ICC T20 World Cup 2026: 2026 T20 વર્લ્ડ કપની બીજી મેચ વેસ્ટ ઈન્ડિઝ અને સ્કોટલેન્ડ વચ્ચે રમાઈ રહી છે. આ મુકાબલામાં શિમરોન હેટમાયર (Shimron Hetmyer) એ ક્રિસ ગેલનો 16 વર્ષ જૂનો રેકોર્ડ તોડી નાખ્યો છે. હેટમાયરે T20 વર્લ્ડ કપના ઇતિહાસમાં વેસ્ટ ઈન્ડિઝ માટે સૌથી ઝડપી અર્ધશતક ફટકારવાનો રેકોર્ડ પોતાના નામે કરી લીધો છે. તેણે સ્કોટલેન્ડ વિરુદ્ધ માત્ર 22 બોલમાં પોતાની ફિફ્ટી પૂરી કરી હતી. અર્ધશતક પૂરું કરવા સુધીમાં તેણે પોતાની ઇનિંગમાં 6 છગ્ગા અને 1 ચોગ્ગો ફટકાર્યો હતો.
ક્રિસ ગેલનો 16 વર્ષ જૂનો રેકોર્ડ તૂટ્યો
શિમરોન હેટમાયરે સ્કોટલેન્ડ સામે 22 બોલમાં અર્ધશતક ફટકાર્યું, જે T20 વર્લ્ડ કપમાં વેસ્ટ ઈન્ડિઝ માટે સૌથી ઝડપી ફિફ્ટી છે. આ પહેલા આ રેકોર્ડ ક્રિસ ગેલ (Chris Gayle) ના નામે હતો, જેમણે 2009 ના વર્લ્ડ કપમાં ઓસ્ટ્રેલિયા સામે 23 બોલમાં અર્ધશતક પૂરું કર્યું હતું. હેટમાયરે તેમના કરતા એક બોલ ઓછો રમીને ફિફ્ટી પૂરી કરી છે. ગેલ પછી આ યાદીમાં શાઈ હોપ(Shai Hope) નું નામ આવે છે, જેમણે 2024 વર્લ્ડ કપમાં 24 બોલમાં અર્ધશતક પૂરું કર્યું હતું.
વેસ્ટ ઈન્ડિઝ માટે સૌથી ઝડપી ફિફ્ટી (T20 World Cup):
22 બોલ - શિમરોન હેટમાયર - 2026
23 બોલ - ક્રિસ ગેલ - 2009
24 બોલ - શાઈ હોપ - 2024
આંતરરાષ્ટ્રીય T20 ક્રિકેટની વાત કરીએ તો, વેસ્ટ ઈન્ડિઝ માટે સૌથી ઝડપી ફિફ્ટી ફટકારવાનો રેકોર્ડ આજે પણ ક્રિસ ગેલના નામે જ છે. તેમણે વર્ષ 2015 માં દક્ષિણ આફ્રિકા સામે 17 બોલમાં ફિફ્ટી પૂરી કરી હતી. પરંતુ સૌથી ઝડપી 'વર્લ્ડ કપ ફિફ્ટી' ના મામલે શિમરોન હેટમાયર હવે તેમનાથી આગળ નીકળી ગયા છે.
યુવરાજ સિંહ છે સૌથી આગળ
T20 વર્લ્ડ કપના ઇતિહાસમાં સૌથી ઝડપી અર્ધશતક ફટકારવાનો રેકોર્ડ છેલ્લા 19 વર્ષથી યુવરાજ સિંહ (Yuvraj Singh) ના નામે છે. તેમણે 2007 વર્લ્ડ કપમાં ઇંગ્લેન્ડ સામેની મેચમાં માત્ર 12 બોલમાં ફિફ્ટી પૂરી કરી હતી. તે મેચ યુવરાજ સિંહના 6 છગ્ગા માટે હંમેશા યાદ રાખવામાં આવે છે.