Suryakumar Yadav captaincy controversy: ભારતીય T20 ક્રિકેટ ટીમમાં એક મોટો અને ચોંકાવનારો ફેરફાર જોવા મળ્યો છે. સ્ટાર બેટ્સમેન સૂર્યકુમાર યાદવને T20 ટીમની કેપ્ટનશીપ પરથી હટાવી દેવામાં આવ્યા છે અને તેમની જગ્યાએ શ્રેયસ ઐયરને નવી કમાન સોંપવામાં આવી છે. અત્યાર સુધી એવું માનવામાં આવતું હતું કે સૂર્યાને તેના ખરાબ ફોર્મના કારણે કેપ્ટન પદેથી હટાવવામાં આવ્યો છે, પરંતુ હવે આ મામલે એક મોટી અંદરની વાર્તા (ઈનસાઇડ સ્ટોરી) બહાર આવી છે. રિપોર્ટ્સ મુજબ, સૂર્યકુમારના એક 'ઘમંડી નિવેદન'ના કારણે મુખ્ય કોચ ગૌતમ ગંભીર નારાજ થઈ ગયા હતા અને પરિણામે સૂર્યાએ પોતાની કેપ્ટનશીપ ગુમાવવી પડી છે.
સૂર્યાનું એ નિવેદન જે ગંભીરને પસંદ નહોતું આવ્યું
મીડિયા રિપોર્ટ્સનું માનીએ તો, ગૌતમ ગંભીરે પસંદગીકારો (સિલેક્ટર્સ) સાથે મળીને સૂર્યાને કેપ્ટન પદેથી હટાવવાનો નિર્ણય લીધો હતો. આ પાછળનું મુખ્ય કારણ સૂર્યાનું એક નિવેદન હતું. થોડા સમય પહેલા જ સૂર્યાએ નિવેદન આપ્યું હતું કે તે 2028 માં લોસ એન્જલસ ઓલિમ્પિકમાં ભારતીય ક્રિકેટ ટીમને ગોલ્ડ મેડલ અપાવવા માંગે છે. સાથે જ તેણે 2028 ના T20 વર્લ્ડ કપ જીતવા વિશે પણ મોટી મોટી વાતો કરી હતી. અહેવાલો મુજબ, ગૌતમ ગંભીરને સૂર્યાનું આ ઓવર-કોન્ફિડન્સ વાળું 'ઘમંડી નિવેદન' જરાય પસંદ નહોતું આવ્યું. ગંભીરે સૂર્યાને સ્પષ્ટ શબ્દોમાં કહી દીધું હતું કે ટીમમાં તેનું સ્થાન અને કેપ્ટનશીપ માત્ર તેના તાજેતરના પ્રદર્શન પર જ આધારિત રહેશે, ભવિષ્યની વાતો કરવાથી નહીં.
લાંબા સમયથી ખરાબ ફોર્મ સામે ઝઝૂમી રહ્યો હતો સૂર્યા
નિવેદન સિવાય, સૂર્યકુમાર યાદવ છેલ્લા ઘણા સમયથી બેટિંગમાં ખરાબ ફોર્મ સામે પણ ઝઝૂમી રહ્યો હતો. ભલે તેની કેપ્ટનશીપ હેઠળ ટીમ ઈન્ડિયાએ 2026 નો T20 વર્લ્ડ કપ જીત્યો હોય, પરંતુ એક બેટ્સમેન તરીકે તેનું અંગત પ્રદર્શન કંઈ ખાસ પ્રભાવશાળી નહોતું. આ ઉપરાંત, તાજેતરમાં જ પૂરી થયેલી IPL 2026 માં પણ સૂર્યાનું બેટ સાવ શાંત રહ્યું હતું. આખી ટૂર્નામેન્ટમાં તેણે માત્ર 20.77 ની સરેરાશથી 270 રન જ બનાવ્યા હતા, જે 2017 પછી IPL માં તેનું સૌથી ખરાબ પ્રદર્શન માનવામાં આવે છે.
આ પણ વાંચોઃ ઐતિહાસિક ટેસ્ટ જીત બાદ ટીમ ઈન્ડિયામાં મોટો ફેરફાર, વનડે સિરીઝમાંથી 7 ખેલાડી આઉટ
સૂર્યકુમાર યાદવની આંતરરાષ્ટ્રીય કારકિર્દી
સૂર્યકુમાર યાદવની આંતરરાષ્ટ્રીય કારકિર્દી પર નજર કરીએ તો, તેણે ભારત માટે ત્રણેય ફોર્મેટમાં ક્રિકેટ રમી છે, પરંતુ તેને સૌથી વધુ સફળતા T20 ફોર્મેટમાં જ મળી છે. તેણે અત્યાર સુધીમાં 1 ટેસ્ટ, 37 વનડે અને 113 T20 ઇન્ટરનેશનલ મેચ રમી છે. પોતાની એકમાત્ર ટેસ્ટમાં તેણે 8 રન બનાવ્યા હતા. જ્યારે 35 વનડે ઇનિંગ્સમાં 4 અડધી સદીની મદદથી 773 રન બનાવ્યા છે. પોતાના સૌથી મજબૂત ફોર્મેટ એટલે કે 107 T20 ઇનિંગ્સમાં સૂર્યાએ 36.35 ની શાનદાર સરેરાશ અને 162.94 ના સ્ટ્રાઇક રેટથી 3272 રન ફટકાર્યા છે, જેમાં 4 સદી અને 25 અડધી સદી સામેલ છે.
આ પણ વાંચોઃ ટીમ ઈન્ડિયાનો ઐતિહાસિક વિજય: અફઘાનિસ્તાનને 1 ઇનિંગ અને 300 રનથી કચડીને નવો રેકોર્ડ