WTC Final માં કારમી હાર બાદ ઓસ્ટ્રેલિયાના આ દિગ્ગજો પર લટકી તલવાર, કરાશે ટીમમાંથી બહાર ?
WTC Final 2025: આ હારથી ઓસ્ટ્રેલિયન ટીમની બેટિંગમાં રહેલી નબળાઈઓ છતી થઈ ગઈ, ખાસ કરીને ટોપ ઓર્ડરની નિષ્ફળતાએ કેપ્ટનને વિચારવા માટે મજબૂર કરી દીધા છે
WTC Final 2025: 14 જૂને લોર્ડ્સમાં રમાયેલી વર્લ્ડ ટેસ્ટ ચેમ્પિયનશિપ (WTC) ફાઇનલમાં દક્ષિણ આફ્રિકા સામે 5 વિકેટથી મળેલી હારથી ઓસ્ટ્રેલિયાના કેપ્ટન પેટ કમિન્સને મોટો ફટકો પડ્યો છે. આ હાર 15 વર્ષમાં ICC ફાઇનલમાં ઓસ્ટ્રેલિયાની પહેલી હાર છે.
આ હારથી ઓસ્ટ્રેલિયન ટીમની બેટિંગમાં રહેલી નબળાઈઓ છતી થઈ ગઈ, ખાસ કરીને ટોપ ઓર્ડરની નિષ્ફળતાએ કેપ્ટનને વિચારવા માટે મજબૂર કરી દીધા છે. હાર બાદ કમિન્સે સંકેત આપ્યો કે આગામી ટેસ્ટ શ્રેણી પહેલા ટીમમાં મોટા ફેરફારો થઈ શકે છે.
પેટ કમિન્સે ટોપ ઓર્ડર પર પ્રશ્નો ઉઠાવ્યા
ઓસ્ટ્રેલિયાને આ ફાઇનલ જીતવા માટે મજબૂત દાવેદાર માનવામાં આવતું હતું. ટીમનો 10 ICC ટ્રોફીનો શાનદાર રેકોર્ડ હતો, જેમાં 6 ODI વર્લ્ડકપ, 2 ચેમ્પિયન્સ ટ્રૉફી, 1 T20 વર્લ્ડકપ અને 1 WTC ટાઇટલનો સમાવેશ થાય છે. પરંતુ કેપ્ટન ટેમ્બા બાવુમાના નેતૃત્વમાં દક્ષિણ આફ્રિકાએ શાનદાર પ્રદર્શન કર્યું અને 27 વર્ષ પછી તેની પ્રથમ ICC ટ્રોફી જીતી.
મેચમાં ઓસ્ટ્રેલિયાની બેટિંગ સંપૂર્ણપણે નિષ્ફળ ગઈ. ટોસ હાર્યા બાદ પહેલા બેટિંગ કરવા આવેલી ઓસ્ટ્રેલિયન ટીમની શરૂઆત સારી રહી ન હતી. ઓપનર ઉસ્માન ખ્વાજા બંને ઇનિંગ્સમાં ફ્લોપ રહ્યા અને 0 અને 6 રન બનાવીને આઉટ થયા. માર્નસ લાબુશેનને ઓપનિંગ કરવાની તક આપવામાં આવી હતી, પરંતુ તે પણ કંઈ ખાસ કરી શક્યો નહીં. ત્રીજા નંબરે આવેલા કેમેરોન ગ્રીન પણ રન બનાવવામાં નિષ્ફળ રહ્યા. આ ખેલાડીઓના ખરાબ ફોર્મે ઓસ્ટ્રેલિયાને મુશ્કેલીમાં મુકી દીધું.
કમિન્સ ટીમમાં ફેરફાર કરી શકે છે
મેચ પછીની પ્રેસ કોન્ફરન્સમાં પેટ કમિન્સે કહ્યું, "પહેલા બેટિંગ કરવી સરળ નહોતી, પરંતુ અમારા ટોપ ઓર્ડરે વધુ સારું પ્રદર્શન કરવું જોઈતું હતું. અમે હવે નવેસરથી શરૂઆત કરવાનું વિચારી રહ્યા છીએ." તેમણે એમ પણ કહ્યું કે વેસ્ટ ઈન્ડિઝ સામેની આગામી ટેસ્ટ શ્રેણી પહેલા ટીમની વ્યૂહરચના અને ખેલાડીઓ પર પુનર્વિચાર કરવામાં આવશે.
કમિન્સે કહ્યું, "અમારી પાસે થોડા અઠવાડિયા છે. આ હાર સમજ્યા પછી, અમે નક્કી કરીશું કે હવે પરિવર્તનનો યોગ્ય સમય છે કે આપણે વર્તમાન ટીમ સાથે આગળ વધવું જોઈએ."
ટોપ સ્ટોરી
ટ્રેન્ડિંગ સમાચાર
