IPL 2026 ની તૈયારીઓ વચ્ચે ચેન્નાઈ સુપર કિંગ્સ (CSK) ની ટીમમાં એક બહુ મોટો અને ચોંકાવનારો ફેરફાર જોવા મળ્યો છે. રાજસ્થાન રોયલ્સ (RR) ના કેપ્ટન અને સ્ટાર વિકેટકીપર-બેટ્સમેન સંજુ સેમસન હવે CSK માં જોડાઈ ગયો છે. ચેન્નાઈએ પોતાના દિગ્ગજ ઓલરાઉન્ડર રવિન્દ્ર જાડેજા અને સેમ કરનને રાજસ્થાનને આપીને તેમની સામે સેમસનને પોતાની ટીમમાં ટ્રેડ કર્યો છે. સંજુ સેમસનને CSK દ્વારા પૂરા ₹18 કરોડનો તોતિંગ પગાર ચૂકવવામાં આવશે, જે ટીમના વર્તમાન કેપ્ટન ઋતુરાજ ગાયકવાડ જેટલો જ છે. આ મેગા ડીલ સ્પષ્ટ કરે છે કે ધોની પછી વિકેટકીપિંગની કમાન હવે સેમસન જ સંભાળશે.
ધોનીના વિકલ્પ તરીકે સેમસન પર કળશ ઢોળાયો
ચેન્નાઈની ટીમમાં હવે એમએસ ધોનીના અનુગામી તરીકે સંજુ સેમસનને જોવામાં આવી રહ્યો છે. રુતુરાજ ગાયકવાડ પહેલેથી જ કેપ્ટન તરીકેની જવાબદારી ખૂબ સારી રીતે નિભાવી રહ્યો છે, ત્યારે થાલા ધોનીની વિદાય પછી વિકેટની પાછળ સેમસન જ જોવા મળશે. આ ડીલ કેટલી મોટી છે તેનો અંદાજ એ વાત પરથી જ લગાવી શકાય કે, CSK મેનેજમેન્ટે જાડેજા અને સેમ કરન જેવા બે વર્લ્ડ-ક્લાસ ઓલરાઉન્ડર્સને જતા કરીને સેમસન પર પસંદગી ઉતારી છે. આ દર્શાવે છે કે ચેન્નાઈ સેમસનને પોતાનું લાંબા ગાળાનું ભવિષ્ય માની રહી છે.
CSK માં સેમસનનો પગાર કેટલો હશે?
જો તમને એમ હોય કે સેમસનને ચેન્નાઈ તરફથી કેટલી રકમ મળી હશે, તો જણાવી દઈએ કે IPL 2025 માં રાજસ્થાન રોયલ્સે તેને ₹18 કરોડનો પગાર આપ્યો હતો. ચેન્નાઈ સુપર કિંગ્સે પણ તેને એટલી જ રકમમાં ટ્રેડ કર્યો છે. એટલે કે, IPL 2026 માં પીળી જર્સીમાં રમવા માટે સેમસનને ₹18 કરોડ મળશે. આ સાથે જ સેમસન CSK માં સૌથી વધુ કમાણી કરનારા બે ખેલાડીઓમાં સામેલ થઈ ગયો છે. તેના સિવાય માત્ર કેપ્ટન રુતુરાજ ગાયકવાડ જ ₹18 કરોડનો પગાર મેળવે છે. બીજી બાજુ, દિગ્ગજ એમએસ ધોનીને તો મિની-ઓક્શન પહેલા અનકેપ્ડ પ્લેયર તરીકે માત્ર ₹4 કરોડમાં જ જાળવી (રિટેન) રાખવામાં આવ્યો છે.
સંજુ સેમસનનું અત્યાર સુધીનું IPL કરિયર
પોતાના લાંબા IPL કરિયરમાં સંજુ સેમસન અત્યાર સુધી માત્ર બે જ ફ્રેન્ચાઇઝી માટે રમ્યો છે, ચેન્નાઈ સુપર કિંગ્સ તેની ત્રીજી ટીમ બનશે.
તેણે દિલ્હી કેપિટલ્સ (DC) તરફથી રમતા 28 મેચમાં 677 રન બનાવ્યા હતા.
જોકે, તેની કારકિર્દીનો સૌથી મોટો અને સોનેરી સમય રાજસ્થાન રોયલ્સ સાથે વીત્યો છે, જ્યાં તેણે 149 મેચ રમીને 4,027 રન ફટકાર્યા છે.
એકંદરે જોઈએ તો, સેમસને પોતાના IPL કરિયરમાં અત્યાર સુધી કુલ 4,704 રન બનાવ્યા છે, જેમાં શાનદાર 3 સદી અને 26 અડધી સદીનો સમાવેશ થાય છે.