નવી દિલ્હી: 'હેલો, ડિયર યુઝર.... આ ટેલિકોમ્યુનિકેશન વિભાગ છે, તમને જણાવવા માંગુ છું કે તમારા નામે નોંધાયેલ આ મોબાઈલ નંબર આગામી બે કલાકમાં બંધ થઈ જશે. વધુ માહિતી માટે 9 દબાવો.' અજાણ્યા મોબાઈલ નંબર પરથી કોલ આવ્યા બાદ લોકોને આ પ્રકારના રેકોર્ડેડ મેસેજ મળી રહ્યા છે. મોટાભાગના લોકો આવા કોલને કારણે માત્ર ટેન્શનમાં જ નથી આવતા પરંતુ ઉતાવળમાં નવ નંબર દબાવીને તેમનો નંબર કયા કારણોસર બંધ થશે તે જાણવાનો પ્રયાસ પણ કરે છે. મોબાઈલ યુઝર્સને દરરોજ આવા ઘણા કોલ આવી રહ્યા છે. જો તમને પણ આવા ફોન આવે તો ગભરાશો નહીં. આ કોલ ભારત સરકારના ટેલિકોમ વિભાગ દ્ધારા કરવામા આવતો નથી પરંતુ આ પ્રકારના કોલ સાયબર ઠગ દ્ધારા કરાઇ રહ્યા છે.
સિમના ગેરકાયદેસર ઉપયોગનો બતાવે છે ડર
સાયબર પોલીસ અધિકારીના જણાવ્યા અનુસાર, વીજળી બિલ અને ગેસ બિલ પછી દિલ્હી-એનસીઆરના ઘણા લોકો ટેલિકોમ વિભાગના નામે આ નવા પ્રકારના કૌભાંડનો સામનો કરી રહ્યા છે. ભારત સરકારના ડીઓટી (ટેલિકમ્યુનિકેશન વિભાગ) એ પોતે લોકોને આવા કોલ સામે ચેતવણી જાહેર કરી છે. સાયબર પોલીસ અધિકારીના જણાવ્યા અનુસાર, છેલ્લા કેટલાક સમયથી ટેલિકોમ્યુનિકેશન વિભાગના નામ પર આવતા કોલના ઘણા કેસ નોંધાયા છે.રેકોર્ડ કરેલા કોલમાં કહેવામાં આવ્યું છે કે બે કલાક પછી મોબાઈલ નંબર ડિસ્કનેક્ટ થઈ જશે. કેટલાક કિસ્સામાં તો ધમકીઓ પણ આપવામાં આવે છે કે તેમનો મોબાઈલ નંબર ગેરકાયદેસર પ્રવૃત્તિમાં વપરાયો છે. આવી સ્થિતિમાં સાવધાન રહો. વિભાગ આવા કોલ કરતું નથી. વિદેશી મૂળના મોબાઈલ નંબરો પરથી આવતા વોટ્સએપ કોલ્સથી પણ સાવચેત રહો જેમાં છેતરપિંડી કરનારાઓ સરકારી અધિકારીઓ હોવાનો ઢોંગ કરે છે.
'ચક્ષુ'ને આવા કોલની ફરિયાદ કરો
વાસ્તવમાં Chakshu એ DoT એટલે કે ભારત સરકારના ટેલિકોમ્યુનિકેશન વિભાગનું એક ઓનલાઈન પોર્ટલ છે જે લોકોને સાયબર ક્રાઈમ, નાણાકીય છેતરપિંડી, ઓળખ બદલીને છેતરપિંડી, છેતરપિંડી કોલ, SMS અથવા WhatsAppની જાણ કરવાની મંજૂરી આપે છે. જેમ કે બેન્ક એકાઉન્ટ, વોલેટ, સિમ, ગેસ કનેક્શન, વીજળી કનેક્શન, કેવાયસી અપડેટ, સેક્સટોર્શન સંબંધિત મેસેજ અંગે તમે અહી ફરિયાદ કરી શકો છો. લોકોને સતર્ક રહેવાની અપીલ કરતા, ટેલિકોમ્યુનિકેશન વિભાગ કહે છે કે તેઓએ સંચાર સાથી પોર્ટલ www.sancharsaathi.gov.in/sfc પર આવી કોઈપણ છેતરપિંડીની જાણ કરવી જોઈએ જ્યાં ચક્ષુ નામથી પેજ ખુલે છે. ત્યાં તમારી વિગતો ભરો. આવી માહિતી મેળવવાથી વિભાગને સાયબર ક્રાઇમ અને નાણાકીય છેતરપિંડીનો સામનો કરવામાં મદદ મળે છે. આ ઉપરાંત જો કોઈ વ્યક્તિ સાયબર ક્રાઈમ અથવા નાણાકીય છેતરપિંડીનો શિકાર બન્યો હોય તો તેણે તેના વિશે સાયબર ક્રાઈમ હેલ્પ નંબર 1930 અને www.cybercrime.gov.in પર જાણ કરવી જોઈએ.