Ajinkya Rahane unwanted record: IPL 2026 ની રોમાંચક મેચો વચ્ચે કોલકાતા નાઈટ રાઈડર્સ (KKR) ના કેપ્ટન અને ઓપનિંગ બેટ્સમેન અજિંક્ય રહાણેનું ખરાબ ફોર્મ ચર્ચાનો વિષય બન્યું છે. રવિવારે રમાયેલી રાજસ્થાન રોયલ્સ (RR) સામેની મેચમાં ભલે KKR એ હારેલી બાજી જીતી લીધી હોય, પરંતુ શૂન્ય (0) રને આઉટ થઈને રહાણેએ એક એવો શરમજનક રેકોર્ડ પોતાના નામે કરી લીધો છે, જે કોઈ પણ ખેલાડી પોતાના નામે કરવા નહીં ઈચ્છે. રહાણે હવે IPL ના ઇતિહાસમાં ઓપનર તરીકે સૌથી વધુ વખત 'ડક' (શૂન્ય) પર આઉટ થનાર બેટ્સમેન બની ગયો છે. સળંગ બીજી વખત ખાતું ખોલાવ્યા વગર આઉટ થતાં હવે ટીમના ઓપનિંગ ઓર્ડરને લઈને મોટા સવાલો ઊભા થઈ રહ્યા છે.
પાર્થિવ પટેલનો રેકોર્ડ તૂટ્યો
કોલકાતા નાઈટ રાઈડર્સની કમાન સંભાળી રહેલા અજિંક્ય રહાણે માટે અત્યારે સમય કંઈ સારો ચાલી રહ્યો નથી. રાજસ્થાન સામેની મેચમાં 0 પર આઉટ થવાની સાથે જ તેણે પૂર્વ ભારતીય વિકેટકીપર બેટ્સમેન પાર્થિવ પટેલનો રેકોર્ડ તોડી નાખ્યો છે. રહાણે હવે IPL માં ઓપનર તરીકે કુલ 12 વખત શૂન્ય પર આઉટ થઈ ચૂક્યો છે. આ પહેલા ગુજરાત સામેની મેચમાં પણ તે ખાતું ખોલાવ્યા વિના જ પેવેલિયન ભેગો થઈ ગયો હતો.
IPL માં ઓપનર તરીકે સૌથી વધુ વખત 0 પર આઉટ થનાર ખેલાડીઓ:
12 વખત - અજિંક્ય રહાણે
11 વખત - પાર્થિવ પટેલ
10 વખત - શિખર ધવન
10 વખત - ગૌતમ ગંભીર
9 વખત - ડેવિડ વોર્નર
IPL 2026 માં રહાણેનું નિરાશાજનક પ્રદર્શન
જો આપણે આ સિઝનમાં રહાણેના પ્રદર્શન પર નજર કરીએ તો, તેની શરૂઆત તો ધમાકેદાર રહી હતી. IPL 2026 ની પોતાની પહેલી જ મેચમાં તેણે 67 રનની શાનદાર ઇનિંગ રમી હતી (જોકે એ મેચ KKR હારી ગયું હતું). પણ ત્યારબાદ જાણે તેના બેટને કાટ લાગી ગયો હોય તેમ, પછીની 6 ઇનિંગ્સમાંથી 4 માં તો તે બે આંકડા (ડબલ ડિજિટ) સુધી પણ પહોંચી શક્યો નથી. ચાલુ સિઝનમાં રમાયેલી 7 મેચોમાં તેના નામે માત્ર 152 રન જ નોંધાયા છે.
કેવી રહી મેચની સ્થિતિ?
ઇડન ગાર્ડન્સના મેદાન પર રમાયેલી આ મેચની વાત કરીએ તો, રાજસ્થાન રોયલ્સે પ્રથમ બેટિંગ કરતા માત્ર 155 રનનો સામાન્ય ટાર્ગેટ આપ્યો હતો. KKR ના બોલરોએ શાનદાર પ્રદર્શન કર્યું હતું, જેમાં વરુણ ચક્રવર્તીએ 4 ઓવરમાં માત્ર 14 રન આપીને 3 વિકેટ, કાર્તિક ત્યાગીએ 4 ઓવરમાં 22 રન આપીને 3 વિકેટ અને સુનિલ નારાયણે 2 વિકેટ ઝડપી હતી.
પરંતુ, 156 રનના લક્ષ્યાંકનો પીછો કરવા ઉતરેલી KKR ની શરૂઆત અત્યંત ખરાબ રહી હતી. ઇનિંગની પહેલી જ ઓવરમાં ટિમ સેફર્ટ (0) અને બીજી ઓવરમાં અજિંક્ય રહાણે (0) આઉટ થઈ ગયા. ત્યારબાદ આવેલા ઈમ્પેક્ટ પ્લેયર અંગક્રિશ રઘુવંશી (10), કેમેરોન ગ્રીન (27), રોવમેન પોવેલ (23) અને રમનદીપ સિંહ (10) પણ સસ્તામાં પેવેલિયન પરત ફર્યા હતા. માત્ર 13.3 ઓવરમાં 85 રનના સ્કોર પર KKR એ પોતાની 6 મહત્વની વિકેટો ગુમાવી દીધી હતી અને એવું લાગતું હતું કે મેચ હાથમાંથી ગઈ.
રિંકુ સિંહ બન્યો સંકટમોચક
જ્યારે આખી ટીમ મુશ્કેલીમાં હતી, ત્યારે મેદાન પર ફરી એકવાર રિંકુ સિંહનો જાદુ ચાલ્યો. રિંકુએ ધીરજપૂર્વક બાજી સંભાળી અને માત્ર 34 બોલમાં 53 રનની અણનમ અને મેચ-વિનિંગ અડધી સદી ફટકારીને આખી ગેમ પલટી નાખી. તેને સાથ આપતા અનુકુલ રોયે પણ 16 બોલમાં અણનમ 29 રન ફટકાર્યા. આ બંનેની શાનદાર ભાગીદારીને કારણે KKR એ 4 વિકેટથી આ શાનદાર જીત હાંસલ કરી લીધી.