Jio voice only plans: રિલાયન્સ જિયો અને ભારતી એરટેલના કરોડો ગ્રાહકો માટે એક ખૂબ જ રાહત આપનારા સમાચાર સામે આવ્યા છે. તહેવારોની સિઝનમાં બંને દિગ્ગજ ટેલિકોમ કંપનીઓએ પોતાના યુઝર્સને એક શાનદાર ભેટ આપી છે.
અત્યાર સુધી ગ્રાહકોએ નાછૂટકે એવા મોંઘા પ્લાન લેવા પડતા હતા જેમાં કોલિંગની સાથે ઇન્ટરનેટ ડેટા પણ આવતો હોય. પરંતુ હવે આ કંપનીઓએ ખાસ 'વોઇસ-ઓન્લી' એટલે કે માત્ર કોલિંગની જ સુવિધા આપતા સસ્તા પ્લાન લોન્ચ કર્યા છે.
આ નવા રિચાર્જ પ્લાન ખાસ કરીને એવા સબ્સ્ક્રાઇબર્સ માટે ખૂબ જ ફાયદાકારક સાબિત થશે, જેઓ પોતાના ફોનનો ઉપયોગ માત્ર વાતચીત કરવા પૂરતો જ કરે છે અને તેમને મોંઘા સ્માર્ટફોન કે ઇન્ટરનેટ ડેટાની કોઈ જ જરૂર હોતી નથી.
જિયોના 147 રૂપિયાથી શરૂ થતા નવા પ્લાનની વિગતો
રિલાયન્સ જિયોએ પોતાના ગ્રાહકોની પાયાની જરૂરિયાતને ધ્યાનમાં રાખીને કુલ 4 નવા વોઇસ-ઓન્લી પ્લાન બજારમાં મૂક્યા છે. આ શ્રેણીમાં સૌથી પહેલો અને સસ્તો પ્લાન 147 રૂપિયાનો છે.
જિયોના આ 147 રૂપિયાના પ્લાનમાં ગ્રાહકોને 22 દિવસની વેલિડિટી મળે છે. આ સમયગાળા દરમિયાન યુઝર્સ કોઈપણ નેટવર્ક પર અમર્યાદિત (Unlimited) વોઇસ કોલ કરી શકશે. સાથે જ તેમને 300 SMS નો લાભ પણ મળશે. આ હિસાબે ગ્રાહકને દૈનિક કોલિંગનો ખર્ચ માત્ર 6.68 રૂપિયા પડે છે.
જિયોનો બીજો પ્લાન 177 રૂપિયાનો છે, જેમાં 28 દિવસની વેલિડિટી આપવામાં આવી છે. આમાં પણ ગ્રાહકોને અનલિમિટેડ કોલિંગ અને 300 SMS ની સુવિધા મળે છે. આ પ્લાન લેનાર યુઝરને રોજના માત્ર 6.32 રૂપિયાનો ખર્ચ આવે છે.
લાંબી વેલિડિટી અને કેલેન્ડર મહિનાના વિકલ્પો
જે ગ્રાહકો પૂરા એક મહિનાની વેલિડિટી ઈચ્છે છે, તેમના માટે જિયોએ 196 રૂપિયાનો પ્લાન રજૂ કર્યો છે. આ પ્લાન પૂરા 30 દિવસ સુધી ચાલે છે અને તેમાં દૈનિક ખર્ચ 6.53 રૂપિયા આવે છે. તેમાં પણ અમર્યાદિત કોલિંગ અને 300 SMS ની સુવિધા સામેલ છે.
આ ઉપરાંત, કંપનીએ 197 રૂપિયાનો એક ખાસ 'કેલેન્ડર મહિના' નો પ્લાન પણ લોન્ચ કર્યો છે. આનો સીધો અર્થ એ છે કે તમે જે તારીખે રિચાર્જ કરાવશો, આવતા મહિને તે જ તારીખે તમારું રિચાર્જ પૂરું થશે. મહિનો 30 દિવસનો હોય કે 31 દિવસનો, ગ્રાહકોને આખા મહિના માટે કોલિંગનો લાભ મળતો રહેશે.
એરટેલના ગ્રાહકો માટે પણ સસ્તા વોઇસ-ઓન્લી પ્લાન
જિયોની જેમ જ ભારતી એરટેલે પણ પોતાના ગ્રાહકો માટે ડેટા વિનાના વોઇસ-ઓન્લી પ્લાન લોન્ચ કર્યા છે. એરટેલનો સૌથી શરૂઆતી વોઇસ પ્લાન 185 રૂપિયાનો છે. આ પ્લાનમાં ગ્રાહકને 28 દિવસની વેલિડિટી સાથે અનલિમિટેડ કોલિંગ અને 300 SMS મળે છે.
એરટેલનો બીજો પ્લાન 203 રૂપિયાનો છે, જેની વેલિડિટી પૂરા 30 દિવસની રાખવામાં આવી છે. જ્યારે ત્રીજો વિકલ્પ 206 રૂપિયાનો છે, જે એક કેલેન્ડર મહિનાનો પ્લાન છે. એટલે કે મહિનામાં 31 દિવસ હોય તો આ પ્લાન પૂરા 31 દિવસ સુધી ચાલશે અને ગ્રાહકે મહિનામાં માત્ર એક જ વાર રિચાર્જ કરાવવું પડશે.
ટ્રાઈ (TRAI) ના આદેશથી ગ્રાહકોને થયો મોટો ફાયદો
નોંધનીય છે કે, ટેલિકોમ રેગ્યુલેટરી ઓથોરિટી ઓફ ઇન્ડિયા (TRAI) એ તમામ ટેલિકોમ કંપનીઓને કડક નિર્દેશ જારી કર્યા હતા. ટ્રાઈએ કંપનીઓને આદેશ આપ્યો હતો કે તેઓ ડેટા વિનાના માત્ર કોલિંગ વાળા પ્લાન બજારમાં ઉતારે.
આ માટે રેગ્યુલેટરે ટેલિકોમ ઓપરેટરોને 21 ઓક્ટોબર સુધીની અંતિમ મહેતલ આપી હતી. ભારતના ગ્રામીણ વિસ્તારોમાં આજે પણ લાખો એવા મોબાઈલ ધારકો છે જેઓ માત્ર કીપેડ વાળા સાદા ફોનનો ઉપયોગ કરે છે. આ નિયમથી આવા લાખો સામાન્ય ગ્રાહકોના પૈસા બચશે અને તેમને બિનજરૂરી ડેટાના પૈસા ચૂકવવા નહીં પડે.