SRH Practice Match Scorecard: IPL 2026 શરૂ થતા પહેલા અભિષેક શર્માનું બેટ જોરદાર રીતે ચાલી રહ્યું છે. 21 માર્ચના રોજ સનરાઇઝર્સ ટીમના ખેલાડીઓ વચ્ચે ઈન્ટ્રાસ્ક્વોડ મેચ રમાઈ હતી, જેમાં અભિષેક શર્માએ 94 રનની તોફાની ઇનિંગ રમી હતી. અભિષેકનું ટી20 વર્લ્ડ કપમાં પ્રદર્શન મિશ્ર રહ્યું હતું, પરંતુ આઈપીએલ 2026 પહેલા તે શાનદાર ફોર્મમાં દેખાઈ રહ્યો છે. પ્રેક્ટિસ મેચમાં તેણે પોતાની ઇનિંગ દરમિયાન 8 ચોગ્ગા અને 7 છગ્ગા ફટકાર્યા હતા.
8 ચોગ્ગા અને 7 છગ્ગા
'SRH A' ટીમ માટે અભિષેક શર્માએ આશરે 224 ના તોફાની સ્ટ્રાઈક રેટથી રમતા 42 બોલમાં 94 રન બનાવ્યા અને પોતાની ટીમ માટે સૌથી વધુ રન બનાવનાર બેટ્સમેન રહ્યો. કારણ કે આ એક સિમ્યુલેશન મેચ હતી, તેથી અભિષેક SRH B માટે પણ બેટિંગ કરવા આવ્યો હતો, પરંતુ આ વખતે તે 4 બોલમાં માત્ર 12 રન જ બનાવી શક્યો. SRH A માટે અભિષેક શર્માએ 94 રન બનાવ્યા, તો બીજી તરફ SRH B માટે ઈશાન કિશને કહેર વર્તાવ્યો હતો. ઈશાન કિશને 25 બોલમાં 72 રનની તોફાની ઇનિંગ રમીને મેદાન ગજવ્યું હતું.
ટી20 વર્લ્ડ કપ ટુર્નામેન્ટમાં અભિષેક શર્માનું પ્રદર્શન નિરાશાજનક રહ્યું હતું. 8 ઇનિંગ્સમાં તે માત્ર 141 રન જ બનાવી શક્યો હતો, પરંતુ સારી વાત એ રહી કે તેણે એક શાનદાર ઇનિંગ સાથે વર્લ્ડ કપને વિદાય આપી. ન્યુઝીલેન્ડ સામેની ફાઈનલ મેચમાં તેણે 21 બોલમાં 52 રનની વિસ્ફોટક ઇનિંગ રમીને ભારતની 96 રનથી મળેલી રેકોર્ડ જીતમાં મહત્વની ભૂમિકા ભજવી હતી.
SRH ની પહેલી મેચ ક્યારે?
IPL 2026 ની શરૂઆત 28 માર્ચથી થશે અને ટુર્નામેન્ટનો પ્રારંભ રોયલ ચેલેન્જર્સ બેંગલુરુ વિરુદ્ધ સનરાઇઝર્સ હૈદરાબાદની મેચથી થશે. RCB ડિફેન્ડિંગ ચેમ્પિયન છે અને તેમને હરાવીને સનરાઇઝર્સ હૈદરાબાદ પોતાના અભિયાનની શરૂઆત ધમાકેદાર રીતે કરવા ઈચ્છશે.
સનરાઇઝર્સ હૈદરાબાદ માટે માઠા સમાચાર પણ છે, કારણ કે ટીમના નિયમિત કેપ્ટન પેટ કમિન્સ ઈજાના કારણે શરૂઆતની મેચોમાં રમી શકશે નહીં. કેટલીક મેચોમાં ઈશાન કિશન ટીમની કેપ્ટનશીપ કરતો જોવા મળશે.
અભિષેક શર્મા બનાવી શકે છે આ મોટો રેકોર્ડ
સનરાઇઝર્સ હૈદરાબાદ તરફથી રમનાર અભિષેક શર્મા 2019 થી ટીમનો ભાગ છે અને દરેક સિઝનમાં તેના પ્રદર્શનમાં સુધારો થયો છે. IPL 2025 સુધીમાં તેણે સનરાઇઝર્સ હૈદરાબાદ માટે 74 મેચમાં કુલ 96 છગ્ગા ફટકાર્યા છે. હવે, IPL 2026 માં ફક્ત ચાર છગ્ગા ફટકારીને તે ટીમ માટે 100 છગ્ગા સુધી પહોંચી જશે. આમ કરીને, તે સનરાઇઝર્સ હૈદરાબાદ માટે 100 કે તેથી વધુ છગ્ગા ફટકારનાર બીજો બેટ્સમેન બનશે.
ઓસ્ટ્રેલિયાના દિગ્ગજ બેટ્સમેન ડેવિડ વોર્નર હાલમાં આ યાદીમાં ટોચનું સ્થાન ધરાવે છે. તેમણે 2014 થી 2021 દરમિયાન સનરાઇઝર્સ હૈદરાબાદ માટે 95 મેચમાં 143 છગ્ગા ફટકાર્યા હતા. તેમની કેપ્ટનશીપ હેઠળ ટીમે 2016 માં IPL ટાઇટલ પણ જીત્યું હતું.
એક મોટો રેકોર્ડ બનાવવાની તક
અભિષેક શર્મા પાસે IPL 2026 માં વધુ એક મોટો રેકોર્ડ બનાવવાની તક છે. તે સનરાઇઝર્સ હૈદરાબાદ માટે 2000 રન પૂરા કરવાની નજીક છે. આ સીમાચિહ્ન હાંસલ કરવા માટે તેમને ફક્ત 247 રનની જરૂર છે. જો તે આ સીમાચિહ્ન પાર કરશે તો તે ટીમ માટે 2000 રન બનાવનાર ચોથો બેટ્સમેન બનશે.