Google New Memo: દિગ્ગજ ટેક કંપની ગૂગલે તાજેતરમાં જ વર્કપ્લેસને લઇને નવો આદેશ આપ્યો છે જે ઘણા કર્મચારીઓની મુશ્કેલીઓ વધારી શકે છે. આ વર્ષે ફેબ્રુઆરી મહિનામાં ગૂગલે પોતાની ક્લાઉડ અને એચઆર ટીમમાંથી ઘણા લોકોને કાઢી મૂક્યા હતા. આ પાછળ ગુગલે જે કારણ આપ્યું છે તે હતું કે તે વધુ સારી રીતે કાર્ય કરે અને કંપનીમાં બનાવેલા સ્તરોને હટાવવા નિર્ણય લીધો છે.
આ ઉપરાંત ગૂગલે આ મહિનાની શરૂઆતમાં ડિવાઇસ વિભાગ અને અન્ય એકમોમાં પોસ્ટ કરાયેલા સેંકડો કર્મચારીઓને પણ છૂટા કર્યા હતા. ધ સ્ટ્રીટ અનુસાર, આ યુનિટમાં લગભગ 25,000 કર્મચારીઓ ફુલ ટાઇમ પર કામ કરી રહ્યા છે જે એન્ડ્રોઇડ, પિક્સેલ, ક્રોમ, ફિટબિટ અને અન્ય ગૂગલ ડિવાઇસ અને એપ્લિકેશન્સમાં તૈનાત છે.
ગૂગલના નિર્ણયથી મુશ્કેલીઓમાં વધારો
ટેક કંપનીએ છટણી પહેલા તેના કર્મચારીઓને ચેતવણી આપી હતી અને બાયઆઉટની ઓફર પણ કરી હતી. કર્મચારીઓને કાઢી મૂક્યા પછી કંપનીએ હવે બીજો નિર્ણય લીધો છે જે કર્મચારીઓની મુશ્કેલીઓમાં વધારો કરશે. આ નિર્ણયથી કંપનીના ઘણા યુનિટ પ્રભાવિત થઈ શકે છે. સીએનબીસીના અહેવાલ મુજબ, ગૂગલે તેના શહેરથી દૂર વિસ્તારોમાં કામ કરતા પોતાના કર્મચારીઓને કહ્યું છે કે જો તેઓ અઠવાડિયામાં ત્રણ દિવસ ઓફિસમાં નહીં આવે તો તેઓ તેમની નોકરી ગુમાવી શકે છે.
કંપનીએ આ સંદર્ભમાં એક આંતરિક મેમોરેન્ડમ જાહેર કર્યું છે. તે ગૂગલ ટેકનિકલ સર્વિસીસ કર્મચારીઓ માટે કાર્ય વ્યવસ્થામાં ફેરફારો વિશે માહિતી પ્રદાન કરે છે. વધુમાં ગૂગલ ટેકનિકલ સર્વિસીસના કર્મચારીઓને સંપૂર્ણપણે રિમોટ વર્કથી હાઇબ્રિડ મોડેલ તરફ જવા માટે કહેવામાં આવી રહ્યું છે.
કર્મચારીઓની મુશ્કેલીઓ વધી
આ માટે ગૂગલ કર્મચારીઓને એક વખતનો ખર્ચ પણ આપી રહ્યું છે જેથી તેઓ ઓફિસથી પચાસ માઈલ દૂર મુસાફરી કરી શકે. જોકે, ઓફિસથી 50 માઈલની અંદર રહેતા લોકો ઘરેથી કામ કરી શકે છે. કર્મચારીઓને મોકલવામાં આવેલા બીજા એક મેમોમાં કહેવામાં આવ્યું છે કે તેઓએ અઠવાડિયામાં ત્રણ કે પાંચ દિવસ ઓફિસમાં કામ કરવા માટે ચોક્કસ સમયમર્યાદા નક્કી કરવી જોઈએ, નહીં તો ટર્મિનેશન થવા માટે તૈયાર રહેવું જોઈએ.