IPL 2026, RCB vs DC Live Scorecard: આજે 18 એપ્રિલ, શનિવારે આઈપીએલ 2026માં ડબલ હેડર જોવા મળશે. બપોરે 3:30 વાગ્યાથી પ્રથમ મુકાબલો રોયલ ચેલેન્જર્સ બેંગલુરુ (RCB) અને દિલ્હી કેપિટલ્સ (DC) વચ્ચે થશે. આ મેચ દ્વારા આરસીબી સીઝનમાં જીતનો પંજો લગાવવા માંગશે. બીજી તરફ, દિલ્હીની નજર જીતની હેટ્રિક પર હશે. તો ચાલો જાણીએ કે મુકાબલામાં બંને ટીમોની પ્લેઈંગ 11, મેદાનનો પિચ રિપોર્ટ અને મેચ પ્રિડિક્શન શું હશે.

એમ ચિન્નાસ્વામી સ્ટેડિયમનો પિચ રિપોર્ટ

તમને જણાવી દઈએ કે આ મુકાબલો બેંગલુરુના એમ ચિન્નાસ્વામી સ્ટેડિયમમાં રમાશે. અહીંની પિચ બેટ્સમેનો માટે સ્વર્ગ માનવામાં આવે છે. બોલરોને ઓછી મદદ મળે છે. ગ્રાઉન્ડ પણ નાનું છે, જેનાથી બેટ્સમેનોની મોજ પડી જાય છે. પરંતુ ખાસ વાત એ છે કે આરસીબીએ લખનૌ વિરુદ્ધ છેલ્લી મેચ પણ આ જ મેદાન પર રમી હતી, જેમાં પ્રથમ ઇનિંગ દરમિયાન પિચ પર બોલરોનો દબદબો જોવા મળ્યો હતો.

પહેલા બેટિંગ કરતા લખનૌ 20 ઓવરમાં 146 રન પર ઓલઆઉટ થઈ ગઈ હતી. જોકે બીજી ઇનિંગમાં આરસીબી તરફથી તાબડતોબ બેટિંગ જોવા મળી હતી. ચેઝ કરતા બેંગલુરુએ 15.1 ઓવરમાં 5 વિકેટથી જીત પોતાના ખાતામાં નાખી દીધી હતી. હવે જોવું રસપ્રદ રહેશે કે આજની મેચમાં પિચ કેવું વર્તન કરે છે.

મેચ પ્રિડિક્શન

અત્યાર સુધી રોયલ ચેલેન્જર્સ બેંગલુરુ અને દિલ્હી કેપિટલ્સ વચ્ચે 33 મુકાબલા રમાઈ ચૂક્યા છે. આ મેચોમાં બેંગલુરુએ લીડ મેળવતા 20માં જીત નોંધાવી છે. બીજી તરફ દિલ્હીએ 12 મેચ પોતાના નામે કરી છે. બંનેનો એક મુકાબલો અનિર્ણિત રહ્યો. વળી વર્તમાન સીઝનમાં પણ આરસીબી શાનદાર પ્રદર્શન કરી રહી છે. આથી, અમારું પ્રિડિક્શન મીટર તો એ જ કહે છે કે મુકાબલામાં બેંગલુરુની જીતની શક્યતા વધુ છે.

આરસીબીની સંભવિત પ્લેઈંગ 11

ફિલ સોલ્ટ, વિરાટ કોહલી, દેવદત્ત પડિક્કલ, રજત પાટીદાર (કેપ્ટન), જિતેશ શર્મા (વિકેટકીપર), ટિમ ડેવિડ, રોમારિયો શેફર્ડ, કૃણાલ પંડ્યા, ભુવનેશ્વર કુમાર, જોશ હેઝલવુડ/જેકબ ડફી, સુયશ શર્મા, રસિખ ડાર.

દિલ્હી કેપિટલ્સની સંભવિત પ્લેઈંગ 11

પથુમ નિસાંકા, કેએલ રાહુલ (વિકેટકીપર), સમીર રિઝવી, ટ્રિસ્ટન સ્ટબ્સ, ડેવિડ મિલર, અક્ષર પટેલ, આશુતોષ શર્મા, ઓકિબ નબી, કુલદીપ યાદવ, લુંગી એનગિડી, ટી. નટરાજન, મુકેશ કુમાર.

19:35 PM (IST) • 18 Apr 2026

RCB vs DC Highlights: દિલ્હીએ એક બોલ બાકી રહેતા બેંગલુરુને 6 વિકેટે હરાવ્યું

RCB vs DC Highlights: દિલ્હી કેપિટલ્સે રોયલ ચેલેન્જર્સ બેંગલુરુને 6 વિકેટે હાર આપી છે. દિલ્હીને છેલ્લી ઓવરમાં જીતવા માટે 15 રન જોઈતા હતા અને બોલિંગ રોમારિયો શેફર્ડને સોંપવામાં આવી હતી. પ્રથમ બે બોલમાં બે રન આવ્યા. ત્યારબાદ 4 બોલમાં 13 રનની જરૂર હતી ત્યારે ડેવિડ મિલરે બે છગ્ગા અને એક ચોગ્ગો ફટકારી દીધો હતો.

આરસીબીએ પ્રથમ બેટિંગ કરતા 175 રન બનાવ્યા હતા. જેના જવાબમાં દિલ્હીએ એક બોલ બાકી રહેતા લક્ષ્યાંક પ્રાપ્ત કરી લીધો હતો. દિલ્હી તરફથી 'બર્થડે બોય' કેએલ રાહુલે 34 બોલમાં 57 રન, ટ્રસ્ટન સ્ટબ્સે 47 બોલમાં અણનમ 60 રન અને ડેવિડ મિલરે 10 બોલમાં અણનમ 22 રન બનાવ્યા હતા.

18:59 PM (IST) • 18 Apr 2026

દિલ્હી કેપિટલ્સનો સ્કોર 125-4

14 ઓવરના અંતે દિલ્હી કેપિટલ્સનો સ્કોર ચાર વિકેટે 125 રન છે. ટ્રસ્ટન સ્ટબ્સ 28 બોલમાં ત્રણ ચોગ્ગા સાથે 33 રન બનાવીને રમી રહ્યો છે. કેપ્ટન અક્ષર પટેલ 13 બોલમાં 22 રન પર છે અને તેઓ ત્રણ ચોગ્ગા ફટકારી ચૂક્યો છે. દિલ્હીને જીતવા માટે હવે 36 બોલમાં 51 રન બનાવવાની જરૂર છે.