(Source: Poll of Polls)
Asia Cup 2025 માટે ભારત આવશે પાકિસ્તાનની ટીમ, 'ઓપરેશન સિંદૂર' બાદ ભારત સરકારે દાખવી ઉદારતા
બિહારના રાજગીરમાં 27 ઓગસ્ટથી શરૂ થશે એશિયા કપ; ત્રણેય મંત્રાલયોની મંજૂરી બાદ પાકિસ્તાની ખેલાડીઓની વિઝા પ્રક્રિયા શરૂ.
Pakistan hockey team India visit: ભારત અને પાકિસ્તાન વચ્ચેના તણાવપૂર્ણ સંબંધો છતાં, ભારત સરકારે એક મોટો અને ઉદાર નિર્ણય લીધો છે. પાકિસ્તાનની હોકી ટીમ એશિયા કપ 2025 માં ભાગ લેવા માટે ભારત આવવા જઈ રહી છે. આ નિર્ણય દર્શાવે છે કે ભારત સરકાર રાજકારણ અને રમતગમતને અલગ રાખવાના ઓલિમ્પિક ચાર્ટરના સિદ્ધાંતોનું પાલન કરવા પ્રતિબદ્ધ છે.
બિહારના રાજગીરમાં યોજાશે એશિયા કપ
આગામી એશિયા કપ ઓગસ્ટ 27 થી શરૂ થશે અને સપ્ટેમ્બર 7 સુધી રમાશે. આ વખતે આ પ્રતિષ્ઠિત ટૂર્નામેન્ટ બિહારના રાજગીરમાં યોજાશે. 'ટાઇમ્સ ઓફ ઇન્ડિયા'ના અહેવાલ મુજબ, કેન્દ્રીય ગૃહ મંત્રાલય, વિદેશ મંત્રાલય અને રમતગમત મંત્રાલય - એમ ત્રણેય મંત્રાલયોએ પાકિસ્તાની ટીમને ભારત આવવાની મંજૂરી આપી દીધી છે. આ સાથે જ, પાકિસ્તાની ખેલાડીઓની વિઝા પ્રક્રિયા પણ શરૂ થઈ ગઈ છે.
'ઓપરેશન સિંદૂર' બાદ બદલાયેલું વાતાવરણ
ઉલ્લેખનીય છે કે, પહેલગામમાં થયેલા આતંકવાદી હુમલા અને ત્યારબાદ હાથ ધરાયેલા 'ઓપરેશન સિંદૂર' પછી ભારત અને પાકિસ્તાન વચ્ચેના સંબંધો ઘણા બગડ્યા હતા. જેને કારણે પાકિસ્તાન ટીમની ભારત ખાતેની ભાગીદારી પર શંકા વ્યક્ત કરવામાં આવી રહી હતી. જોકે, 'ઓપરેશન સિંદૂર' બાદ, ભારત સરકારે ઉદારતા દાખવીને પાકિસ્તાની ટીમને મંજૂરી આપી છે, જે બંને દેશો વચ્ચેના સંબંધોમાં એક સકારાત્મક સંકેત તરીકે જોવામાં આવે છે.
રમતગમત મંત્રાલયની સ્પષ્ટતા
રમતગમત મંત્રાલયના એક સૂત્રએ આ અંગે સ્પષ્ટતા કરતા જણાવ્યું હતું કે, "અમે બહુ-રાષ્ટ્રીય ઇવેન્ટ્સમાં ભારતમાં રમનારી કોઈપણ ટીમની વિરુદ્ધ નથી. પરંતુ દ્વિપક્ષીય શ્રેણીઓનો મામલો અલગ હોય છે." સૂત્રએ વધુમાં ઉમેર્યું કે, "પાકિસ્તાનની હોકી ટીમ એશિયા કપ અને જુનિયર વર્લ્ડ કપ માટે ભારત આવશે, કારણ કે અન્ય ટીમો પણ આવી રહી છે. સંબંધિત મંત્રાલયો પાસેથી જરૂરી મંજૂરીઓ મેળવવામાં આવી છે. ભારતે ઓલિમ્પિક ચાર્ટરનું પાલન કરવું પડશે. આપણે કોઈ દેશને ભાગ લેતા રોકી શકતા નથી."
પ્રતિબંધનો ખતરો ટળ્યો
ભારત સરકારનો આ નિર્ણય રાજકારણ અને રમતગમતને અલગ રાખવા તેમજ આંતરરાષ્ટ્રીય ઓલિમ્પિક સમિતિ (IOC) ના ઓલિમ્પિક ચાર્ટરના નિયમોનું પાલન કરવાના પ્રયાસોનો એક ભાગ છે. જો ભારતે પાકિસ્તાનની ટીમને આ બે હોકી સ્પર્ધાઓમાં ભાગ લેતા અટકાવી હોત, તો તેને આંતરરાષ્ટ્રીય ઓલિમ્પિક સમિતિ તરફથી પ્રતિબંધનો સામનો કરવો પડ્યો હોત. આ નિર્ણયથી ભારતે રમતગમતના વૈશ્વિક મંચ પર પોતાની પ્રતિષ્ઠા જાળવી રાખી છે.
ટોપ સ્ટોરી
ટ્રેન્ડિંગ સમાચાર
