FIFA વર્લ્ડ કપ 2026 ગ્રુપ E મેચમાં જર્મન ફૂટબોલ ટીમે કુરાકાઓ ફૂટબોલ ટીમને 7-1 થી હરાવી જે તેમની પહેલી મેચ રમી રહી હતી. જર્મનીએ સમગ્ર મેચ દરમિયાન શાનદાર પ્રદર્શન કર્યું અને કુરાકાઓને કોઈ તક આપી નહોતી. જર્મનીએ મેચની પહેલી મિનિટથી જ આક્રમક રમત રમી હતી. ફેલિક્સ નેમેચાએ છઠ્ઠી મિનિટે ગોલ કરીને શરૂઆત કરી હતી. કુરાકાઓ માટે લિવાનો કોમેનેસિયાએ 21મી મિનિટે એકમાત્ર ગોલ કર્યો હતો.
જર્મની માટે નેમેચા ઉપરાંત નિકો શ્લોટરબેક (38મી મિનિટ), કાઈ હાવર્ટ્ઝ (45મી મિનિટ + 5મી પેનલ્ટી), જમાલ મુસિયાલા (47મી મિનિટ), નાથાનિએલ બ્રાઉન (68મી મિનિટ), ડેનિઝ ઉન્ડાવ (78મી મિનિટ) અને હાવર્ટ્ઝ (88મી મિનિટ) એ ગોલ કર્યા હતા. જર્મનીએ મેચમાં 26 શોટ માર્યા જેમાંથી 11 ટાર્ગેટ પર હતા. કુરાકાઓએ 6 શોટ માર્યા જેમાંથી 2 ગોલ ટાર્ગેટ પર હતા.
જર્મનીએ આ સિદ્ધિ હાંસલ કરી
21મી સદીમાં ફક્ત પાંચ ફિફા વર્લ્ડ કપ મેચ એવી રહી છે જેમાં કોઈ ટીમે 7 કે તેથી વધુ ગોલ કર્યા હોય. ઉલ્લેખનીય છે કે, જર્મનીએ આ સિદ્ધિ ત્રણ વખત હાંસલ કરી છે. તેઓએ 2002માં સાઉદી અરેબિયાને 8-0થી હરાવ્યું હતું. તેઓએ 2014ની સેમિફાઇનલમાં બ્રાઝિલને 7-1થી હરાવ્યું હતું. હવે, તેઓએ કુરાકાઓને 7-1થી હરાવીને આ પ્રતિષ્ઠિત યાદીમાં વધુ એક યાદગાર વિજય ઉમેર્યો છે.
મેનુઅલ નોયરે ઇતિહાસ રચ્યો
મેનુઅલ નોયરે મેદાનમાં ઉતરતાની સાથે જ જર્મન ફૂટબોલ ઇતિહાસમાં એક નવો રેકોર્ડ બનાવ્યો હતો. 40 વર્ષ અને 79 દિવસમાં તે વર્લ્ડ કપ અથવા યુરો જેવી મોટી ટુર્નામેન્ટમાં જર્મની માટે રમનાર સૌથી મોટી ઉંમરનો ખેલાડી બન્યો હતો. તેણે લોથર મેથ્યુસનો રેકોર્ડ તોડ્યો, જેણે 39 વર્ષ અને 91 દિવસની ઉંમરે યુરો 2000માં પોર્ટુગલ સામે રમ્યો હતો.
જર્મનીએ બનાવ્યો આ રેકોર્ડ
જર્મની ફિફા વર્લ્ડ કપના ઇતિહાસમાં સૌથી વધુ ગોલ કરનારી ટીમ બની ગઈ છે. તેણે 239 ગોલ કર્યા છે અને બ્રાઝિલ (238) ને પાછળ છોડી દીધું હતું. 2014 વર્લ્ડ કપ પછી જર્મનીએ પહેલી વાર ટૂર્નામેન્ટની તેની શરૂઆતની મેચ જીતી છે.