કેનેડાના યુવરાજે રચ્યો ઈતિહાસ: ન્યૂઝીલેન્ડ સામે વર્લ્ડ કપમાં સદી ફટકારનાર સૌથી યુવા ખેલાડી

Yuvraj Samra Century: ટી20 વર્લ્ડ કપ 2026 માં કેનેડાના યુવરાજ સામરાએ ન્યૂઝીલેન્ડ સામે 110 રન ફટકારી ઈતિહાસ રચ્યો. તે વર્લ્ડ કપમાં સદી ફટકારનાર સૌથી નાની ઉંમરનો ખેલાડી બન્યો. જાણો સંપૂર્ણ વિગતો.

Yuvraj Samra Century

Source : ICC

Show Quick Read

Key points generated by AI, verified by newsroom

Canada vs New Zealand T20 WC: ટી20 વર્લ્ડ કપ 2026 માં મંગળવાર, 17 ફેબ્રુઆરી 2026 ના રોજ ચેન્નાઈના MA ચિદમ્બરમ સ્ટેડિયમ ખાતે રમાયેલી રોમાંચક મેચમાં કેનેડાના યુવા ઓપનર યુવરાજ સામરાએ વિશ્વ ક્રિકેટમાં સનસનાટી મચાવી દીધી છે. ન્યૂઝીલેન્ડ જેવી મજબૂત ટીમ સામેની કરો યા મરો જેવી મેચમાં સામરાએ માત્ર 65 બોલમાં 110 રનની ઐતિહાસિક ઇનિંગ રમીને નવો કીર્તિમાન સ્થાપિત કર્યો છે. આ ઇનિંગ સાથે તે ટી20 વર્લ્ડ કપના ઇતિહાસમાં સદી ફટકારનાર સૌથી નાની ઉંમરનો ખેલાડી બની ગયો છે. જોકે, સામરાની આ શાનદાર સદી છતાં ન્યૂઝીલેન્ડે આ મેચ 8 વિકેટથી જીતીને સુપર 8 માં પોતાનું સ્થાન પાકું કરી લીધું છે.

સૌથી યુવા સેન્ચુરિયન: યુવરાજ સિંહ સાથેનું ખાસ કનેક્શન

કેનેડાના આ 19 વર્ષીય બેટ્સમેન યુવરાજ સામરાનો જન્મ 29 સપ્ટેમ્બર 2006 ના રોજ થયો હતો. રસપ્રદ વાત એ છે કે, તેના પિતા ભારતના દિગ્ગજ ક્રિકેટર યુવરાજ સિંહના મોટા પ્રશંસક હોવાથી તેનું નામ 'યુવરાજ' રાખવામાં આવ્યું હતું. ન્યૂઝીલેન્ડ સામેની ઇનિંગમાં આ ડાબોડી બેટ્સમેને 11 ચોગ્ગા અને 6 આકાશંભી છગ્ગા ફટકારીને કીવી બોલરોને લાચાર કરી દીધા હતા. તે એસોસિયેટ નેશન તરફથી ટી20 વર્લ્ડ કપમાં સદી ફટકારનાર પ્રથમ ખેલાડી પણ બન્યો છે.

મેચનો અહેવાલ: કેનેડાનું મજબૂત લક્ષ્યાંક અને કીવી ટીમનો પલટવાર

ટોસ જીતીને પ્રથમ બેટિંગ કરતા કેનેડાએ નિર્ધારિત 20 ઓવરમાં 4 વિકેટ ગુમાવીને 173 રનનો મજબૂત સ્કોર બનાવ્યો હતો. યુવરાજ અને કેપ્ટન દિલપ્રીત બાજવા (36 રન) એ પ્રથમ વિકેટ માટે 116 રનની ભાગીદારી કરી હતી. 174 રનના વિજયી લક્ષ્યાંકનો પીછો કરવા ઉતરેલી ન્યૂઝીલેન્ડની શરૂઆત નબળી રહી હતી. ફિન એલન (21) અને ટિમ સીફર્ટ (6) સસ્તામાં આઉટ થતા કેનેડાને જીતની આશા જાગી હતી. જોકે, રચિન રવિન્દ્રના 59 અને ગ્લેન ફિલિપ્સના ઝંઝાવતી 76 રનની મદદથી ન્યૂઝીલેન્ડે આ લક્ષ્યાંક આસાનીથી હાંસલ કરી લીધો હતો.

યુવરાજ સામરાની કારકિર્દી પર એક નજર

યુવરાજ સામરા અત્યાર સુધી કેનેડા માટે 18 ટી20 આંતરરાષ્ટ્રીય અને 8 વનડે મેચ રમી ચૂક્યો છે. નાની ઉંમરે તેની બેટિંગમાં જોવા મળતી પરિપક્વતાએ વિશ્વભરના ક્રિકેટ વિશ્લેષકોનું ધ્યાન ખેંચ્યું છે. શ્રીલંકાના પથુમ નિસાન્કા બાદ આ ટૂર્નામેન્ટમાં સદી ફટકારનાર તે બીજો બેટ્સમેન બન્યો છે, પરંતુ સૌથી ઓછી ઉંમરે આ સિદ્ધિ મેળવીને તેણે પોતાનું નામ સુવર્ણ અક્ષરે લખાવ્યું છે.

આ પણ વાંચો

ઇમરાન ખાનના સપોર્ટમાં આવ્યા ગાવસ્કર-કપિલ દેવ: 14 દિગ્ગજ કેપ્ટનોએ પાકિસ્તાન સરકારને પત્ર લખ્યો