તો શું મહેન્દ્ર સિંહ ધોનીએ IPL ને કહી દીધુ અલવિદા? ગુજરાત ટાઇટન્સ સામેની હાર બાદ રુતુરાજ ગાયકવાડનું નિવેદન વાયરલ

ચેન્નાઈ સુપર કિંગ્સ તેમની અંતિમ મેચ હાર્યા બાદ IPL 2026 પ્લેઓફ રેસમાંથી બહાર ફેંકાઈ ગઈ છે. મેચ પછી, કેપ્ટન રુતુરાજ ગાયકવાડને પૂછવામાં આવ્યું કે શું મહેન્દ્ર સિંહ ધોની આગામી સિઝનમાં રમશે. તેમનો જવાબ વાયરલ થઈ ગયો છે.

મહેન્દ્ર સિંહ ધોની

Source : એબીપી અસ્મિતા

Show Quick Read

Key points generated by AI, verified by newsroom

• CSK 140 રનમાં ઓલઆઉટ, ગુજરાત સામે 89 રનથી હાર્યું.
• રુતુરાજ ગાયકવાડ: લક્ષ્ય સુધી પહોંચવામાં ટીમ નિષ્ફળ રહી.
• ઈજાઓ અને ખેલાડીઓની અછત સીઝનમાં ટીમ માટે મુશ્કેલ.
• ધોની આગામી સિઝન રમશે કે કેમ, તે આવતા વર્ષે જાણવા મળશે.

MAHENDRA SINGH DHONI: ગુજરાતના હોમ ગ્રાઉન્ડ નરેન્દ્ર મોદી સ્ટેડિયમમાં ગઈકાલે રાત્રે એવો નજારો જોવા મળ્યો જેણે કરોડો ચાહકોના દિલ તોડી નાખ્યા. ગઈકાલે રાત્રે ચેન્નાઈ સુપર કિંગ્સ અને ગુજરાત ટાઇટન્સ વચ્ચે એક એવો મુકાબલો થયો જેમાં CSK એ પોતાની શાખ બચાવવાની હતી, પરંતુ ચેન્નાઈની આખી ટીમ માત્ર 140 રનમાં જ સમેટાઈ ગઈ અને 89 રનથી હારનો સામનો કરવો પડ્યો. આ હારને કારણે ટીમ પ્લેઓફની રેસમાંથી પણ બહાર થઈ ગઈ છે. મેચ બાદ કેપ્ટન રુતુરાજ ગાયકવાડે જણાવ્યું કે તેમની ટીમ નોકઆઉટમાં સ્થાન મેળવવાની આશા જીવંત રાખવા માટે વહેલી તકે લક્ષ્ય પ્રાપ્ત કરવા માંગતી હતી, પરંતુ તેમ કરવામાં નિષ્ફળ રહી. ટોસ હારીને બેટિંગ કરવા ઉતરેલી ગુજરાત ટાઇટન્સની ટીમે 229 રનનો પહાડ જેવો સ્કોર ઉભો કર્યો હતો. બીજી તરફ, ગુજરાતના શાનદાર બોલરોએ CSK ના બેટ્સમેનોને 14મી ઓવરમાં 140 રને ઓલઆઉટ કરીને ધજ્જિયા ઉડાવી દીધી હતી.

 

કેપ્ટન રુતુરાજ ગાયકવાડે શું કહ્યું?

મેચમાં પરાજય બાદ રુતુરાજ ગાયકવાડે કહ્યું, ‘અમે લક્ષ્યને વહેલી તકે હાંસલ કરવા માંગતા હતા. જ્યારે તમે 230 રનના લક્ષ્યનો પીછો કરી રહ્યા હોવ, ત્યારે તે બોલિંગ આક્રમણ સામે આ સરળ હોતું નથી. અમે મોટું જોખમ લીધું, જેનો શ્રેય તેમને જાય છે. શરૂઆતમાં વિકેટ થોડી નરમ હતી, તેમણે સારી શરૂઆત કરી. પાવરપ્લેમાં અમારી બોલિંગ સારી નહોતી. તેમના ઓપનિંગ બેટ્સમેનોને રોકવા મુશ્કેલ હતા. અમારી પાસે તેમને 200 રનથી ઓછા સ્કોર પર રોકવાની તક હતી, પરંતુ અમે તેમ કરી શક્યા નહીં.’

કેપ્ટન રુતુરાજે ટીમની ઈજાઓ અને બેટ્સમેનોની કમી વિશે જણાવતા કહ્યું, ‘આ એક મુશ્કેલ સીઝન રહી છે. સતત ત્રણ હાર બાદ અમને લય મળી હતી. અમે સાચી જગ્યાએ બોલિંગ કરી પરંતુ ઈજાઓએ અમને પરેશાન કર્યા. ઘોષ અને ઓવરટનના બહાર થવાથી અમારી ટીમનું સંતુલન બગડી ગયું. છેલ્લી ત્રણ મેચમાં અમારી પાસે એક બેટ્સમેન અથવા બોલરની કમી હતી.’

શું એમએસ ધોની આગામી સીઝન રમશે?

મહેન્દ્ર સિંહ ધોની ઈજાના કારણે વર્તમાન સીઝનમાં એક પણ મેચ રમી શક્યા નથી, તેના પર ગાયકવાડને પૂછવામાં આવ્યું કે શું મહેન્દ્ર આગામી સીઝન રમશે? આના પર ગાયકવાડે કહ્યું, ‘તમને અને મને, અમને બંનેને આવતા વર્ષે આ બાબતે ખબર પડશે. તેમની ખોટ અમને ખૂબ જ પડી. તેઓ છેલ્લી ઓવરોમાં આવીને માત્ર ક્રિઝ પર ટકી રહીને જ મેચનું પાસું બદલી શકે છે. આગામી સીઝન વિશે અત્યારે કંઈ કહી શકાય નહીં, પરંતુ અમારી પાસે જે ખેલાડીઓ છે તેનાથી અમે ખૂબ ખુશ છીએ.’

આ પણ વાંચો

GT vs CSK: અમદાવાદમાં ગુજરાત ટાઇટન્સની 89 રને જીત, IPL 2026 માં CSK પ્લેઓફમાંથી બહાર

શુભમન ગિલે CSK સામે રચ્યો ઈતિહાસ, ટી20 માં કોહલીનો રેકોર્ડ તોડાવાથી ચૂક્યો