભવો પર એક યાદગાર વાતચીત કરી હતી.
વડાપ્રધાને ચેમ્પિયન ખેલાડીઓ અને ટ્રોફી સાથે તસવીરો પણ ખેંચાવી હતી. આ પછી ભારતીય ખેલાડીઓ બસમાં બેસીને દિલ્હી એરપોર્ટ જવા રવાના થયા હતા. અહીંથી ભારતીય ખેલાડીઓ મુંબઈ જશે. આજે મુંબઈમાં મરીન ડ્રાઈવ અને વાનખેડે સ્ટેડિયમ વચ્ચેની વિજય પરેડમાં ભારતીય ખેલાડીઓ પણ ભાગ લેશે.
વીડિયોની શરૂઆત રોહિત શર્માની ટ્રોફી સાથે એન્ટ્રીથી થાય છે. આ પછી બાકીના ખેલાડીઓ અને સપોર્ટ સ્ટાફ પણ અંદર પહોંચી જાય છે. જેમાં રાહુલ દ્રવિડ, વિરાટ કોહલી, ઋષભ પંત જેવા ખેલાડીઓનો સમાવેશ થાય છે.
T20 વર્લ્ડ કપની ટ્રોફીને કેબિનેટ પર રાખવામાં આવી છે. આ પછી આખી ટીમે ટી-20 વર્લ્ડકપ ટ્રોફીને લઇને વડાપ્રધાન મોદી સાથે તસવીરો ક્લિક કરાવી હતી. રોહિત અને દ્રવિડે વડાપ્રધાનને વર્લ્ડકપની ટ્રોફી સોંપી હતી. જય શાહ અને BCCI પ્રમુખ રોજર બિન્ની પાછળ જોવા મળે છે. આ પછી ભારતીય ખેલાડીઓને મીટિંગ હોલમાં બેસાડવામાં આવે છે. વડાપ્રધાન પોતે વચ્ચે બેસીને ખેલાડીઓ સાથે વાત કરતા જોવા મળે છે. આ દરમિયાન ખેલાડીઓ અને વડાપ્રધાન મોદી હસતા જોવા મળે છે.
વડાપ્રધાન મોદી યુઝવેન્દ્ર ચહલ તરફ પણ કેટલાક સંકેતો કરે છે. આના પર રોહિત શર્મા, વિરાટ કોહલી સહિત તમામ ખેલાડીઓ જોરથી હસી પડ્યા હતા. વડાપ્રધાન પણ જોર જોરથી હસતા જોવા મળ્યા હતા. ત્યારબાદ એક પછી એક તમામ ખેલાડીઓ વડાપ્રધાન મોદી સાથે તેમના અનુભવો અને તેમની સફર શેર કરતા જોવા મળ્યા. પૂર્વ મુખ્ય કોચ દ્રવિડ પણ વડાપ્રધાનની સામે પોતાના વિચારો રજૂ કરતા જોવા મળ્યા હતા. હાર્દિક પંડ્યા, જસપ્રીત બુમરાહ પણ વડાપ્રધાન સાથે વાત કરતા જોવા મળ્યા હતા.
તેનો વીડિયો પણ સામે આવ્યો છે. ભારતીય ટીમ આજે સવારે દિલ્હી પહોંચી હતી. ટીમ ઈન્ડિયાએ T20 વર્લ્ડ કપ 2024ની ફાઇનલમાં સાઉથ આફ્રિકાને સાત રનથી હરાવીને ટાઈટલ જીત્યું હતું.