ઈજાગ્રસ્ત સાહાના સ્થાને ચોથી ટેસ્ટમાં આ ખેલાડીને મળ્યું સ્થાન, જાણો કોણ છે

8 વર્ષ પછી ટેસ્ટ ટીમમાં વાપસી કરીને મોહાલીમાં 42 અને 67 રનની ઈનિંગો રમનાર પાર્થિવ પટેલને પસંદગીકારોને પ્રભાવિત કરવાનો વધુ એક મોકો મળશે. બીસીસીઆઈ સચિવ અજય શિર્કેએ એક જાહેરાતમાં કહ્યું છે કે પાર્થિવ પટેલ 8 ડિસેમ્બર 2016થી મુંબઈમાં શરૂ થનાર 5 ટેસ્ટ મેચોની સીરિઝની ચોથી ટેસ્ટ માટે ભારતીય ટીમમાં સ્થાન બનાવી રાખશે.

સાહાએ વિશાખાપટ્ટનમમાં બીજી ટેસ્ટ દરમિયાન જમણી જાંઘમાં ઈજા થઈ હતી અને તેને આગામી ટેસ્ટથી આરામ આપવામાં આવ્યો હતો. સૂત્રોના મતે, બીસીસીઆઈની મેડિકલ ટીમે સ્પષ્ટતા કરી છે કે વિકેટકીપર રિદ્ધિમાન સાહા પોતાની ઈજામાંથી બહાર નીકળી શક્યો નથી. જેના કારણે ચોથી ટેસ્ટમાં મેડિકલ ટીમે તેને આરામ આપવાની સલાહ આપી હતી. બીસીસીઆઈની મેડિકલ ટીમ વિકેટકીપર અને બેટ્સમેનની પ્રગતિ પર નજર રાખી રહી છે.

આ તમામ વાતો વચ્ચે પહેલી ત્રણ ટેસ્ટ માટે ટીમનો ભાગ બનેલા દિલ્લીના ઝડપી બોલર ઈશાંત શર્માને તેના લગ્ન માટે રિલીઝ કરવામાં આવ્યો છે. બીજી અને ત્રીજી ટેસ્ટ ક્રમશ: 246 અને 8 વિકેટથી જીત્યા પછી પાંચ મેચોની સીરિઝમાં 2-0થી ભારત આગળ ચાલી રહ્યું છે.