Rishabh Pant Injury Update: શ્રીલંકા સામે કોલંબોના સિંહાલીઝ સ્પોર્ટ્સ ક્લબ ગ્રાઉન્ડમાં રમાઈ રહેલી બીજી ટેસ્ટ મેચના પહેલા દિવસે જ ક્રિકેટ ચાહકો અને ટીમ ઈન્ડિયાનું ટેન્શન ત્યારે વધી ગયું, જ્યારે વિકેટકીપર-બેટ્સમેન ઋષભ પંતને ગંભીર ઈજા પહોંચી. જોકે, હવે તેના ચાહકો માટે એક સારા સમાચાર સામે આવ્યા છે.
શોર્ટ બોલ પર પુલ શોટ મારવા જતાં વાગ્યો માર
મેચની વાત કરીએ તો, ભારતે ટોસ જીતીને પહેલા બેટિંગ કરવાનો નિર્ણય લીધો હતો. પહેલા દિવસની રમતના અંતે ભારતે 5 વિકેટ ગુમાવીને 300 રન બનાવી લીધા છે. પરંતુ દિવસના છેલ્લા સેશનમાં એક શોર્ટ બોલ પર પુલ શોટ મારવા જતાં પંતના કાંડાના હાડકામાં જોરદાર બોલ વાગ્યો હતો.
આ ઈજાના કારણે પંત માત્ર 3 રનના વ્યક્તિગત સ્કોર પર રિટાયર્ડ હર્ટ થઈને પેવેલિયન પાછો ફર્યો હતો. તેના ગયા પછી ભારતે વધુ બે વિકેટ ગુમાવી દીધી, છતાં પંત ફરીથી બેટિંગ કરવા મેદાનમાં આવ્યો ન હતો, જેથી તેની ઈજાને લઈને ચિંતા વધી ગઈ હતી.
બેટિંગ કોચે આપી ખુશખબર: પંત સંપૂર્ણ ફિટ છે!
હવે બધાની નજર બીજા દિવસની રમત પર ટકેલી છે. આ દરમિયાન ટીમ ઈન્ડિયાના બેટિંગ કોચ સિતાંશુ કોટકે પંતની ફિટનેસ પર એક મોટું અપડેટ આપ્યું છે.
કોટકે પત્રકારોના સવાલનો જવાબ આપતા સ્પષ્ટ કર્યું છે કે, "પંત હવે સંપૂર્ણપણે સ્વસ્થ છે અને મને નથી લાગતું કે કાલે તેને બેટિંગ કરવામાં કોઈ પણ પ્રકારની સમસ્યા નડવી જોઈએ."
આ નિવેદનથી સ્પષ્ટ થઈ ગયું છે કે પંતની ઈજા મટી ગઈ છે અને તે બીજા દિવસે મેદાન પર પોતાનો કમાલ બતાવવા પાછો આવી શકે છે.
ભારતીય ટીમને 400 કે તેથી વધુના મોટા સ્કોર સુધી પહોંચવા માટે પંતની આ ઇનિંગ ખૂબ જ મહત્વની રહેશે. તમને યાદ જ હશે કે, અગાઉ ગેલ ટેસ્ટની બીજી ઇનિંગમાં પણ પંતે શાનદાર અડધી સદી ફટકારીને પોતાનો દમ બતાવ્યો હતો.
આ પણ વાંચોઃ કોલંબો ટેસ્ટમાં શુભમન ગિલનો કમાલ: તોડ્યો વિરાટ કોહલીનો મોટો રેકોર્ડ, રચ્યો નવો ઇતિહાસ
દેવદત્ત પડિકલની શાનદાર સદી
મેચના પહેલા દિવસે યુવા બેટ્સમેન દેવદત્ત પડિકલે જબરદસ્ત પ્રદર્શન કર્યું હતું.
તેણે 117 રનની શાનદાર સદી ફટકારીને ભારતને 300 રનના આંકડા સુધી પહોંચાડવામાં મુખ્ય ભૂમિકા ભજવી હતી.
આ ઉપરાંત કેપ્ટન શુભમન ગિલ, જે ગેલ ટેસ્ટમાં કંઈ ખાસ નહોતો કરી શક્યો, તેણે પણ ફોર્મમાં પરત ફરતાં 50 રન બનાવ્યા હતા.
જોકે, દિવસના અંતિમ સેશનમાં બેટિંગ કરવા આવેલા રવિન્દ્ર જાડેજાએ રમત પૂરી થાય તે પહેલા જ 43 રનના સ્કોર પર પોતાની વિકેટ ગુમાવી દીધી હતી.