Hun To Bolish : હું તો બોલીશ : કપાસના ખેડૂતોનો શું વાંક ?

કપાસના આયાત પરની કસ્ટમ ડ્યુટીને કામ ચલાઉ રીતે 19 ઓગસ્ટથી 31 ડિસેમ્બર સુધી કેન્દ્ર સરકારે મુક્તિ આપવાનો નિર્ણય કર્યો. આ નિર્ણયથી આયાતી કપાસમાંથી યાર્ન અને કાપડ તૈયાર કરનાર ઉત્પાદકોને જબરદસ્ત ફાયદો તો થયો પણ 11 ટકા આયાત ડ્યુટી હટાવવાના કારણે વિદેશથી મોટા પ્રમાણમાં કોટન એટલે કે રૂ આયાત થવા લાગ્યું. અને આ રૂ સ્વાભાવિક રીતે જ આપણા કોટન કરતા સસ્તું પડવા લાગ્યું. બસ આ જ કારણ રહ્યું કે, આપણા ત્યાં કપાસની ખેતી કરતા ખેડૂતો અને કપાસ ઉપર નિર્ભર જીનિંગ મિલ ઉદ્યોગને જબરદસ્ત ફટકો પડ્યો. જો કે, કપાસનો ટેકાનો ભાવ 8,060 રૂપિયા પ્રતિ ક્વિન્ટલ નક્કી કરાયો. સાથે જ બજાર ભાવ 7 હજારની આસપાસનો છે. જો આયાતી કપાસ ઉપર ડ્યુટી યથાવત રખાઈ હોત તો ખેડૂતોને ભાવ ઉંચો મળત. અને આપણો જિનિંગ ઉદ્યોગ વધુ ધમધમતો. સારી ક્વોલિટીનું બ્રાઝિલિયન કોટન વધારે ઈમ્પોર્ટ કરવામાં આવે છે. 147થી 150 રૂપિયા પ્રતિ કિલો ઈમ્પોર્ટેડ કોટન દેશમાં લવાય છે.. ઈમ્પોર્ટ કરવામાં આવતા કોટનની એક ગાંસડી અહીંયાના કોટનની બે ગાંસડી બરાબર હોય છે. ઉપરથી બંનેનો ભાવ લગભગ સરખો અને ઈમ્પોર્ટ ડ્યુટી ફ્રી હોવાથી વિદેશી કપાસ વધુ ખરીદાય છે. ઈમ્પોર્ટ ડ્યુટી ફ્રી હોવાના કારણે આરોપ છે કે, વેપારીઓએ હજુ પણ બે મહિના સુધી ચાલે તેટલો સ્ટોક કરી લીધો છે.